جۋىردا نۇر-سۇلتان قالاسىندا بالالار جىلىنا وراي بالالاردىڭ شىعارماشىلىعى كورمەسى ءوتتى. وندا 2 جاستاعى سابيدەن باستاپ كوللەدج ستۋدەنتىنە دەيىن قولىمەن جاسالعان دۇنيەلەر قويىلدى.
2 جاستاعى ءسابي مىنا سۋرەتتەگى جاپىراقتاردى ءوز قولىمەن جاساعان, ال شىرشانى 3 جاستاعى ءبۇلدىرشىن جاساعان, پلاستيلينمەن جۇمىس ىستەگەن 4 جاستاعى بالا. دايارلىق توبىنداعى بالالار پىشىندەردى (فيگۋرالار) پەداگوگتارمەن بىرلەسىپ جاسايدى. مۇنداي دەكوراتسيالار بارلىق بالاباقشالاردا بار, وسى جۇمىستاردىڭ نەگىزىندە مۋلتيپليكاتسيالىق دۇنيەلەر جاساۋعا ابدەن بولادى.
«وسىنداي دەكوراتسيا مەن مونتاجداۋ نەگىزىندە بالالاردىڭ وزدەرىنىڭ ويلاپ تاپقان ەرتەگىلەرىن ءتۇسىرىپ, پەداگوگتار ەكرانعا شىعارىپ, بىرگە تاماشالايدى, بالالار ءوزى جاساعان دۇنيەلەرىنىڭ مۋلتيپليكاتسيالىق ونىمگە اينالعانىن ەكراننان كورىپ ءماز بولادى, ياعني ەڭبەگىنىڭ جەمىسىن وسىلايشا كورۋ ارقىلى موتيۆاتسيا الادى» دەيدى №84 بالاباقشانىڭ مەڭگەرۋشىسى بالاۋسا تولەۋعاليقىزى.
پەداگوگتار وزدەرىنىڭ شىعارماشىلىق جۇمىسىن قالالىق, رەسپۋبليكالىق دەڭگەيدە قورعايدى, بالاعا دا وتە پايدالى, تۇلعالىق وسۋىنە كومەكتەسەدى, ءارى جەتىستىكتەرىمەن اتا-اناسىن دا قۋانتا تۇسەدى.
2012 جىلدان بەرى بالاباقشانىڭ ءۇش تىلدە «ساياباققا ساياحات», «كىرپىنىڭ ورمانعا ورالۋى» ەرتەگى مەن مۋلتيپليكاتسيالىق ءفيلمى جارىق كوردى. بۇل ەرتەگىلەر – بالانى تابيعاتتى ايالاۋعا, قورشاعان ورتاعا قامقور بولۋعا ۇندەيتىن, بالانىڭ وي-ءورىسىن دامىتاتىن ادىستەمەلىك كەشەن.
ەرتەگى – ءارى تاربيەلىك, ءارى كوركەم-ەستەتيكالىق عاجايىپقا تولى, بالا تىلىنە جاتىق, ءسابيدىڭ جۇرەگىنە جول تاۋىپ, بالانى ويلاندىراتىن تۋىندى. سونداي-اق ول ەرتەگىنىڭ مازمۇنىن بايىتىپ, بالانىڭ ەستە ساقتاۋ قابىلەتىن دامىتا تۇسەدى.
جالپى, مۋلتيپليكاتسيالىق ءفيلمدى شىعارۋ كەزەڭدەرى بىرنەشە كەزەڭنەن تۇرادى. بۇل بالالاردىڭ شىعارماشىلىق قابىلەتىن, كرەاتيۆتى ويلاۋ تاكتيكاسىن, كوماندالىق جۇمىس ناتيجەسىن كورۋ, قازىرگى زامان تالابىنا ساي داعدىلارىن قالىپتاستىرۋ جانە ءوز ارەكەتىن باسقارا بىلۋگە باۋلۋ: بالالار سيۋجەت ويلاپ تاۋىپ, اڭگىمە قۇراستىرادى, قۇراستىرىلعان سيۋجەت بويىنشا ماتەريالدار دايارلايدى, سيۋجەت جەلىسىمەن مۋلتفيلم تۇسىرىلەدى.
وسى كورمەدە كونفەرەنتسيا قاتىسۋشىلارى ب.قايىرعاليەۆانىڭ اۆتورلىق جۇمىسىمەن تانىسىپ, شەبەرلىك ساباقتى تاماشالادى.
– كورمەدە ءجاسوسپىرىم بالالاردىڭ, كوللەدج ستۋدەنتتەرىنىڭ وزدەرى جاساعان بۇيىمدارى قويىلدى. قوعامدىق تاماقتاندىرۋ جانە سەرۆيز كوللەدجى مۇندا كيىمدەردى تىگۋ جانە ۇلگىلەۋ دەگەن ماماندىق بار, سول بويىنشا تەحنولوگ كۆاليفيكاتسياسىنا وقيدى جاستار, زاكرۋجكا مودەلەر ماماندىعى بار. بيىلدان باستاپ ينكليۋزيۆتى ءبىلىم بەرۋدى قولعا الىپ وتىرمىز, – دەدى كوللەدجدىڭ وندىرىستىك شەبەرى نۇرسۇلۋ ماتوۆا.
