استانا قالاسى اكىمدىگىنىڭ شەشىمىمەن 2016 جىلدىڭ 9 قاراشاسىندا «شاراپات» الەۋمەتتىك قىزمەت كورسەتۋ ورتالىعى» بولىپ وزگەرتىلگەن مەكەمەنىڭ ىرگەتاسى 1989 جىلى تسەلينوگراد وبلىستىق حالىق دەپۋتاتتارى كەڭەسى اتقارۋ كوميتەتىنىڭ شەشىمىمەن «تسەلينوگراد وبلىسى سوعىس جانە ەڭبەك ارداگەرلەرىنە ارنالعان ينتەرنات ءۇيى» بولىپ قۇرىلعان ەدى.
وسى مەكەمەنى 14 جىلدان بەرى تاجىريبەلى مامان كەنجەبولات باپىشەۆ باسقارىپ كەلەدى. مەكەمەدە تۇرعىنداردىڭ تۇرمىس جاعدايلارىن جاقسارتۋعا بايلانىستى اۋقىمدى ىستەر اتقارىلىپ وتىر.
مەكەمە ءوز قىزمەتىن «ارناۋلى الەۋمەتتىك قىزمەتتىڭ كەپىلدەنگەن كولەم ءتىزىمى» نەگىزىندە جانە «ستاتسيونار جاعدايىندا حالىقتى الەۋمەتتىك قورعاۋ شەڭبەرىندە ارناۋلى قىزمەت كورسەتۋ ستاندارتتارىنا» سايكەس ءجۇزەگە اسىرادى. ستاتسيونار جاعدايىنداعى اقىلى كەلىسىمشارت نەگىزىندە قارتتار مەن مۇمكىندىگى شەكتەۋلى جاقىن تۋىستارى بار, بىراق قيىن جاعدايعا دۋشار بولعان ادامدارعا ارناۋلى الەۋمەتتىك قىزمەت كورسەتەدى.
2017 جىلى ارناۋلى الەۋمەتتىك قىزمەت كورسەتۋدىڭ جاڭا تۇرلەرى ەنگىزىلدى: اقىلى نەگىزدە مۇقتاج تۇرعىندار ءۇشىن كۇندىزگى جارتىلاي ستاتسيونار اشىلدى.
بۇگىنگى تاڭدا مەكەمەدە جۇمىسپەن قامتۋ, ەڭبەك جانە الەۋمەتتىك قورعاۋ باسقارماسىنىڭ جولداۋىمەن 321 قىزمەت الۋشى تۇرادى, ونىڭ ىشىندە كۇندىزگى قىزمەت كورسەتۋ بولىمىندە – توعىز, ەكى ۇلى وتان سوعىسىنىڭ ارداگەرى, ون ءبىر ۇلى وتان سوعىسى ارداگەرىنە تەڭەستىرىلگەندەر, جيىرما جەتى تىل ەڭبەككەرى, ءتورت قۋعىن-سۇرگىن قۇربانى, ءى توپتاعى مۇگەدەكتەر – 65, ءىى توپتاعى 71 ادام بار. قىزمەت الۋشىلاردىڭ جاسى 24 جاستان باستاپ 98 جاستى قۇرايدى.
مەكەمە عيماراتى 5 بلوكتان تۇرادى, ولاردىڭ 4-ەۋى – تۇرعىنجاي, بەسىنشىسى – اكىمشىلىك, سونداي-اق اسحانا, كىر جۋاتىن بولمە, مونشا-باسسەين, راسىمدىك ءۇي, جەكە جىلىتۋ قازاندىعى, اۆتوگاراج بار. جارىق جانە جايلى بولمەلەر – 1 جانە 2 ورىندىق. ءار بولمەدە اجەتحانا, دۋش, لودجيا, تەلەديدار, توڭازىتقىش بار, ءۇي ءىشى جاعدايىنا جاقىنداتىلعان جاعداي جاسالعان. ارباداعى مۇگەدەكتەر ءۇشىن قول تىرەك قۇرالدارى جابدىقتالعان – قوسىمشا تەحنيكالىق قۇرالدار, قوزعالۋ قىزمەتى بۇزىلعان مۇگەدەكتەر ءۇشىن ليفتىلەر مەن پاندۋستار قاراستىرىلعان. كەرەكتى مۇقاممالمەن جابدىقتالعان الەۋمەتتىك-تۇرمىستىق ءبولمەلەر جۇمىس ىستەيدى – مۇندا ەلەكتر پليتاسى, تەلەديدار, اس ءۇي گارنيتۋرى, ىدىس-اياق بارشىلىق. بۇل بولمەلەردە تەلەفون ورناتىلعان, قىزمەت الۋشىلار كەز كەلگەن كەزدە تۋىس-جاقىندارىمەن حابارلاسا الادى جانە كەرەك جاعدايدا ىشكى بايلانىستى پايدالانادى.
قازىرگى مەكەمەنىڭ قۇرىلىمى الەۋمەتتىك-تۇرمىستىق جانە مەديتسينالىق قىزمەت كورسەتۋگە, الەۋمەتتىك-وڭالتۋ ءىس-شارالارىن كەشەندى تۇردە جۇزەگە اسىرۋعا مۇمكىندىك بەرەدى.
