كەشەدەن بەرى بۇقارالىق اقپارات قۇرالدارى قىزمەتكەرلەرى كۇنىنە وراي جۋرناليست قاۋىمىن قۇتتىقتاۋشىلار قاتارى تولاستار ەمەس. قالام مەن ميكروفون ۇستاعان مارتەبەلى ماماندىق يەلەرىن كاسىبي مەرەكەلەرىمەن نۇر-سۇلتان قالاسىنىڭ اكىمى التاي كولگىنوۆ تە قۇتتىقتادى.
مەملەكەت باسشىسى ق.توقاەۆتىڭ العىس حاتىن ءبىر توپ جۋرناليسكە تاپسىرعان سوڭ, ەلوردا باسشىسىنىڭ مەرەكەلىك تىلەگىن نۇر-سۇلتان قالاسى اكىمىنىڭ ورىنباسارى ماليكا بەكتۇروۆا جەتكىزدى. «سىزدەر ەلوردامىزدىڭ قوعامدىق-ساياسي جانە الەۋمەتتىك-ەكونوميكالىق دامۋىن جان-جاقتى اقپاراتتىق تۇرعىدا جاريالاپ, تۇرعىندار نازارىنا جەتكىزۋگە ەرەكشە ۇلەس قوسىپ كەلەسىزدەر. الداعى ۋاقىتتا دا ەل ومىرىندەگى ماڭىزدى جاڭالىقتاردى جاريالاپ, شىنايى اقپارات جازاتىن قالامدارىڭىز قارىمدى بولا بەرسىن» دەلىنگەن قالا اكىمىنىڭ قۇتتىقتاۋ سوزىندە.
شىن مانىندە, جۋرناليست – تالانت پەن ءبىلىمدى, اشىقتىق پەن ادالدىقتى تالاپ ەتەتىن ەرەكشە ماماندىقتىڭ يەسى. سوندىقتان دا بۇقارالىق اقپارات قۇرالدارى قىزمەتكەرلەرى قوعام مەن بيلىكتىڭ اراسىنداعى سان قىرلى بايلانىستىڭ, ىنتىماقتاستىقتىڭ دانەكەرى بولىپ تابىلادى.
جۋرناليستەر مەرەكەسىنە ارنالعان شارادا «ەلوردا اقپارات» كومپانياسى قۇرامىنداعى «استانا اقشامى», «ۆەچەرنيايا استانا» گازەتتەرى مەن «ەلوردا ينفو» سايتىنىڭ باسشىلارى مەن ۇجىمدارىنا دا ماراپات جاسالدى.
ءتول مەرەكەمىز قۇتتى بولسىن, ارىپتەستەر!