ال ورتا ارناۋلى وقۋ ورىندارىندا ەلەكتر جۇيەسىنە قاتىستى تەحنيك-ەلەكتريك ماماندىقتارىنا قاتىستى وندىرىستىك وقۋ-جاتتىعۋ پوليگوندارىنىڭ ۇلگىلىك ماكەتتەرىن كورمەگە قويعان «ENERGY EXPERT» كومپانياسى مىنا پروبلەمالارعا نازار اۋدارادى: تەحنيكالىق كوللەدجدەر مەن ۋنيۆەرسيتەتتەر ستۋدەنتتەرىنىڭ وندىرىستىك پراكتيكاسى جەتكىلىكسىز, سالالىق ۇيىمداردا وندىرىستەگى قاۋىپسىزدىككە كەپىلدىك جوق, ۇيىمداردىڭ تاجىريبەسىز قىزمەتكەر ءۇشىن جاۋاپكەرشىلىكتى العىسى كەلمەۋى جانە ت.ب. جاعدايلاردىڭ بولۋى سەبەپتى وندىرىستىك پراكتيكادان ءوتۋ ءۇشىن ناقتى جاعدايلارعا بارىنشا جاقىنداتىلعان وندىرىستىك جابدىقتارى بار وقۋ پوليگونىن قۇرۋدى ۇسىنادى.
«بۇل تەحنيكالىق ماماندىقتاعى ستۋدەنتتەردىڭ قاۋىپسىزدىگىنە, وندىرىستىك پراكتيكادان, عىلىمي جۇمىستار مەن تاجىريبەدەن, سىناقتاردان الاڭسىز وتۋىنە جاعداي جاسايدى. ونىڭ ىشىندە جاسىل ەنەرگەتيكا بويىنشا جەل, كۇن جانە سۋ ەنەرگياسى سەكىلدى جاڭارتىلاتىن كوزدەردى پايدالانادى» دەيدى كومپانيا ەكسپەرتى ولجاس تۇرمانوۆ.
نۇر-سۇلتان قالاسىنداعى سەرۆيس جانە تۋريزم كوللەدجى دە ستۋدەنتتەرىنىڭ دايىنداعان تاعامدارى مەن سۋسىندارىن كەلۋشىلەرگە ۇسىندى.
«Astana Polytechnic» جوعارى كوللەدجى كورمەدە كەلۋشىلەرگە «اقىلدى ءۇي» جوباسىن ۇسىندى.
– بۇل «جاس مامان» جوباسى بويىنشا وقۋ ورىندارىن ماتەريالدىق تەحنيكامەن جابدىقتاۋعا بايلانىستى جۇرگىزىلگەن جۇمىس ەكەنىن اتاپ وتكەن ءجون. روبوتوتەحنيكا, مەحاترونيكا, ۇشىرىلاتىن كۆادروكوپتەرلەر دە بار, – دەدى وندىرىستىك وقىتۋ شەبەرى ساعىندىق جانتاەۆ.
«جاس مامان» جوباسىنىڭ ارتىقشىلىعى – ەڭ قاجەتتى ماماندىقتارعا باسىمدىق بەرىلۋى. ياعني قازىرگى سۇرانىستاعى ماماندىقتاردى ساپالى ەتىپ شىعارۋعا كۇش جۇمسالاتىن بولادى.
بالالار ەڭبەك ارقىلى, وزدەرىن تاربيەلەيدى, ويتكەنى توزىمدىلىككە, شىعارماشىلىققا ۇيرەنەدى. وسى رەتتە قالامىزدا قوسىمشا ءبىلىم الاتىن بالالاردىڭ شىعارماشىلىعىن دامىتۋعا بارلىق جاعداي جاسالعانىن, وقۋشىلار سارايىندا كوپتەگەن جەڭىلدىكتەر دە قاراستىرىلعانىن ايتۋىمىز قاجەت. كوپبالالى, از قامتىلعان ت.ب. وتباسىلار بالالارىن تەگىن وقىتا الادى. وقۋشىلار سارايى تەك نۇر-سۇلتان قالاسىنىڭ بالالارى ءۇشىن عانا ەمەس, قازاقستاننىڭ بارلىق بالالارىنىڭ شىعارماشىلىق قابىلەتتەرىن شىڭداۋعا جول اشۋدا.
بۇل كورمەلەردەن بالالار عانا ەمەس, پەداگوگتار دە وزىنە قاجەتتىسىن الادى. العان تاجىريبەسىن, ۇيرەنگەنىن, تۇيگەندەرىن وزدەرىنىڭ شاكىرتتەرىنىڭ بويىنا سىڭىرەدى. ونەردە, بىلىمدە توقتاپ قالماۋ كەرەك, وزگەرىستەردەن قورىقپاعان دۇرىس. بولاشاعىمىز جارقىن بولىپ, وسى بالالاردىڭ, جاستاردىڭ وسكەنىن قالايمىز.
گۇلشات ساپارقىزى
