جەرگىلىكتى پوليتسيا قىزمەتى ەسەپ بەردى
كەشە ءىىد جەرگىلىكتى پوليتسيا قىزمەتىنىڭ باسشىسى باقىتجان مالىباەۆ حالىق الدىندا جىل بويى اتقارىلعان جۇمىستاردىڭ قورىتىندى ەسەبىن بەردى. ەسەپ بەرۋ كەزدەسۋىنە استانا قالاسى اكىمىنىڭ ورىنباسارى اندرەي لۋكين مەن قالالىق قوعامدىق كەڭەستىڭ توراعاسى سانسىزباي ەسىلوۆ قاتىستى.
ۇلت جوسپارى بويىنشا قۇرىلدى
اۋەلى مىنبەرگە كوتەرىلگەن قالا باسشىسىنىڭ ورىنباسارى اندرەي لۋكين «استانا – قاۋىپسىز قالا» باعىتىندا ءبىراز جۇمىستىڭ اتقارىلعانىن, قوعامداعى ءتارتىپتى قالىپتاستىرۋدا تۇرعىنداردىڭ دا ۇلەسى بارىن جانە جەرگىلىكتى پوليتسيا قىزمەتىنىڭ قۇرامىنا ۋچاسكەلىك پوليتسيا ينسپەكتورلارى, يۋۆەنالدىق, جول-پاترۋلدىك, تابيعاتتى قورعاۋ پوليتسياسى, ايەلدەردى زورلىق-زومبىلىقتان قورعاۋ, ارنايى قابىلداۋ ورنىنان اكىمشىلىك قاماۋعا الىنعان تۇلعالاردى قابىلداپ-تاراتۋ بولىمشەلەرى بىرىكتىرىلگەنىن اتاپ ءوتتى.
ال استانا قالاسى قوعامدىق كەڭەسىنىڭ توراعاسى سانسىزباي ەسىلوۆ جەرگىلىكتى پوليتسيا قىزمەتى مەملەكەت باسشىسىنىڭ بەس ينستيتۋتسيونالدىق رەفورمانى جۇزەگە اسىرۋعا باعىتتالعان «100 ناقتى قادام» ۇلت جوسپارىنىڭ 30-قادامى بويىنشا قۇرىلعانىن, بيىل 1 قاڭتاردان باستاپ جۇمىسىن باستاعان بۇل قىزمەتتىڭ قورىتىندى ەسەبى ماڭىزدى ەكەنىن ايتتى. ءبىر جىلدىڭ وزىندە بۇل سالا جاقسى جاعىنان كورىنىپ, قوعامعا قاجەتتىلىگى بايقالدى. زاڭ بويىنشا جەرگىلىكتى پوليتسيا قىزمەتى جىلىنا ەكى رەت ەسەپ بەرۋ كەرەك.
ودان كەيىن حالىق الدىنا شىققان ءىىد جەرگىلىكتى پوليتسيا قىزمەتىنىڭ باسشىسى باقىتجان مالىباەۆ بيىلعى جۇمىستاردىڭ قورىتىندىسىن باياندادى. ونىڭ مالىمدەۋىنشە, تاۋەلسىزدىكتىڭ 25 جىلدىعى قارساڭىندا ەسەپ بەرىپ وتىرعان جەرگىلىكتى پوليتسيا قىزمەتى قىزمەتكەرلەرىنىڭ سانى 1,5 مىڭنان اسادى. ەلوردانىڭ دامۋ قارقىنى مەن تۇرعىندار سانى ارتۋىن ەسكەرە وتىرىپ, ءىس جۇرگىزۋگە قوسىمشا 200 شتاتتىق ۋچاسكەلىك پوليتسيا ينسپەكتورلارى مەن 150 جپپ پولكى وفيتسەرلەر قۇرامىن الۋ تۋرالى ۇسىنىستى استانا قالاسىنىڭ اكىمدىگى قولدادى.
10 مىڭنان اسا اكىمشىلىك قۇقىق بۇزۋشىلىق انىقتالدى
– مەملەكەت باسشىسىنىڭ نۇسقاۋىمەن جەرگىلىكتى پوليتسيا قىزمەتىنىڭ قوعامنىڭ مۇقتاجدىقتارىن قامتاماسىز ەتۋ جانە ونىڭ بەرەكە-بىرلىكتە تۇراقتى دامۋى سەكىلدى نەگىزگى باعىتتارى ايقىندالعان. ءبىزدىڭ بار كۇش-جىگەرىمىزدى سالىپ جۇمىس ىستەۋىمىزگە مىندەتتەلگەن ماسەلە – ول قۇقىق بۇزۋشىلىقتىڭ الدىن الۋ. قالاداعى جەدەل جاعدايلاردىڭ جاي-كۇيىن ەسكەرە وتىرىپ, شۋلى شاعىن ۋچاسكەلەردە بىرقاتار الدىن الۋ ءىس-شارالارى ءوتتى. ناتيجەسىندە انىقتالعان 10 مىڭنان استام اكىمشىلىك قۇقىق بۇزۋشىلىق انىقتالىپ, سونىڭ شەڭبەرىندە 300 ءىس جۇرگىزىلدى جانە 8 مىڭنان اسا ازامات ىشكى ىستەر ورگاندارىنا جەتكىزىلدى, – دەدى باقىتجان مالىباەۆ.
