ابىلايحان وسپانوۆ, قر بايلانىس جانە اقپارات اگەنتتىگىنىڭ ەلەكتروندىق قىزمەتتەردى جانە حقكو دامىتۋ دەپارتامەنتىنىڭ ديرەكتورى: ەلەكتروندىق تسيفرلىق قولتاڭبا ءموبيلدى بولادى
– 2015 جىلى قازاقستاندىقتار ەلەكتروندىق تسيفرلىق قولتاڭبانى SIM-كارتانىڭ كومەگىمەن پايدالانادى ەكەن. جوبانىڭ ارتىقشىلىعى نەدە؟
– «ءموبيلدى قولتاڭبا» ەلەكتروندىق قىزمەتتەر مەن سەرۆيستەردى ۇيالى تەلەفوننىڭ كەز كەلگەن مودەلى ارقىلى الۋعا مۇمكىندىك بەرەدى. بۇل جاڭاشىلدىق «ءموبيلدى ۇكىمەتتىڭ اقپاراتتىق جۇيەسى.م-GOV قۇرۋ» جوباسى شەڭبەرىندە ازىرلەنۋدە. بۇگىنگى كۇنى «iOs» جانە «Android» وپەراتسيالىق جۇيەسىن پايدالانۋشىلار ءۇشىن egov.kz ءموبيلدى قوسىمشاسى ارقىلى 13 ەلەكتروندىق مەملەكەتتىك قىزمەت قولجەتىمدى. ولاردىڭ قاتارىندا باسپانا كەزەگىن باقىلاۋ, كوممۋنالدىق قىزمەتتەر ءۇشىن تولەماقى تولەۋ, جەكە تۇلعالاردىڭ كولىك سالىعىن تولەۋ سەكىلدى بىرقاتار قىزمەتتەر بار. اتالعان قىزمەتتەردى الۋ ءۇشىن ءموبيلدى قوسىمشانى پايدالانۋشىلار فايلدىق ەتسق قولدانادى.
– ياعني, قاعاز انىقتامالار مەن قۇجاتتاردان باس تارتۋعا مۇمكىندىك بار عوي؟
– SIM-كارتاعا جازىلعان ەتسق ۇيالى تەلەفوننىڭ كەز كەلگەن ءتۇرى ارقىلى ەلەكتروندىق قىزمەتتەردى الۋعا مۇمكىندىك بەرەدى, تەك SIM-كارتانى عانا وزگەرتۋ قاجەت بولادى. بۇل دەگەنىمىز, بولاشاقتا ءموبيلدى ۇكىمەتتىڭ مۇمكىندىكتەرى اياسىندا قاعاز انىقتامالار مەن قۇجاتتاردان باس تارتاتىندىعىمىزدى بىلدىرەدى.
– جالپى, وسى ۋاقىتقا دەيىن قانشا ادام ەلەكتروندى تسيفرلىق قولتاڭباعا يە بولدى؟
– 2008 جىلدان بەرى قازاقستاندىقتارعا بارلىعى 4,7 ملن ەتسق بەرىلگەن. بۇگىنگى تاڭدا شامامەن 2,35 ملن ەتسق قولدانىستا ءجۇر. اتاپ ءوتۋ كەرەك, ونىڭ 90%-ى جەكە تۇلعالارعا بەرىلگەن.
– تۇرعىندار ەتسق ارقىلى قانداي قىزمەتتەردى ءجيى پايدالانادى؟
– بۇگىندە ازاماتتار ەتسق كومەگىمەن مەملەكەتتىك ورگانداردىڭ ۆيرتۋالدى قابىلداۋلارىنا ءوز وتىنىمدەرىن جولداپ, انىقتامالار الۋدا. ءتۇرلى قىزمەتتەر مەن رۇقساتتاردى الۋعا ءوتىنىش بەرىپ, تۇرعىلىقتى مەكەن – جايى بويىنشا تىركەۋگە تۇرىپ, تىركەۋدەن شىعۋدا. ال, زاڭدى تۇلعالار بولسا ەتسق كومەگىمەن ينتەرنەت ارقىلى بيلىك قۇرىلىمدارىمەن, ءتۇرلى مەكەمەلەرمەن قازاقستاننىڭ كەز كەلگەن ايماعىنداعى سەرىكتەستەرىمەن ونلاين رەجيمىندە ارىپتەستىك ورناتىپ, كاسىپتەرىن كەڭەيتە تۇسۋدە.
گۇلميرا شارحانقىزى
