سەرىك رۇستەمبەكوۆ, استانا قالاسى ساۋلەتشىلەر وداعىنىڭ توراعاسى, «ORTA» جشس جوبالاۋ كومپانياسىنىڭ ديرەكتورى: شەتەلگە شىقسام, استاناعا اسىعامىن
ەلىمىزدىڭ باس قالاسى الاتاۋدىڭ باۋرايىنداعى اسەم الماتىدان ارقا توسىندەگى ەجەلگى اقمولاعا كوشىرىلگەن كۇننەن باستاپ شاھار دامۋىنا ۇلەس قوسىپ كەلە جاتقان جاندار بۇگىندە ساۋساقپەن سانارلىقتاي بولسا دا بار. سولاردىڭ اراسىندا استانانىڭ العاشقى باس جوسپارى اۆتورلارىنىڭ ءبىرى, قر ەڭبەك سىڭىرگەن ساۋلەتشىسى, قازاقستان ساۋلەتشىلەر وداعىنىڭ ۆيتسە-پرەزيدەنتى سەرىك ءرۇستەمبەكوۆ ەسىمىنىڭ الار ورنى ەرەكشە. 200 مىڭداي عانا تۇرعىنى بار شاعىن قالانىڭ العاشقى قاداسىن قاعىپ, ەسىل وزەنىنىڭ سول جاعالاۋىن جاڭعىرتۋعا باعىتتالعان تىڭ جوبالاردى جۇزەگە اسىرعان بەلگىلى ساۋلەتشى گازەتىمىزدىڭ تىلشىسىمەن بولعان سۇحبات بارىسىندا ەلىمىزدىڭ باستى شاھارى قالاي وزگەرگەنى جانە ونى كوركەيتۋ ءۇشىن ءالى نە ىستەۋ كەرەكتىگى توڭىرەگىندە اڭگىمە ءوربىتتى.
– سەرىك يساۇلى, استانانىڭ العاشقى باس جوسپارى قالاي جاسالدى؟ اڭگىمەنى وسى تۇستان باستاساڭىز.
– ەلوردانى الماتىدان اقمولاعا كوشىرۋ تۋرالى ساياسي شەشىم مەنىڭ ومىرىمدە ەرەكشە ءرول اتقاردى. ول كەزدە ەلدىڭ جاعدايى بەلگىلى, بيۋدجەت قىزمەتكەرلەرى ۋاقىتىندا جالاقىسىن الا الماي, قاراعاندىنىڭ كەنشىلەرى شەرۋگە شىعىپ, قۇرىلىس ابدەن توقتاپ, ەلىمىزدىڭ ەكونوميكاسى توقىراپ تۇرعان تۇس ەدى. كوپشىلىك استانانىڭ اۋىساتىنىنا سەنگەن جوق. بىراق, شەشىم قابىلداندى. سول ساتتە ءبىز, الماتىداعى ءبىر توپ تاجىريبەلى ساۋلەتكەرلەر ءبىر-بىرىمىزبەن اقىلداسىپ, بولاشاقتا استانا كوشسە, وعان باس جوسپار كەرەك دەپ, ءوزىمىز سوعان ىڭعايلانا باستادىق. ءسويتىپ, اقمولاعا كەلىپ, ءبىراز مالىمەتتەر جيناپ, كەڭەس قۇرىپ, جەردىڭ جاعدايىمەن تانىستىق. سوندا كوزىمىز ەسىلدىڭ سول جاعالاۋىنداعى بوس جەرگە ءتۇستى. جاڭا قالا وسى جەردە بولۋى كەرەك دەپ بولجاپ, ءوز ويىمىزدى قاعازعا ءتۇسىرىپ, سول كەزدەگى مەملەكەت باسشىسىنا ۇسىنىسىمىزدى بايانداپ بەردىك.
