ەلوردادا تاعدىرى اۋىر بولسا دا, جىگەرى جاسىماعان, ومىرگە عاشىق ادامدار از ەمەس. سونداي بيىككە ۇمتىلعان مۇمكىندىگى شەكتەۋلى جانداردىڭ ءبىرى – رامازان ەسماعامبەتوۆ.
18 جاستاعى رامازان تۋعاننان تاعدىردىڭ سىناعىنا تاپ بولعان. ونىڭ ءتۋابىتتى دەرتى وسە كەلە ارباعا تاڭعان. الايدا جىگەرلى جىگىت بالا كۇنىنەن بىلىمگە قۇشتار بولىپ ءوستى. ع.ورمانوۆ اتىنداعى №7 مەكتەپتە ءبىلىم العان ول – بۇگىندە ل.گۋميلەۆ اتىنداعى ەۋرازيالىق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ 1 كۋرس ستۋدەنتى. قازىرگى تاڭدا «استانا اقشامى» گازەتىندە وندىرىستىك تاجىريبەدەن ءوتىپ ءجۇر.
– مەن قوستاناي وبلىسى اۋليەكول اۋىلىندا 2000 جىلدىڭ 16 جەلتوقسانىندا, تۋرا تاۋەلسىزدىك كۇنى دۇنيەگە كەلدىم. رامازان ايىندا تۋعاندىقتان, اتىمدى رامازان دەپ اكەمنىڭ ناعاشى اتاسى قالي اتام قويىپتى. ۇيدەگى ءۇش بالانىڭ ۇلكەنىمىن. وزىمنەن كەيىن جانسايا ەسىمدى 9 جاستاعى قارىنداسىم مەن الديار اتتى 6 جاسار ءىنىم بار. ولار قۇدايعا شۇكىر, شاۋىپ ءجۇر, دەنساۋلىقتارى ءدىن-امان, – دەيدى رامازان. – اكەم ەلامان تولەگەنۇلى – جەكە كاسىپكەر. ۇيالى تەلەفون جوندەۋمەن اينالىسادى. ال انام التىن سەرىكقىزى نۇرسۇلتان نازارباەۆ اتىنداعى اۋەجايدا جۇمىس ىستەيدى.
رامازان 1 جاسقا تولعان كەزىندە اتا-اناسى 2001 جىلى ەلورداعا كوشىپ كەلىپتى. باس قالاداعى «حان شاتىر» ساۋدا, ويىن-ساۋىق ورتالىعى مەن بارلىق كىتاپحانا – سۇيىكتى ورنى ەكەنىن, اسىرەسە, ۋنيۆەرسيتەتتىڭ كىتاپحاناسىندا كوپ ۋاقىتىن وتكىزەتىنىن ايتادى.
– قازىرگى ۋاقىتتا «استانا اقشامى» گازەتىندە وندىرىستىك تاجىريبەدەن ءوتىپ جاتىرمىن. جۋرناليستيكانىڭ جىلىگىن شاعىپ, مايىن ىشكەن اعالارىمىزدان وسى سالانىڭ قىر-سىرىن ۇيرەنىپ, كۇندەلىكتى جۇمىس بارىسىن كوزبەن كورىپ, كورگەنىمىزدى كوڭىلگە ءتۇيىپ جاتقان جايىمىز بار. جالپى, تاريحي تۇلعالاردى ءپىر تۇتامىن. ولاردى ءبولىپ-جارىپ قاراۋعا بولمايتىن سياقتى. ۇلىلاردىڭ ۇلاعاتتى سوزدەرىنەن قۋات الامىن. ال جۋرناليستيكادا «استانا اقشامى» گازەتىنىڭ شەف-رەداكتورى, ءوزىمنىڭ وندىرىستىك تاجىريبەدە كەزىندەگى جەتەكشىم, ۇستازىم تولەن تىلەۋبايدان ۇلگى الامىن, – دەيدى ول. – ۋاقىتىمدى بوس وتكىزگىم كەلمەيدى. مۇلدە قول قۋسىرىپ وتىرا المايمىن. قولىم قالت ەتسە, ولەڭ شىعارامىن, كىتاپ وقيمىن. تاريحي ءافسانالار مەن اڭىز اڭگىمەلەردى, رومانداردى وقىعاندى جاقسى كورەمىن. اسىرەسە, روماندارعا كوبىرەك دەن قويامىن. ەڭ اۋەلى مۇحتار اۋەزوۆتىڭ «اباي جولى» رومان-ەپوپەياسىنان باستادىم. سوڭعى وقىعان كىتابىم – ءانۋار ءالىمجانوۆتىڭ «ماحامبەتتىڭ جەبەسى» رومانى. ونى جاقىندا عانا وقىپ ءبىتىردىم.
ماحامبەت وتەمىسۇلى, اقتامبەردى جىراۋ, بۇقار جىراۋ, اقان سەرى تۋرالى جىرلارمەن سۋسىنداپ وسكەن كەيىپكەرىمىز جىراۋ بولۋعا دەگەن قۇلشىنىسى ارتىپ جۇرگەنىن ايتادى.
– بولاشاقتا ءوز ءداۋىرىمنىڭ جىراۋى بولعىم كەلەدى. سول ءۇشىن ءالسىن-ءالسىن دومبىرا شەرتۋدى دە ۇيرەنىپ ءجۇرمىن. بىراق قولىم گيپستە بولعاندىقتان, دومبىرا شەرتۋدى ۋاقىتشا توقتاتتىم. 8 جىل بۇرىن قۇلاپ, قولىمدى سىندىرىپ العانمىن. سول كەزدە سىنعان جەرىم دۇرىس بىتپەگەن ەكەن. جاقىندا وتا جاسالدى. قازىر ازداپ ءتاۋىر بولىپ قالدى, – دەيدى رامازان تاعى ءبىر سوزىندە.
جاسىنان تاعدىردىڭ سىناعىنا توتەپ بەرىپ, توزىمدىلىكتى تۋ ەتكەن جىگەرلى جىگىتتىڭ ارمان-مۇراتى ورىندالا بەرسىن دەپ تىلەدىك.