سونىمەن قاتار, ەكى كەزەڭگە بولىنگەن كەڭ اۋقىمدى اكتسيالار ۇيىمداستىرىلدى. الدىمەن 25 قاڭتار مەن 25 مامىر ارالىعىندا «سالەمەتسىز بە! مەن ءسىزدىڭ ۋچاسكەلىك پوليتسيا ينسپەكتورىڭىزبىن» اكتسياسى ءوتتى. 1 قىركۇيەكتەن 1 جەلتوقسانعا دەيىن جۇرگىزىلگەن «ۋچاسكە» اتتى ەكىنشى اكتسيا كەزىندە ينسپەكتورلار اۋلالار مەن پاتەرلەردى ارالاپ, ايماقتىڭ ءمان-جايىمەن تانىسىپ شىقتى. وسى ءىس-شارالار تۇرعىنداردى تانۋعا, جالدامالى پاتەرلەر جونىندە, كورشىلەردىڭ مازاسىن الۋشىلاردىڭ ارەكەتىن انىقتاۋعا, ادامداردى ەسەپكە الۋعا, جالپى تولعاندىرعان ماسەلەلەر جايلى مالىمەت جيناۋعا كوپ كومەگىن تيگىزدى.
وسىنداي جۇمىستار بارىسىندا 215 مىڭنان استام پاتەر مەن 40 مىڭعا جۋىق ۇيلەرگە تەكسەرىس جۇرگىزىلىپ, 900 مىڭعا جۋىق تۇرعىنداردىڭ مالىمەتى جينالدى. سونداي-اق, جالعا بەرىلىپ وتىرعان 4 مىڭنان استام پاتەر انىقتالدى. ونىڭ ىشىندە 2,5 مىڭى قازىرگى تاڭدا كىرىستەر دەپارتامەنتىندە تىركەۋدە تۇر. ياعني, سولاردىڭ ەسەبىنەن ەل قازىناسىنا 11 اي ىشىندە 30 ملن تەڭگەدەن استام تابىس تۇسكەن.
بۇگىندە ۋچاسكەلىك پوليتسيا قىزمەتكەرلەرىنە قوعامدىق پوليتسيا كومەكشىلەرى رەتىندە پيك شتاتىندا تىركەلگەن 200-دەن اسا كونسەرج كومەكتەسىپ ءجۇر. جالپى, پوليتسيا كومەكشىلەرى بولىپ جۇرگەن 1,5 مىڭنان اسا ازامات بار. ولاردىڭ حابارلاۋى بويىنشا 3 مىڭنان استام اكىمشىلىك قۇقىق بۇزۋشىلىق انىقتالعان. اكىمدىكتىڭ قولداۋىمەن قوعامدىق كومەكشىلەر اراسىندا ەرەكشە كوزگە تۇسكەن بەلسەندىلەرگە جىلىنا 13 ملن تەڭگە بولىنەدى.
تۇرعىندار تىلەگى ەسكەرىلەدى
جەرگىلىكتى پوليتسيا قىزمەتىنىڭ باسشىسى بيىلعى جۇمىستاردان حاباردار ەتكەن سوڭ جينالعان جۇرتتىڭ ساۋالدارىنا جاۋاپ بەردى. قويىلعان سۇراقتاردىڭ ءبىرى ءدال قازىرگى ۋاقىتتا وزەكتى بولىپ تۇرعان كولىكتەرگە «ش» بەلگىسىنىڭ جابىستىرىلۋى تۋرالى بولدى. ياعني, كولىك جۇرگىزۋشىلەرىنىڭ كوبى وسى بەلگىنى تاقپاعان جاعدايدا ايىپپۇلمەن جازالاناتىنىنا نارازى. بۇعان باقىتجان مالىباەۆ «پاترۋلدىك پوليتسيا «ش» بەلگىسىن ورناتپاعاندارعا ايىپپۇل سالمايدى. تەك قانا توقتاتىپ, ەسكەرتۋ جاسايدى. بۇدىرلى دوڭعالاققا اۋىستىرۋ ءار ادامنىڭ ءوز قاۋىپسىزدىگى ءۇشىن. ال ارناۋلى بەلگىنى تاعىپ العان, ارينە جاقسى» دەپ جاۋاپ قاتتى.
سونداي-اق, تۇرعىن ءۇي كەشەندەرىنىڭ تۇرعىندارى ءار كىرەبەرىستە ورناتىلعان بەينەباقىلاۋ ءۇشىن اقى تولەيتىندەرىنە قىنجىلىس بىلدىرەتىندەرى جەتكىزىلدى. بۇل شاعىمعا «ءار تۇرعىن ايىنا بار بولعانى 300 تەڭگە تولەيدى. ول الدىمەن قىلمىستىڭ الدىن الۋ ءۇشىن, قاۋىپسىزدىك ءۇشىن جاسالعان شارۋا. وسى ارقىلى كوپتەگەن قۇقىق بۇزۋشىلىق
ازايدى» دەلىنگەن جاۋاپ بەرىلدى.
وسى جيىندا قالادا ۇيالى تەلەفونداردىڭ كوپ قولدى بولاتىنى, بىراق پوليتسيا قىزمەتكەرلەرى تاۋىپ بەرۋگە كومەكتەسپەيتىنى جايلى شاعىمدانعاندار تابىلدى. سوڭىندا حالىقتى تولعاندىرعان ماسەلەلەردىڭ ءبارى الداعى ۋاقىتتا نازارعا الىناتىنى, سول بويىنشا جۇمىستار اتقارىلاتىنى ايتىلدى.
ورىنبەك وتەمۇرات