باستاما پرەزيدەنتكە وتە ۇنادى. سودان حالىقارالىق كونكۋرس جاريالانىپ, باس قالانىڭ نەگىزگى ەسكيزى تاڭدالدى. ءبىز الماتى مەن استانا ساۋلەتشىلەرىنەن قۇرىلعان شىعارماشىلىق بىرلەستىك سول كونكۋرستى جەڭىپ الدىق. وسىلايشا, 1996 جىلى اقمولادا «اق وردا» جوبالاۋ-قۇرىلىس كومپانياسى قۇرىلدى, ول قازاقستاننىڭ جاڭا استاناسى اقمولانىڭ باس جوبالاۋشىسى بولدى. ارىپتەستەرىم ونىڭ باستىعى ەتىپ مەنى سايلادى. سول جىلى مەن الماتىدان ءوزىم تۋىپ-وسكەن قالاعا جاڭا شاھار سالۋ ءۇشىن ساۋلەتشىلەر دەسانتىن الىپ كەلدىم.
1999 جىلى ۇكىمەت ۇلكەن باس جوسپارعا حالىقارالىق كونكۋرس جاريالادى. سوندا وتە اتاقتى جاپون ارحيتەكتورى كيسە كۋروكاۆا جەڭىمپاز بولدى. بەلگىلى ساۋلەتشىنىڭ ەسىمى بىزگە سوناۋ ستۋدەنت كەزدەن ءمالىم بولاتىن. ونىڭ شەتەل جۋرنالدارىنداعى ماقالالارىمەن, جوبالارىمەن سول كەزدەن تانىس ەدىك. شىندىعىندا, باس جوبانى جاساۋعا ول كەزدە بيۋدجەتتە اقشا دا بولعان جوق. ال جاپون ارحيتەكتورىنىڭ ارتىندا حالىقارالىق قور تۇردى. سول قوردىڭ شارتى بويىنشا بۇل ىسكە جەرگىلىكتى جوبالاۋ فيرمالارى مەن جەرگىلىكتى ماماندار قاتىسۋى كەرەك ەدى. ءسويتىپ ءبىز اتاقتى ساۋلەتشىمەن جاقىنىراق تانىسىپ, بىرگە قىزمەت ەتۋگە كىرىسىپ كەتتىك. سول تۇستا بۇگىندە مەن جەتەكشىلىك ەتەتىن «ورتا» دەگەن فيرما تىركەلدى. باس قالانىڭ تاريحى وسىلايشا باستالىپ كەتتى.
ءومىر وزگەرىستەرىن تولىعىمەن ەسەپكە الۋ مۇمكىن ەمەس قوي. بۇرىنعى ەسەپتىڭ سىرتىندا حالىق سانىنىڭ تەز ءوسىپ كەتكەنى باس جوسپارعا وزگەرىس ەنگىزۋگە سەبەپ بولدى. بولجام بويىنشا 2020 جىلعا دەيىن استانا حالقىنىڭ سانى 800 مىڭنان اسپاۋعا ءتيىس ەدى. بۇل اسپاننان الىنعان جوق, مامانداندىرىلعان ەكى ينستيتۋتتىڭ مالىمەتتەرىنە سۇيەنە وتىرىپ جاسالعان زەرتتەۋلەردىڭ ناتيجەسى بولاتىن. قازىر قالا تۇرعىندارى 1 ملن-نان اسىپ كەتتى. ونىڭ ۇستىنە ەلوردانىڭ جان-جاعىنداعى قوسشى, قوياندى, تالاپكەر, يلينكا سەكىلدى ەلدىمەكەندەر دە ەرەكشە قارقىنمەن دامىپ كەلەدى.
