«قۋان, ءسابي!» رەسپۋبليكالىق اكتسيا اياسىندا استانا قالاسىنداعى بالالار ۇيىندە «جۇرەگىمنىڭ جىلۋى» اتتى مەرەكەلىك كەش ءوتتى. وعان مەكەمە قىزمەتكەرلەرى مەن تاربيەلەنۋشىلەر, استانا قالاسى اكىمدىگىنىڭ, قۇزىرلى ورگاننىڭ وكىلدەرى جانە بالا اسىراپ الۋشى وتباسىلار مەن قامقور انالار قاتىستى.
بالانىڭ جانۇيادا ءومىر ءسۇرۋ قۇقىعىن ىسكە اسىرۋ, جەتىمدىك ماسەلەلەرىنە قوعامنىڭ كوڭىلىن اۋدارۋ, بالانى وتباسىعا ۇيرەتۋدىڭ ءارتۇرلى جولدارىن ناسيحاتتاۋ ماقساتىندا ۇيىمداستىرىلعان باسقوسۋعا قاتىسۋشىلاردى ءتاربيەلەنۋشىلەرمەن بىرگە, «ادىرنا» حالىق اسپاپتار وركەسترى قارسى الدى. قوناقتار بالالار ۇيىندە ريزاشىلىق باعىن, سەنسورلىق, پسيحولوگيالىق قىزمەت, حالىق اسپاپتارى وركەسترى بولمەلەرىن ارالاپ, بالالاردىڭ شىعارماشىلىق جۇمىستارىنىڭ كورمەسىن تاماشالادى. سونىمەن قاتار, «ءبىز – سپورتتىق جانۇيا» اتتى سپورتتىق شاراسىن, «ونەر» بەينەلەۋ ستۋدياسىن كوردى. «ميراس» جانۇياسىنىڭ تۇرعىن-جايىمەن تانىستى. سودان كەيىن ەستەلىك ءۇشىن فوتوعا ءتۇسىپ, ونەرلى جەتكىنشەكتەردىڭ ءان-جىرىنا قوشەمەت ءبىلدىردى.
«وسىنداي باسقوسۋلاردى ءجيى ۇيىمداستىرعانىمىز جاقسى. ءويتكەنى قامكوڭىل بالالار كادىمگىدەي جادىراپ, قۋانىپ قالادى. ولار وزدەرىنە قوعامنىڭ نازار اۋدارعانىن قالايدى. قولدارىنان كەلەتىن دۇنيەلەرىنە باعا بەرسە ەكەن دەيدى. مىنە, بۇل شارانى ۇيىمداستىرۋداعى ماقساتىمىز دا سول, بالالاردىڭ ونەرىن باسقالارعا پاش ەتۋ» دەيدى بالالار ءۇيى ديرەكتورىنىڭ ورىنباسارى دينارا ورازباەۆا.
اسحات رايقۇل
