ەلورداداعى «جاستار» سارايىندا بوس ورىندار جارمەڭكەسى ۇيىمداستىرىلىپ, وندا كەلۋشىلەردىڭ 1700-گە جۋىعى جۇمىسپەن قامتىلاتىن بولدى.
تامىز ايىندا وسىمەن ءۇشىنشى رەت وتكەن بۇل شاراعا باس قالاداعى جۇمىسسىز ازاماتتار مەن پروباتسيا قىزمەتىنىڭ ەسەبىندە تۇرعان, باس بوستاندىعىنان ايىرۋ ورىندارىنان بوساتىلعان ادامدار جانە اليمەنت بويىنشا بورىشكەرلەر قاتىستى. ءىس-شارانىڭ باستى ماقساتى – جۇمىس بەرۋشىلەر مەن جۇمىسسىز ازاماتتاردىڭ كەزدەسۋىن ۇيىمداستىرۋ ارقىلى جۇمىس بەرۋشىلەر مالىمدەگەن ازاماتتاردى بوس ورىندارعا جۇمىسقا ورنالاستىرۋ جانە ەڭبەك نارىعىندا سۇرانىسقا يە ماماندىقتاردى ناسيحاتتاۋ.
بوس ورىندار جارمەڭكەسىنە 400-گە جۋىق جۇمىس ىزدەۋشى جانە 60-تان استام جۇمىس بەرۋشى قاتىسىپ, سوڭعىلارى العاشقىلارىنا ءتۇرلى باعىتتار بويىنشا 1700-گە جۋىق بوس جۇمىس ورنىن ۇسىندى. ونىڭ ىشىندە «ROYAL CARS ASTANA» جشس, «Hilton Astana» قوناق ءۇيى, «ARENA S» جشس جانە وزگەلەرى سياقتى ەلوردانىڭ جەتەكشى كاسىپورىندارى بار. سونداي-اق, 9 جۇمىس بەرۋشى پروباتسيا قىزمەتىنىڭ ەسەبىندە تۇرعان جانە باس بوستاندىعىنان ايىرۋ ورىندارىنان بوساتىلعان ادامداردى جۇمىسقا ورنالاستىرۋ ءۇشىن 170-تەن استام بوس جۇمىس ورنىن ۇسىندى.
جارمەڭكەنىڭ العاشقى ساعاتىندا 100-دەن استام ادام كەلدى. سولاردىڭ ءبىرى – ەلوردالىق اسحات ايدىنوۆ. ول ءوزىنىڭ اسپازشى ماماندىعى بويىنشا جۇمىس ىزدەپ كەلدى. مۇندا جۇمىس بەرۋشىلەرمەن تىكەلەي سويلەسىپ, بىردەن بىرنەشە ۇيىمعا سۇحباتتاسۋعا شاقىرۋ الدى.
«قازىر جۇمىسسىز ازامات رەتىندە قالالىق جۇمىسپەن قامتۋ ورتالىعىندا تىركەلىپ تۇرمىن. ورتاق چاتىمىز بار, سوندا ۇنەمى حابارلاما كەلىپ تۇرادى. بوس ورىندار جارمەڭكەسىنىڭ وتكىزىلەتىنى تۋرالى دا وسى جەردەن وقىپ, كەلدىم. ارينە, مۇنداي شارالاردىڭ ءجيى ۇيىمداستىرىلىپ تۇرعانى جاقسى. ماماندىعىم بويىنشا جۇمىس ىزدەگەنمىن. ازىرگە 5-6 جۇمىس بەرۋشىلەرمەن سويلەستىم. ۇسىنىلعان جالاقى مولشەرى كوڭىلىمنەن شىعىپ تۇر, 300 مىڭ تەڭگەگە دەيىن بارادى, سولاردىڭ ءبىرىن تاڭداپ, جاقىن كۇندە جۇمىسقا شىعاتىن بولامىن, – دەدى ا.ايدىنوۆ.
جارمەڭكەگە نۇر-سۇلتان قالاسى پروكۋراتۋراسىنىڭ, جۇمىسپەن قامتۋ جانە الەۋمەتتىك قورعاۋ باسقارماسىنىڭ, ادىلەت دەپارتامەنتىنىڭ جانە قىلمىستىق-اتقارۋ جۇيەسى دەپارتامەنتىنىڭ وكىلدەرى قاتىستى.
– ءبىز اقپان ايىنان بەرى باس-اياعى 49 جارمەڭكە وتكىزدىك. ازاماتتاردىڭ جەكەلەگەن ساناتتارى ءۇشىن شاعىن جارمەڭكەلەر وتكىزۋگە تىرىسامىز. بىزدە قالا اكىمدىگىنىڭ قاۋلىسى بار, وندا مۇگەدەكتىگى بار ادامدار ءۇشىن, باس بوستاندىعىنان ايىرۋ ورىندارىنان بوساتىلعاندار ءۇشىن, پروباتسيا قىزمەتىندە ەسەپتە تۇرعان ادامدار ءۇشىن جۇمىس ورىندارىنا كۆوتا بەلگىلەنگەن. سوندىقتان, جۇمىس ىزدەپ كەلگەندەردى كۆوتا اياسىندا جۇمىسقا ورنالاستىرۋعا تىرىسامىز, – دەدى نۇر-سۇلتان قالاسى اكىمدىگىنىڭ جۇمىسپەن قامتۋ ورتالىعىنىڭ ورىنباسارى تالعات ەسىموۆ.
مۇندا كەلۋشىلەر جۇمىس بەرۋشىلەرمەن تىكەلەي سويلەسىپ, جۇمىسپەن قامتۋ ورتالىعىنىڭ ماماندارىنان وزدەرىن قىزىقتىراتىن ماسەلەلەر بويىنشا كەڭەستەر الدى. جۇمىسپەن قامتۋ جانە الەۋمەتتىك باعدارلامالار باسقارماسىنىڭ جۇمىس بەرۋشىلەرمەن ءوزارا بايلانىس جاساۋ ءبولىمىنىڭ باسشىسى باقىت راكيشەۆانىڭ ايتۋىنشا, جىل سوڭىنا دەيىن نۇر-سۇلتاندا 28 مىڭ جاڭا جۇمىس ورنى اشىلىپ, وسىعان ۇقساس 7 ءىس-شارا ۇيىمداستىرىلادى.
گۇلبارشىن وكەشقىزى