– ول كەزدە ەسىل وزەنىنىڭ سول جاعالاۋى قۇر باتپاق پەن قامىس جايلاعان بوس جەر ەدى عوي. سول سايىن دالادا عاجايىپ قالا تۇرعىزىلاتىنىنا سەنگەندەر بولدى ما؟
– جوق, ارينە. ءيا, ول تۇستا ەسىلدىڭ سول جاعالاۋى يەن دالا ەدى. بۇل ماڭدا كومسومولسكي اتتى شاعىن اۋماق, قاپتاعان داچالار عانا بولاتىن. استانانىڭ قاي ۋاقىتتا وسىنداي كوركەم شاھارعا اينالعانىن ءوزىمىز دە سەزبەي قالدىق. ويتكەنى وسىدان شيرەك عاسىر بۇرىن بۇل قالانىڭ سيپاتى مۇلدەم باسقاشا بولاتىن. قازىرگى بويىمەن كوك تىرەگەن ءزاۋلىم ۇيلەردىڭ ورنى قامىس وسكەن ساز باتپاق ەدى عوي. ەسىلدىڭ سول جاعالاۋىنا ەل قونادى دەگەنگە ەشكىم سەنبەدى. سول جاعالاۋعا ەشكىمنىڭ بارعىسى كەلمەيتىن, ويتكەنى ەشقانداي ينفراقۇرىلىم جوق.
پرەزيدەنتتىڭ بۇيرىعىمەن اقوردانىڭ قۇرىلىسى باستالعاندا باسقا ينۆەستورلار قىزىعۋشىلىق تانىتا باستادى. وسىلايشا, سول جاعالاۋدا «اقوردا» رەزيدەنتسياسى, «قازمۇنايگاز» بەن «بايتەرەكتىڭ» قازىعى قاعىلدى. كەزىندە سارى دالا بولىپ جاتقان اۋماقتىڭ جايقالعان جەلەككە ورانىپ, كوركەم شاھارعا اينالعانى, ارينە, كوز قۋانتادى.
قالانىڭ ىشىنەن جارىپ وتەتىن تاماشا ەسىل وزەنى, وعان قۇياتىن ەكى بۇلاعى اقبۇلاق پەن سارىبۇلاق جانە بىرنەشە بۋلۆارلار بار. ءبىزدىڭ ماقساتىمىز – ەڭ ءبىرىنشى قالا سىرتىنان جاسىل ايماق جاساۋ, جاسىل جەلەكتەردى وزەننىڭ جانە بۇلاقتاردىڭ بويىمەن قالاعا كىرگىزىپ, سىرتقى ورماندارىمەن قوسىپ, قالا سترۋكتۋراسىنا جالپى سۋ, كوك وسىمدىكتەر ەنگىزىپ, قالانىڭ ءىشىن تابيعاتتاعىداي ەتىپ, ادامنىڭ كۇندەلىكتى تۇرمىسىنا ىڭعايلى ەتۋ بولاتىن. باس جوسپار وسىنداي ماقساتپەن جاسالعان. بىراق, گەوگرافيادان بەلگىلى, جەر شارىنىڭ اينالۋىنا جانە ايدىڭ اسەرىنە بايلانىستى قاي وزەننىڭ بولسىن وڭ جاعالاۋى بيىك, جار, ال سول جاعالاۋى جازىق بولادى. تاريحتا وسىعان ۇقساس تالاي دەرەكتەر بار. بىزدە دە جازعىتۇرىم ەسىلدىڭ سول جاعالاۋىن وزەننىڭ تاسقىن سۋى باسىپ كەتكەن جاعدايلار بولعان. سول قاۋىپتى ەسكەرىپ, باس جوسپاردىڭ جالعاسى رەتىندە ءبىر ۇلكەن مەملەكەتتىك باعدارلاما جاساپ, سول جاعالاۋدى ينجەنەرلىك قورعاۋ قولعا الىندى. وسى باعىتتا وزەننىڭ جوباسىن 20 جىلعا جوبالاپ شىقتىق.
