بەرىك جولداسبەكوۆ, استانا قالاسى ءىىد اكىمشىلىك پوليتسيا باسقارماسى جول جانە تەحنيكالىق ينسپەكتسيا ءبولىمىنىڭ باسشىسى: جاياۋ جۇرگىنشىلەر جولىنا قاداعالاۋ كۇشەيەدى
– بەرىك اللابەرگەنۇلى, ەلوردادا قانشا جاياۋ جۇرگىنشى جولى بار جانە ولاردىڭ ءبارىن قاۋىپسىز دەپ ايتۋعا بولا ما؟
– باس قالادا 500-دەن استام جاياۋ جۇرگىنشى جولى بار. ولاردىڭ 30%-ى جىلدامدىق ولشەۋىش قۇرىلعىسىمەن جابدىقتالعان. جىل سايىن اكىمدىككە ۇسىنىس بەرە وتىرىپ, قالعان جۇرگىنشىلەر جولىن دا قاجەتتى جابدىقپەن قامتاماسىز ەتۋ جوسپاردا بار.
– اباي كوشەسىندەگى جاياۋ جۇرگىنشىلەر جولى نەگە الىنىپ تاستالدى؟
– تەك اباي كوشەسى ەمەس, قالاداعى رەتتەلمەيتىن قيىلىستاعى ءۇش جاياۋ جۇرگىنشىلەر وتكەلى الىنىپ تاستالدى. ناقتى ايتسام, رەسپۋبليكا داڭعىلىندا جاستار سارايىنا قارسى, تۇران داڭعىلىندا «دۋمان» ويىن-ساۋىق ورتالىعىنا قارسى جانە قالالىق اكىمدىكتىڭ جانىندا اباي داڭعىلىندا ورنالاسقان وتكەلدەر. ونىڭ ۇستىنە اتالمىش جولدار باعدارشام نىساندارىنىڭ جانىندا ورنالاسقان. اپاتتىق جاعدايلاردى بولدىرماس ءۇشىن جانە جاياۋ جۇرگىنشىلەردى قاعىپ كەتۋ سياقتى جول قوزعالىسى ەرەجەلەرىن بۇزۋدىڭ الدىن الۋ ماقساتىندا وسىنداي شەشىم شىعاردىق. جالپى, وسى ۋاقىتقا دەيىن اتالمىش ورىندارعا جەراستى جولى نەمەسە باعدارشام ورناتۋ تۋرالى جولاۋشىلار كولىگى باسقارماسىنا ۇسىنىس جولداعان ەدىك. بىراق بەلگىلى سەبەپتەرگە بايلانىستى ورناتۋ مۇمكىن بولمادى. التى جولاقتى ۇلكەن جول بولعاندىقتان, وندا اپاتتىق جاعداي ءجيى تىركەلەدى. سول سەبەپتى رەتتەلمەيتىن ءۇش جاياۋ جۇرگىنشى جولىن قولدانىستان شىعاردىق. ويتكەنى ءبىز ءۇشىن تۇرعىنداردىڭ قاۋىپسىزدىگى ماڭىزدى. قازىرگى كەزدە تالداۋ جۇرگىزىپ, قالانىڭ باسقا ۋچاسكەلەرىن دە زەرتتەپ جاتىرمىز. بۇدان بىلاي باعدارشام نىساندارىنىڭ جانىندا ورنالاسقان جاياۋ جۇرگىنشىلەر وتكەلىندە جول-كولىك وقيعاسى ءجيى انىقتالعان جاعدايدا, ولار الىنىپ تاستالادى.
– بالالاردىڭ قاتىسۋىمەن جاياۋ جۇرگىنشىلەر جولىندا جول-كولىك وقيعالارى ءجيى ءتىركەلەدى. وسى رەتتە مەكتەپتەر مەن بالاباقشالار ورنالاسقان كوشەلەر قاجەتتى جول بەلگىلەرمەن قامتاماسىز ەتىلگەن بە؟
– جاڭا وقۋ جىلى باستالار تۇستا, ءبىلىم باسقارماسىمەن بىرلەسە وتىرىپ, بارلىق ءبىلىم بەرۋ ۇيىمدارىنا تالداۋ ءجۇرگىزەمىز. بيىل تامىز ايىندا ارنايى تەكسەرىس جۇرگىزىلدى. جاڭادان اشىلعان مەكتەپتەر مەن باسقا دا ءبىلىم بەرۋ مەكەمەلەرى ماڭايىنا قاجەتتى جول بەلگىلەرى ورناتىلدى.
– ەلوردادا تاجىريبە رەتىندە سارى جولاقتى جول پايدا بولعانىن بىلەمىز. جاقسى ناتيجە بار ما؟
– بالالار اراسىنداعى جول-كولىك وقيعالارىنان جاراقات الۋدى ازايتۋ ماقساتىندا جاياۋ جۇرگىنشىلەر جولاعىنا قانىق سارى ءتۇس قوسىلدى. ول «بايقا, بالاقاي!» جەدەل الدىن الۋ شاراسى اياسىندا جۇزەگە اسىرىلدى. ناتيجەسى جامان ەمەس.
جالپى, اشىق ءتۇستى كيىم كيگەن جاياۋ ادامدى جۇرگىزۋشىلەر 150 مەتر قاشىقتىقتان كورەدى. بۇل جوبا م. وتەمىسۇلى اتىنداعى وقۋشىلار سارايى ماڭايىنداعى ءا. بوكەيحان كوشەسىنىڭ تۇسىندا ەنگىزىلدى. بۇل ءوز كەزەگىندە جاياۋ جۇرگىنشىلەر جولىندا بولاتىن اپاتتى ازايتۋعا سەپتىگىن تيگىزەتىنى ءسوزسىز.
مۇنداي جول بەلگىلەر الداعى ۋاقىتتا بالالار كوپ جۇرەتىن ماڭايعا, مەكتەپتەردىڭ, بالاباقشالاردىڭ جانىنا دا ورناتىلاتىن بولادى.
اڭگىمەلەسكەن:
گۇلميرا ايماعانبەت