الەۋمەتتىك-مەديتسينالىق كومەك امبۋلاتورلىق-ەمحانالىق كولەمىندە زاماناۋي اپپاراتۋرامەن جابدىقتالعان.
2011 جىلدان باستاپ قارسى كورسەتكىشتەرى جوق بارلىق تىلەك بىلدىرگەندەر ءۇشىن باسسەيندە ءجۇزۋ ساباقتارى ەنگىزىلدى. مۇگەدەكتەردى وڭالتۋ جوسپارىنا «تۇلپار» ات-سپورت كەشەنىندە جۇرگىزىلەتىن يپپوتەراپيا ساباقتارى ەنگىزىلگەن.
الەۋمەتتىك-پسيحولوگيالىق قىزمەت كورسەتۋ جانە پسيحوەموتسيونالدىق تۇراقتىلىقتى قولداۋ مەن رەلاكساتسيا ماقساتىندا سەنسورلىق بولمە, قۇم جانە يونوتەراپيا بولمەلەرى جۇمىس ىستەيدى. قازاقستانداعى الەۋمەتتىك سالادا 2004 جىلى مۇندا العاشقى پەداگوگ-پسيحولوگ ماماندىعى ەنگىزىلدى.
قىزمەت الۋشىلار قاتىساتىن «حالىقتىڭ قولدانبالى شىعارماشىلىعى», «شەبەر قولدار», «كوركەم سۋرەت سالۋ» ۇيىرمەلەرى, تىگىن تسەحى جۇمىس ىستەيدى. دارىگەردىڭ قورىتىندىسى بويىنشا قىزمەت الۋشىلار تىگىن تسەحىندا, اياق كيىم جوندەۋ شەبەرحاناسىندا تولىق ەمەس جۇمىس كۇنى تارتىبىندە ەڭبەك ەتەدى.
تۇرمىستىق-مادەني ءىس-شارالار وتكىزۋ ءۇشىن 250 ورىندىق ونلاين رەجيمىندە فيلمدەردى كورۋگە ارنالعان, ساندىق كينوپروەكتورمەن جابدىقتالعان كينوزال بار, ادەبي قوردا 6 مىڭنان استام كىتابى بار كىتاپحانا جانە «ءتىرى جاندىلار بۇرىشى» – اكۆاريۋم بار. سپورتتىق كلۋب ءوز جۇمىسىن جاسايدى, مۇندا شاحمات ءۇستەلى, تەننيس ۇستەلى جانە بيليارد بار.
ءارتۇرلى باعىتتار بويىنشا ىنتىماقتاستىق تۋرالى مەكەمە مەن وقۋ ورىندارى اراسىنداعى مەموراندۋمدارعا قول قويىلعان. 2009 جىلدان باستاپ «نۇر وتان» پارتياسىنىڭ باستاۋىش ۇيىمى قۇرىلىپ, 55 ادام پارتيا قۇرامىنا مۇشە بولدى. شارالار كەشەنى «ارداگەرلەردى ارداقتايىق» پارتيالىق جوباسى اياسىندا وتەدى.
2017 جىلدىڭ 1 تامىزىندا ەگدە جاستاعى ادامدار مەن ءى, ءىى توپتاعى مۇگەدەكتەرگە ارنالعان كۇندىزگى قىزمەت كورسەتۋ ءبولىمى اشىلدى. الەۋمەتتىك سالانى مودەرنيزاتسيالاۋ ماقساتىندا استانا قالاسىنىڭ جۇمىسپەن قامتۋ, ەڭبەك, الەۋمەتتىك قورعاۋ باسقارماسى 2017 جىلدىڭ 14 تامىزىندا ەكى ۆەدومستۆولىق مەكەمەلەرمەن بىرىگىپ, ياعني استانا قالاسى اكىمدىگىنىڭ «شاراپات» الەۋمەتتىك قىزمەت كورسەتۋ ورتالىعى جانە «الەۋمەتتىك قىزمەت كورسەتۋ ورتالىعى» مكقك قالا تۇرعىندارىنا ارنالعان رەابيليتاتسيالىق ءبولىم اشىلدى, سالالىق ماماندار جانە دارىگەرلەردىڭ قاراۋىنان كەيىن «الەۋمەتتىك قىزمەت كورسەتۋ ورتالىعى» مكقك قىزمەت الۋشىلارى جىل ىشىندە مىناداي پروتسەدۋرالارمەن قامتىلادى: ماسساج, لفك, گيدروتەراپيا, فيزيوتەراپيا, سونىمەن قاتار سەنسورلىق بولمە, قۇم تەراپياسى, مادەني ءىس-شارالاردى جانە سپورت شارالارىنا قاتىسا الادى.
ۇجىمنىڭ باستى جانە نەگىزگى ماقساتى استانانىڭ مۇقتاج ازاماتتارىنا ساپالى ارناۋلى الەۋمەتتىك قىزمەت كورسەتۋ بولىپ تابىلادى.
ەركىن داۋەشۇلى, قازاقستان جۋرناليستەر وداعىنىڭ مۇشەسى