قالانى اپاتتان قورعاۋ ءۇشىن ينجەنەرلىك-گيدروتەحنيكالىق شەشىمدەرمەن وزەندى تۇزەتىپ, كەڭىتىپ, تەرەڭدەتىپ, جاعالاۋلارىن بەزەندىرىپ, وسى قالانىڭ ىشىنەن وتكىزدىك. جوعارىدان تاسقىن سۋ كەلگەندە قالادان تۋرا ءوتىپ كەتەتىندەي جاعداي قاراستىرىلىپ, جاساندى ەكى ارال جاسالدى. كوپشىلىك بىلە بەرمەيدى, وزەننىڭ ۇزىندىعى – 37 كم, ءبىزدىڭ ۇجىم سونىڭ ءار مەترىن جوبالاپ شىقتى. سونىڭ 80 پايىزىنىڭ قۇرىلىسى اياقتالىپ, ىسكە قوسىلدى.
– ەلوردا تۇرعىندارى مەن قالا قوناقتارىنىڭ ەڭ ادەمى جانە سۇيىكتى دەمالىس ورىندارىنىڭ ءبىرى – ەسىل وزەنىنىڭ جاعالاۋى. بۇل دا ءسىزدىڭ كوپ جىلعى ەڭبەگىڭىزدىڭ ناتيجەسى. وزەننىڭ سول جاعالاۋىنا جان ءبىتىرىپ, كوپىردىڭ استىنا كەمە جۇرگىزۋ يدەياسى قايدان تۋدى؟
– 2005 جىلى پرەزيدەنتكە قالا ىشىندە وزەنگە كەمە جۇرگىزۋ كونتسەپتسياسىن ۇسىندىق, ول قابىلداندى. 2007 جىلى بۇل باعدارلاما ىسكە قوسىلىپ, ءبىرىنشى كەمەلەر پايدا بولدى. قازىر قالانىڭ تۇرعىندارى ونداعى ۇلكەندى-كىشىلى 17 كەمەمەن سەرۋەندەپ ءجۇر.
جالپى, الەمدە وزەن جاعاسىنا سالىنعان قالالار از ەمەس. وزەنگە كوڭىل ءبولۋ سەبەبىمىز, ول جالپى باس جوسپارعا ۇلكەن اسەر ەتتى. بەلگىلى دۇنيەجۇزىلىك استانالاردا موسكۆا, سانكت-پەتەربۋرگ, پاريج, لوندون بارىندە دە وزەن بار. ءبىز دە شاعىن بولسا دا وزەنىمىزدى كەڭەيتىپ, ءبىراز كوركەيتىپ, بەزەندىرىپ, قالانىڭ جالپى لاندشافتىنىڭ ەڭ باستى ءبىر ەلەمەنتى ەتتىك.
قازىر قاراساڭىز, وزەننىڭ جاعالاۋى ناعىز قالا تۇرعىندارىنا, قوناقتارعا سەرۋەندەپ, قىسى-جازى دەمالىپ جۇرەتىن جەرگە اينالدى. بۇگىندە قالا تۇرعىندارى مەن تۋريستەردىڭ ەڭ سۇيىكتى دەمالىس ورنىنا اينالعان وزەننىڭ جاعالاۋى – جازدا جاعاسى جانعا سايا بولسا, قىستا كونكي, شاڭعى, سىرعاناق تەبەتىن تاپتىرماس جەر. ەسىلدە كەمە جۇرگىزۋ جوباسى ءاۋ باستا ەلوردانىڭ تۋريستىك تارتىمدىلىعىن ارتتىرىپ, قالانىڭ سىرتقى كورىنىسىن اجارلاندىرا ءتۇسۋ ماقساتىنان تۋىنداعانى بەلگىلى. بۇگىندە مۇندا شەتەلدىكتەر دە ءجيى كەلەدى.
العاشىندا بۇل تەلمان مەن گاز اپپاراتۋرا زاۋىتى ارالىعىنداعى 20 شاقىرىم جەردى اۆتوبۋسپەن بارعانشا, وسى كەمەمەن ءجۇرىپ وتۋگە ىڭعايلاستىرىلعان جوبا بولاتىن. وكىنىشكە قاراي, بۇگىندە كەمەلەر جوندەۋدى قاجەت ەتىپ تۇر.
