قاسيەتتى رامازان ايىندا ەلوردانىڭ ايشىقتى قۇلشىلىق ءۇيى «ازىرەت سۇلتان» مەشىتىندە بۇقارالىق اقپارات قۇرالدارى وكىلدەرىنە ارنالىپ اۋىزاشار داستارقانى جايىلدى.
شام نامازىنىڭ ازانى شاقىرىلىپ, نامازى وقىلعاننان سوڭ, اۋىزاشار كەشى اللانىڭ كالامى – قۇران كارىمدى وقۋمەن باس-تالدى. بۇدان سوڭ قازاقستان مۇسىلماندارى ءدىني باسقارماسىنىڭ نايب ءمۇفتيى, «ازىرەت سۇلتان» مەشىتىنىڭ باس يمامى سەرىكباي قاجى وراز كەش شىمىلدىعىن ءتۇرىپ, ءسوز سويلەدى. «بۇگىنگى اۋىزاشار كەشى قالامىمەن قوعامعا ويتۇرتكى بولعان باق وكىلدەرىنە ارنالىپ وتىر. ادامزاتتىڭ ارداقتىسى مۇحاممەد مۇستافا (س.ا.س.) «ءدىن – ناسيحات» دەگەن. اتا ءدىنىمىز بەن بابا ءداستۇرىمىزدى بۇقاراعا جەتكىزۋدە سىزدەردىڭ ورىندارىڭىز ايرىقشا. وسى ورايدا, سىزدەرگە ۇلكەن العىسىمدى بىلدىرگىم كەلەدى. ەلدىڭ اماندىعى, حالىقتىڭ بىرلىگى ءۇشىن ايانباي ەتىپ جاتقان قىزمەتتەرىڭىزگە اللا مول ساۋاپتان جازسىن. بۇگىنگى اق نيەتپەن جايىلعان اۋىزاشارىمىز سىزدەرگە ايتار العىسىمىزدىڭ نىشانى» دەدى سەرىكباي قاجى.
اۋىزاشار كەشىندە يگى تىلەك, ىزگى نيەتتەرىن ءبىلدىرۋشى قوناقتار مەن قارا دومبىرادان قوڭىر كۇي سەلدەتكەن ونەر يەلەرى دە بولدى. ورايلى كەشتە «ازىرەت سۇلتان» مەشىتىنىڭ ۇستازى ماقساتبەك قايىرعاليەۆ جۇرتشىلىققا «Muslim.kz» ينتەرنەت پورتالىنان مۇمكىندىگى شەكتەۋلى جاندارعا اشىلعان ارنايى پاراقشا تۋرالى قۋانىشتى حاباردى جەتكىزدى. اتالمىش پاراقشادا سۋردواۋدارما قىزمەتىنىڭ كومەگى ارقىلى «جۇما ۋاعىزدارى», «سۇراق-جاۋاپ», «دارىستەر» جانە «فيلمدەر» ايدارلارىن قاراۋعا ۇلكەن مۇمكىندىكتەر جاسالعان.
كەش سوڭىندا قوناقتارعا اسىل ءدىنىمىز تۋرالى گازەت-جۋرنالدار, اتا ءدىن مەن بابا ءداستۇرى قامتىلعان CD تاسپالارى جيناقتالعان كادەسىيلار تاراتىلىپ, بارشاسى كوڭىلدى كۇيدە تارقاستى.
ەلوردامىزداعى ەڭسەلى مەشىت «ازىرەت سۇلتاندا» جىل سايىن وتىز كۇن ورازادا ءار كۇن 400 ادامعا ارنالىپ اۋىزاشار داستارقانىن جاساۋ يگى داستۇرگە اينالعان. باق وكىلدەرىنە ارنالعان كەشتە 300-گە جۋىق قوناققا قىزمەت جاسالدى.
جايىق ناعىماش
