«استانا – قاۋىپسىز قالا» دەپ ءجيى ۇرانداتامىز. ال سول قاۋىپسىزدىك قالاي ساقتالادى؟ وسىنى ءبىلمەك نيەتپەن پوليتسيامەن بىرگە تۇنگى قالانى بارلاۋعا شىقتىق.
«يرگيز» ءاۆتوپاترۋلى جارادى
ءبىزدى استانا قالاسى ءىىد جول-پاترۋلدىك پوليتسيا پولكىنىڭ №3 روتا كومانديرى ساكەن شاحاروۆ قارسى الدى.
ەلوردانىڭ تۇنگى تورۋىلىنا 46 اۆتوپاترۋل, ياعني 92 ءتارتىپ ساقشىسى شىعادى ەكەن. ولار جول قاۋىپسىزدىگىن عانا ەمەس, قوعامدىق تىنىشتىقتى دا قاداعالايدى. ءتىپتى, وقيعا ورنىنا شۇعىل جەتىپ, قىلمىستىڭ بەتىن ءبىرىنشى اشاتىن دا – جول-پاترۋلدىك پوليتسيا قىزمەتكەرلەرى. روتا كومانديرى ءفوتوتىلشى ەكەۋمىزدى پولك «ەڭ-ەڭ» دەپ ماقتان تۇتاتىن جىگىتتەردىڭ پاترۋل ەكيپاجدارىنا قوسىپ بەرەتىن بولدى.
نەگىزى جۇمىس كۇندەرى قالا تىنىش. «قىزىقتىڭ كوكەسى» جۇما, سەنبى, جەكسەنبىدە بولادى دەيدى پوگون تاققان مىرزالار. دەسەك تە, پوليتسيامەن ەرگەن ءبىر ءتۇننىڭ ىشىندە ناعىز ەكشن-فيلم كورگەندەي اسەر الدىق…
تاۋەلسىزدىك داڭعىلى بويىمەن قوزعالىپ كەلە جاتقانبىز. جولدىڭ قارسى بەتىندە جول-كولىك وقيعاسى ورىن الىپتى. ەكيپاجىمىز دەرەۋ سوندا بۇرىلدى. اق ءتۇستى «Honda accent» جۇرگىزۋشىسى شاماسى 30-35 جاستاعى ەر كىسىنى قاعىپ كەتىپتى.
ەۋروپالىق ناسىلدەگى ءجابىرلەنۋشى ەس-ءتۇسسىز قانسىراپ جاتىر. جەدەل جاردەم جەتىپ ۇلگەرگەن ەكەن, ىلە-شالا العاشقى مەديتسينالىق كومەك كورسەتۋدە. باقىتىمىزعا وراي, ادام ءتىرى ەكەن, تەك ازداعان جاراقات الىپتى.
جۇرگىزۋشى شوكتان ابدىراپ قالعان. «ويدا-جوقتا الدىمنان جۇگىرىپ شىقتى. توقتاپ ۇلگەرمەدىم» دەيدى. كۋاگەرلەر كورگەندەرىن جاسىرمادى. سويتسە, ماشينا استىنا تۇسكەن ادام ماس كۇيىندە بەلگىلەنبەگەن جەردەن جۇگىرىپ وتپەك بولعان. دارىگەرلەر دە وقيعا الدىندا ونىڭ اراققا سىلقيا تويىپ العانىن راستادى.
پوليتسيا قىزمەتكەرلەرى «كىنالى جاقتى كەسىپ ايتۋ ەرتە» دەيدى. بۇل كوشەدە بەينەباقىلاۋ جوق. وقيعانىڭ ارا-جىگىن اجىراتۋدىڭ ءوز امالى بار. روتا كومانديرى اۆتوكولىك دوڭگەلەكتەرىنىڭ تۇسىن, ادامنىڭ جۇگىرىپ شىققان جەرى مەن ۇشىپ تۇسكەن ورنىن اق بوياۋمەن بەلگىلەپ شىقتى. ەندى ءىستى كەلىپ جەتكەن كەزەكشى ءبولىمنىڭ جىلجىمالى پوليتسيا توبىنا تاپسىردى.