ءوز باسىم شەتەلگە شىققاندا كوبىنە كولىكتىڭ وسى تۇرىنە وتىرعاندى ۇناتامىن. ويتكەنى قالانى جاياۋ ارالاۋدان اياق شارشايدى. ال كەمەدە تاماشا, تىنىعىپ وتىرىپ, تاماعىڭ مەن سۋسىنىڭدى ءىشىپ, دىتتەگەن جەرىڭە كەپتەلىسسىز ءارى ەش كەدەرگىسىز جەتەسىڭ. كەرەمەت ەمەس پە؟!
– كەپتەلىس دەمەكشى, سوڭعى كەزدەرى قالادا جولدار كەڭەيتىلىپ, جاڭا كوپىرلەر بوي كوتەرگەنىمەن, كەيبىر كوشەلەردە كولىك تىعىنى ازايماي تۇر. سىزدىڭشە, سەبەبى نەدە؟ جالپى بۇل ماسەلەدەن قۇتىلۋدىڭ جولى بار ما؟
– ارينە, بۇل – ۇلكەن ماسەلە. باستى سەبەپ, بىرىنشىدەن, قالانىڭ ترانسپورتتىق جوسپارى دۇرىس ەسەپكە الىنباعان. ونىڭ ۇستىنە قاي قالا بولسا دا, قالانىڭ ورتالىق جاعىن اينالىپ, قاي باعىتتا بولسىن توقتامايتىن, ۇزدىكسىز قوزعالىس ماگيسترالى بولۋى كەرەك. مىسالى, قازىر استانانىڭ قانداي كەڭ كوشەسىمەن جۇرسەڭىز دە, الدىڭىزداعى باعدارشامعا بارىپ تىرەلەسىز. سونداي سۆەتوفورسىز جول توبىرلارى, ياعني رازۆيازكالار بولسا, وندا ءار باعىت ءوز بەتىمەن, ءبىر-بىرىنە كەدەرگى كەلتىرمەي, ءبىراز ماسەلە شەشىلەر ەدى. ەلوردادا وسىنداي ماگيسترالدىڭ تاپشىلىعى سەزىلەدى. باس جوسپاردا بۇل ماسەلە قاراستىرىلعان. دەگەنمەن, جول توبىرىنا كوپ جەر كولەمى كەرەك. كەزىندە وتە قاجەتتى جول توراپتارى ۋاقىتىندا سالىنبادى. كەيبىر جەردە ولاردىڭ ورنىنا باسقا عيماراتتار تۇرعىزىلىپ, قالا قۇرىلىسىندا ءبىراز قاتەلىكتەر ورىن الدى. ەندى قازىر ونى تۇزەتۋ ءۇشىن قاراجات جانە ۋاقىت كەرەك.
كەپتەلىستەن قۇتىلۋدىڭ بىردەن-ءبىر جولى – رازۆيازكالاردى كوبەيتۋ. تاعى ءبىر ۇلكەن ماسەلە, بۇرىن كەڭەس زامانىندا شاعىن اۋدانداردا مەكتەپ, بالاباقشا, دۇكەن, ءدارىحانا, حيميالىق تازالاۋ, شاشتاراز دەگەن كوپ بولسا 500 مەتردەن اسپايتىنداي اۋماقتا ورنالاساتىن. قازىر شە, تۇرعىنداردىڭ جۇمىس ىستەيتىن جەرى انا شەتتە, مەكتەپ مىنا شەتتە, بالاباقشا ءتىپتى باسقا جاقتا, سونىڭ سالدارىنان ادامدار قاراما-قارسى باعىتتا ەرتەلى-كەش سارتىلداپ ءبىرىن-ءبىرى تاسىمالدايدى دا جۇرەدى. قالاداعى كولىك كەپتەلىسىنىڭ ازايماۋىنىڭ تاعى ءبىر سەبەبى – وسى.
