ۇلى جەڭىس كۇنى مەرەكەسىندە ءتورت كۇن قاتارىنان دەمالىپ, بويىمىز ءبىر جازىلىپ قالدى. سول كۇندەرى اۋا رايى دا بار شۋاعىن توگىپ, جارقىراپ تۇردى. مەرەكەدە وتباسىمىزبەن تابيعاتى كوركەم بۋرابايعا بارۋدى الىسسىندىق تا, شاھارداعى جاسىل جەلەككە تولى «جەرۇيىق» ساياباعىنا بارىپ دەمالۋدى ءجون سانادىق.
بۇل ساياباق قالانىڭ ەڭ ءبىر كورىكتى جەرىندە ورنالاسقان. سودان دا بولار, مۇندا تۇرعىندار دەمالۋعا ءجيى كەلەدى. ايتقانداي, 10 مامىر كۇنى دە ساياباققا كوپ ادامدار بالا-شاعاسىمەن كەلىپتى. ءبارى دە جاپىراعى قالىڭ اعاشتاردى كولەڭكەلەپ, جەرگە توسەنىشتەرىن توسەپ, ۇيدەن اكەلگەن تاماقتارىن جەپ, مارە-سارە كۇي كەشۋدە. اسىرەسە, تاسجولدا وسكەن بالالار اياق كيىمدەرىن شەشىپ, جايقالعان كوگالدى جالاڭ اياق باسىپ, ەركىن وينادى.
ەندى وسى شارادا تولعان سۇتتەي لۇپىلدەگەن كوڭىلىمىزگە ءبىر كەلەڭسىز جاعداي قاياۋ ءتۇسىردى. سول كۇنى ساياباقتا تۇرعان دارەتحانا جابىق تۇردى. دارەتكە وتىرعىسى كەلگەن بالامىزدى قايدا اپارارىمىزدى بىلمەي قينالدىق. اقىرى كەشكە دەيىن دەمالامىز دەپ بارعان ويىمىزدان اينىپ, ەكى ساعاتتان كەيىن ۇيگە قايتۋعا تۋرا كەلدى.
سودان كەتىپ بارا جاتىپ ساياباقتىڭ شىعا بەرىسىندە تۇرعان كۇركەگە كىرسەم, الدىمنان «استانا-زەلەنستروي» مەكەمەسىندە جۇمىس ىستەيتىن سولاقاي تولەۋ دەگەن جاسى كەلگەن اعامىز شىقتى. وسى ساياباقتاعى اعاشتاردى سۋارىپ, تازالىعىن قاداعالاپ جۇرەتىن باعبانشى. بۇل كىسىنىڭ دە ءبىراز ايتارى بار ەكەن:
– ساياباقتا ءبىر دارەتحانا بار. ونىڭ يەسى كىم ەكەنىن بىلمەيمىن. ءبىر جىگىت اشىپ-جاۋىپ جۇرەدى. بۇگىن تاڭەرتەڭ كورگەندە: «دارەتحانانى اشىپ قويىڭىز, ادامدار دەمالۋعا كەلەدى دەپ ەدىم, «سۋ جوق» دەپ ەسىگىن جاۋىپ كەتىپ قالدى. سۋدى شاقىرىپ قۇيعىزۋعا بولادى عوي. بۇرىن مۇندا اعاش دارەتحانا بولعان. ونى سانيتارلىق تالاپقا ساي ەمەس دەگەننەن كەيىن الىپ تاستادى. ەندى مىناۋ جابىق تۇر. ءوزىم جولدىڭ ارعى بەتىندەگى جەكە ۇيلەردىڭ دارەتحاناسىنا بارىپ ءجۇرمىن. سول ءۇي يەلەرىن ءجيى مازالاۋعا دا ۇيالامىن, – دەيدى ول.
قىسقاسى, باس قالادا دارەتحانا ماسەلەسى – ءتۇيىنى شەشىلمەگەن سۇراقتاردىڭ ءبىرى. جالعىز «جەرۇيىق» ساياباعىندا عانا ەمەس, ادامدار كوپ باراتىن الاڭدار مەن باسقا ساياباقتاردا دا بۇل ماسەلە تولىق شەشىمىن تاپپاعان. سونى قالالىق اكىمدىكتىڭ جاۋاپتى مەكەمەلەرى ەسكەرسە دەيمىز.
