اعىمداعى جىلى كامەلەتتىك جاسقا تولماعاندار اراسىنداعى قىلمىستىق قۇقىق بۇزۋشىلىق سانى استانا قالاسى بويىنشا 150-گە جۋىقتاعان. بۇل تۋرالى قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ باسقارما باسشىسى رۋسلان الكەنوۆ مالىمدەدى.
قر باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ رەسمي سايتىندا قۇقىق بۇزۋشىلىق كارتاسى ورنالاستىرىلعان. ونداعى مالىمەتتەرگە جۇگىنسەك, كامەلەتكە تولماعاندار اراسىنداعى قىلمىستىق قۇقىق بۇزۋشىلىق جاعىنان وڭتۇستىك قازاقستان وبلىسى كوش باستاپ تۇر ەكەن. ياعني 415 قىلمىس تىركەلگەن. جاسوسپىرىمدەر قىلمىسى بويىنشا وقو-دان كەيىنگى ورىندا شقو (274 قىلمىس) مەن الماتى وبلىسى (254 قىلمىس) تۇرعان كورىنەدى. ال ەڭ از قىلمىس تىركەلگەن ءوڭىر – پاۆلودار وبلىسى. ياعني كەرەكۋدە تىركەلگەن قىلمىس سانى 52-ءنى قۇراعان. بۇل تۇرعىدا استاناداعى جاسوسپىرىمدەر اراسىنداعى بۇزاقىلىق بويىنشا الماتى اۋدانى الدىنا قارا سالماي تۇرعان كورىنەدى. ناقتىراق ايتقاندا, جىل باسىنان بەرى الماتى اۋدانىندا 69 قىلمىستىق ءىس تىركەلسە, سارىارقا اۋدانىندا – 64, ەسىل اۋدانىندا 18 قۇقىق بۇزۋشىلىق انىقتالعان.
رۋسلان الكەنوۆتىڭ سوزىنە سۇيەنسەك, ەلورداداعى 14-15 جاستاعى بالالاردىڭ قولىمەن 25 قىلمىس جاسالسا, 16-17 جاستاعىلاردىڭ 121-ءى زاڭعا قايشى ارەكەتكە بارعان. قۇقىق بۇزعانداردىڭ 40-ى – مەكتەپ وقۋشىسى, 46-سى – كوللەدج ستۋدەنتى, 46-سى جوعارى وقۋ ورىندارىنىڭ ستۋدەنتى بولسا, قالعان 14-ءى ەش جەردە وقۋ وقىمايتىن جانە جۇمىس ىستەمەيتىن بوزبالالار مەن بويجەتكەندەر بولىپ شىققان. رەسمي دەرەكتەرگە سۇيەنسەك, قىلمىس جاساعانداردىڭ باسىم كوپشىلىگى ۇرلىق جاساۋ مەن توناۋ ءىسى بويىنشا قولعا تۇسكەن. بۇل كورسەتكىش بىلتىرعىمەن سالىستىرعاندا ەداۋىر ۇلعايعان كورىنەدى. ماسەلەن, وتكەن جىلى كامەلەتتىك جاسقا تولماعانداردىڭ ادام توناۋ قىلمىسى بويىنشا 65 رەت زاڭ بۇزۋشىلىق ورىن السا, بيىل بۇل كورسەتكىش 75-كە جەتكەن. مامانداردىڭ ايتۋىنشا, وزدەرىن «جازادان وڭاي قۇتىلامىز» دەپ ويلاعاندىقتان, جاس جەتكىنشەكتەردىڭ تەرىس جولعا ءتۇسۋى ءجيى كەزدەسەتىن سىڭايلى. سونىڭ سالدارىنان جاسوسپىرىمدەردىڭ قىلمىس جاساۋ دەڭگەيى ازايماي تۇرعانىن ايتادى ماماندار. جالپى, 2016 جىلعى ەسەپكە سايكەس, رەسپۋبليكا بويىنشا كامەلەتتىك جاسقا تولماعاندار اراسىنداعى قىلمىس دەڭگەيى سوڭعى بەس جىلدا العاش رەت وسكەنى بايقالعان. وسى رەتتە جەتكىنشەكتەر جەتەسىز كەتپەس ءۇشىن جاسوسپىرىمدەر ءتارتىبىن كۇشەيتۋ ماقساتىنداعى شارالار جۇيەلى تۇردە وتكىزىلمەك.
نۇرداۋلەت كاكىشەۆ