– بۇگىنگى باس قالانىڭ 100-دەن استام عيماراتىندا ءسىزدىڭ قولتاڭباڭىز بارىن بىلەمىز. سولاردىڭ ىشىندە «سامال» شاعىن اۋدانىن جوبالاپ, سالعان كەزدەر ەسىڭىزدە مە؟
– البەتتە. استانا ارقاعا اۋىسقاننان كەيىن ورتالىق مەملەكەتتىك ورگانداردى ورنالاستىرۋ كۇن تارتىبىندەگى ماڭىزدى ماسەلە بولدى. وسى ورايدا ءبىز ەسكى ورتالىقتى جاڭعىرتۋ جۇمىستارىمەن اينالىستىق. بۇل ۇيلەردى سالۋ باسىندا قازاقستاننىڭ اتاقتى قۇرىلىس كومپانيالارىنا ۇسىنىلدى. كەيىن بۇل جوبانى تۇرىكتەر قولعا الدى. ءسويتىپ, «سامال» شاعىن اۋدانىندا 9 جانە 12 قاباتتى 718 پاتەر سالىندى. سول ۇيلەردىڭ سىرتقى بوياۋى ءالى كۇنگە دەيىن سول قالپىندا ساقتالعان. بارشاعا بەلگىل, ول كەزدە ساپاعا كوبىرەك كوڭىل ءبولىنۋشى ەدى.
ۋاقىت وتە كەلە استانامىزدىڭ بەينەسى قالىپتاسا باستادى. جاڭا عيماراتتار قالانىڭ كوركىن اشا ءتۇستى. «سامال» تۇرعىن ءۇي كەشەنىمەن بىرگە مەن «ميللەنيۋم» گالەرەياسىن, «بيزنەس سەرۆيس ورتالىعىن», قارجى مينيسترلىگى الدىنداعى الاڭ, استانالىق ساياباقتاعى «اكۆاپارك» كەشەنىن, «قازاق حالقىنا العىس» مونۋمەنتىن, «ۇلىتاۋ» اللەياسىن جوبالاۋ, سالۋ جۇمىستارىنا تىكەلەي ارالاستىم. وسىلايشا, وتاندىق جانە شەتەلدىك ەڭ ۇزدىك ساۋلەتشىلەرمەن بىرگە استانامىزدىڭ جاڭا كەلبەتىن قالىپتاستىردىق.
وكىنىشكە قاراي, قازىر قۇرىلىس ساپاسى تومەندەپ كەتتى. مىسالى, بۇگىنگى قۇرىلىسشىلار ۇيلەردىڭ قاسبەتىن قاپتاۋدا, ونىڭ بەكىتەتىن زاتتارى دا, ەسىكتەر, تسەمەنت, ارماتۋرا, ءبارىنىڭ باعاسىنا قارايدى. بارىڭىزگە ءمالىم, بيزنەستىڭ زاڭى شىعىندى نەعۇرلىم ازايتىپ, تابىستى ۇلعايتۋ. دەگەنمەن, بۇل رەتتە باقىلاۋدى كۇشەيتكەن ءجون. جوبالاۋشى سمەتانى دۇرىس جاساپ, جاۋاپكەرشىلىكتى سەزىنۋى كەرەك, مەملەكەتتىك ساراپتاما مەن تەحنيكالىق شەشىمدەر دۇرىس بولۋى قاجەت. بۇرىن جوبانى قابىلداۋ ءۇشىن مەملەكەتتىك كوميسسيا بولاتىن. قازىر ءبارى باسقاشا. ونىڭ ۇستىنە بۇگىندە تاجىريبەسى, ءبىلىمى جوق ماماندار كوبەيىپ كەتتى. جاۋاپكەرشىلىكتى سەزىنبەۋدىڭ سالدارى قۇرىلىستاعى نەبىر كەلەڭسىزدىكتەردى تۋدىرىپ وتىر.
