استانا قالاسىنىڭ №44 ورتا مەكتەبىندە «اتا-انا ۇلاعاتى – ۇرپاققا امانات» اتتى ءىس-شارا ءوتتى. بۇل يگى شارانىڭ ماقساتى – وقۋشىلارعا اتا-بابادان قالعان اسىل مۇرالاردى دارىپتەۋ, قازاقتىڭ ۇلتتىق سالت-ءداستۇرىن كورسەتۋ, ءوز ەلىنە, جەرىنە دەگەن پاتريوتتىق سەزىمىن وياتۋ, انا تىلىنە, ادەت-عۇرپىنا سۇيىسپەنشىلىكتى ارتتىرۋ. تاعىلىمدى ءىس-شارا مەكتەپتىڭ دومبىرا ءانسامبلى ورىنداعان «ەركە سىلقىم» كۇيىمەن اشىلدى.
– مەكتەپ ۇجىمى وتكىزىپ وتىرعان بۇل ءىس-شارانىڭ ماڭىزى تەرەڭدە جاتىر. عاسىرلار بويى حالقىمىزدا جيناقتالعان سالت-ءداستۇر مەن ۇلاعاتتى ونەگە – ءبىز ءۇشىن امانات. ولاي بولسا سول اماناتتى جاستارعا جەتكىزۋ, تۇيسىگىنە ءسىڭىرۋ, ۇيرەتۋ ءبىزدىڭ باستى ماقساتىمىز بولۋعا ءتيىس. مىنا ءبىر تەرەڭ ماعىنالى, ۇلاعاتى مول ءىس-شارا ءبىر مەكتەپ اياسىندا قالىپ قويماي, استانامىزدىڭ بارلىق مەكتەبىندە وتسە قۇبا-قۇپ بولار ەدى. ايتا كەتەتىن جاعداي, ارداگەرلەر ۇيىمىن جيىرما جىلدان استام ۋاقىت باسقارىپ وتىرعان قۇرمەتتى ارداگەر انامىز مايرا الىمحانقىزىنىڭ جاستارعا تاربيە بەرۋ جولىندا اتقارىپ جۇرگەن ەڭبەگى ۇشان-تەڭىز. الداعى ۋاقىتتا دا ءبىزدىڭ وسىنداي ارداقتى قاريالارىمىز جاس ۇرپاقتى تاربيەلەۋ ماسەلەلەرىنە ءجىتى ارالاسادى دەگەن زور سەنىمدەمىز, – دەدى ءىس-شاراعا قاتىسقان الماتى اۋدانى ارداگەرلەر كەڭەسىنىڭ توراعاسى مارات كارىمۇلى.
الماتى اۋدانى ارداگەرلەر كەڭەسىنىڭ اتىنان وسىنداي يگى شارا وتكىزىپ, جۇرتتى ريزا ەتكەن مەكتەپ ديرەكتورى ءلاززات قۇلتاەۆاعا العىس حات تابىستالدى.
قارت انا ەلەنا ابىشقىزى بالالارى مەن نەمەرەلەرىنىڭ وسى مەكتەپتەن ءتالىم العانىن ايتىپ, مۇعالىمدەرگە ريزاشىلىعىن ءبىلدىردى.
مەكتەپ ۇستازدارى مەن بالالاردىڭ قۋانىشى جاقسى ءان-جىرعا, نازدى بيگە ۇلاستى.
باياندى ءالپي,
الماتى اۋدانى
ارداگەرلەر كەڭەسىنىڭ مۇشەسى
