«جىبەك جولى» فەستيۆالى باستالادى
«استانا وپەرا» العاشقى رەت 17 قىركۇيەك پەن 5 قازان ارالىعىندا «جىبەك جولى» حالىقارالىق فەستيۆالىن وتكىزەتىن بولدى. ەندى تەاتر ساحناسىندا يتاليا, فرانتسيا, قىتاي, رەسەيمەن قاتار ءوزىمىزدىڭ وپەرا جانە بالەت جۇلدىزدارى ونەر كورسەتپەك.
فەستيۆال بارىسىندا «لا سكالا» تەاترىنىڭ تۇپنۇسقاداعى قويىلىمى, ياعني, قيالى سارقىلمايتىن رەجيسسەر لۋكا رونكونيدىڭ «توسكا» وپەراسى, سونداي-اق, س.پروكوفەۆتىڭ «رومەو مەن دجۋلەتتاسى», ا.حاچاتۋرياننىڭ «سپارتاك» ساحنالىق قويىلىمى جانە الەمدىك مادەنيەتتىڭ فەنومەنى – «اققۋ كولى» مەن ب.ەيفماننىڭ «قىزىل جيزەل» بالەتى قويىلادى.
سونىمەن قاتار, 25 قىركۇيەك كۇنى ونەر سارايىندا قىتاي ۇلتتىق تەاترى كورەرمەندەردى قىتايدىڭ بىرەگەي ۇلتتىق ءمادەنيەتىمەن سۋسىنداتىپ, وپەرا جانە بالەت ونەرىمەن قاتار حالىق اندەرى مەن بي قويىلىمدارىنان تۇراتىن كونتسەرت ۇسىنباقشى. ال, 27 قىركۇيەكتە يتاليادان كەلەتىن «Aterballeto», اباي اتىنداعى ماوبت, رەسەيدىڭ ماريا تەاترىنىڭ قاتىسۋىمەن قازىرگى زامانعى بالەت ونەرىنىڭ جاعدايىن قوزعايتىن كەڭ كولەمدى كونفەرەنتسيا وتەدى. بۇدان بولەك, 30 قىركۇيەكتە كسرو حالىق ءارتىسى بيبىگۇل تولەگەنوۆانىڭ 85 جىلدىق مەرەيتويىنا ارنالعان «ءسۇيۋ, ءۇمىتتەنۋ جانە سەنۋ» اتتى جەكە بەنيفيسى وتەدى دەپ جوسپارلانۋدا. «جىبەك جولى» فەستيۆالىنىڭ باعدارلاماسىن 5 قازان كۇنى «استانا بالەت» ۇجىمى اياقتاماقشى.
نۇريسلام قۇسپانعالي