شەتەلدە زاڭ بىزدىكىندەي ەمەس, قاتال. جاسىراتىنى جوق, قازىر قۇرىلىس ۇلكەن ءبىر بيزنەسكە اينالىپ بارادى. وعان قىزىقپايتىن ادام جوق. ولار قۇرىلىستا قالىپتاسقان ەرەجەلەر بارىن, جوبالاۋ تارتىپتەرىن ەسكەرە بەرمەيدى. قازىر كەيبىر باقىلاۋشىلار ليتسەنزيانى ساتىپ الا سالادى. اۆتورلىق جانە تەحنيكالىق باقىلاۋشىلار قۇرىلىس بارىسىن ءجىتى قاداعالاۋى قاجەت. سەبەبى قاي ىستە بولسىن ەڭ باستى ماسەلە – ساپا. بىراق, بۇعان ءمان بەرىپ جاتقاندار شامالى.
كەڭەستەر زامانىندا جوبالاۋمەن اينالىساتىن كوپ بولسا, 200 كونتورا بولاتىن. ول كەزدە ءار مينيسترلىكتىڭ ءوز جوبالاۋ كومپانياسى جانە وبلىستا ولاردىڭ فيليالدارى جۇمىس ىستەۋشى ەدى. قازىر قازاقستاندا 15 مىڭ جوبالاۋ كومپانياسى بار.
– سەرىك يساۇلى, ومىرىڭىزدە استانانىڭ الار ورنى ەرەكشە ەكەنى بەلگىلى. ءوزىڭىز تۇرعىزعان قالانىڭ كەلەشەگىن قالاي ەلەستەتەسىز؟
– وسىنداي تاريحي جاعدايعا قاتىسىپ, ەل استاناسىنىڭ سالىنۋىنا, ونىڭ دامۋىنا ۇلەس قوسقانىم – مەن ءۇشىن ۇلكەن قۇرمەت, مارتەبە. ەڭ باستىسى, ويداعى نارسەنى قاعاز بەتىنە ءتۇسىرىپ, ونىڭ ىسكە اسىرىلۋىنا كۋا بولۋ, ارينە, ۇلكەن باقىت.
استانا – تەك مەنىڭ, تۇرعىنداردىڭ عانا ەمەس, ەلىمىزدىڭ ماقتانىشى. ءبارىمىز دە وسى ەلوردامەن ماقتانامىز. بالالىق شاعىم استانادان الپىس شاقىرىم جەردە ورنالاسقان شاعىن اۋىلدا ءوتتى. اناممەن اقمولاعا كەلگەندە, اۋىلدان شىققان اۆتوبۋس قازىرگى «پۋچا» دۇكەنىنىڭ الدىنا كەلىپ توقتايتىن. سوندا بوتەن قالادا اداسىپ كەتپەيىن دەپ, انامنىڭ ەتەگىنەن مىقتاپ تۇرىپ ۇستاپ الاتىنمىن. قازىر قاراپ وتىرسام, ول كەزدە قالا كىپ-كىشكەنتاي بولعان ەكەن-اۋ. ەندى, مىنە, الىپ استاناعا اينالعان ەلوردادان ەشقايدا كەتكىم كەلمەيدى. ءبىر جاققا شىقسام, استاناعا جەتكەنشە اسىعامىن.
الماتىدا وقىپ, ءبىلىم الىپ, جۇمىس ىستەۋ كەزىندە ءار قازاقتىڭ ارمانى بولاتىن. سول جەردە 30 جىل تۇردىم, قىزمەت ەتتىم. بىراق, قازىر الماتىعا بارسام, كوپ بولسا ءبىر-ەكى كۇن عانا بولامىن, كەيىن قايتادان وسىندا كەلگىم كەلەدى دە تۇرادى.
بۇگىنگى ەلوردامىز كەلەشەكتە جيىرما ءبىرىنشى عاسىردىڭ اۋىز تولتىرىپ ايتاتىنداي ۇلكەن قالاسى بولا بەرسىن! استانادا قىزمەت ەتۋ, استانا ءۇشىن ەڭبەك ەتۋ, استانامەن بىرگە ءوسۋ, ورلەۋ – بۇل ۇلكەن مارتەبە. سول ءۇشىن دە تاعدىرىما وتە ريزامىن.