ولار كولىكتىڭ قوزعالىس باعىتىن, جاڭاعى بەلگىلەر بويىنشا ماشينانىڭ جىلدامدىعىن انىقتاپ, جازبالاردى تىركەيدى. وقيعا ورنىنداعى ادامداردى پوليتسيا بولىمشەسىنە جەتكىزەدى. ودان كەيىنگى شارالار لەگى رەت-رەتىمەن جۇرەدى. كىنالىلەر مەن ولاردىڭ جازاسى سوت شەشىمىمەن انىقتالادى.
«يرگيز-71» ەكيپاجىنا اۋىسقان ءبىز ارى قاراي كەتتىك.
ءۇش ۇرىنى ءۇش مينۋتتا ۇستادى
– تاپسىرما العان بويدا مەجەلەنگەن جەرگە ەڭ ۇزاعى – 7 مينۋتتا جەتۋىمىز كەرەك. شۇعىل شاقىرتۋلار ءۇستى-ۇستىنە ءتۇسىپ, بۇل ۋاقىتتان كەشىگەتىن كەزدەر دە بولىپ قالادى. رۇقسات ەتىلگەن ماكسيمالدى جىلدامدىعىمىز – ساعاتىنا 120 شاقىرىم. قىلمىسكەرلەر جانتالاسا قاشقان كەزدە جەلدەي ۇيىتقىپ قۋا جونەلەمىز. نەگىزى ءبىزدىڭ جۇمىس كينو عوي! جوق, كينونى ءبىزدىڭ جۇمىسقا قاراپ تۇسىرەدى, – دەپ ءازىل-شىنى ارالاس اڭگىمەلەدى پوليتسيا اعا لەيتەنانتى ابىلسەيىت ءابدىمالىكوۆ. وسى كەزدە راتسيادان حابار بەرىلدى:
– «شىمكەنت» ءدامحاناسىنىڭ الدىندا كىسى تونالدى. الىستان كوردىك. قاشقان ەكەۋى سۇر ءتۇستى «Audi 80»-گە وتىردى. «تۇلپاردىڭ» ارتىنا بۇرىلدى. سەيفۋللين-ءۋاليحانوۆ كوشەسىندە. «ارتەم» جاققا كەتتى. جوق, بۇل ەمەس. اۆتوموبيل كودى: 11, – دەپ جەدەل باسقارۋ وپەراتورىنىڭ كەزەكشى ينسپەكتورى ءار اقپاراتتى جىلدام ءارى انىق جەتكىزىپ جاتىر. ءبىزدىڭ ەكيپاج قاراقشىلاردىڭ ىزىنە ءتۇسۋدى كوزدەپ كەلەدى. راتسياداعى داۋىس قايتا ەستىلدى:
«بەيتانىس ادامدار جىگىتتىڭ جەلكەسىنەن قيقىندىرا ۇستاپ, ەكىنشىسى قالتاسىن ءتىنتىپ, بىردەڭە جۇلىپ اكەتتى. نە ۇرلانعانى بەلگىسىز. مەملەكەتتىك ءنومىرى – 623». اينالدىرعان 3 مينۋتتا «يرگيز-41!» دەلىندى راتسيادان.
– ۇستالدى! – دەدى پوليتسيا اعا لەيتەنانتى تورەحان بيكەنوۆ. ءيا, «يرگيز-41» نەبارى ءۇش مينۋتتا ۇرىلاردى «تۇلپاردىڭ» الدىندا قولعا ءتۇسىردى. كوپ ۇزاماي ءبىز دە سول جەرگە جەتتىك. بارساق, ازان-قازان. قاشىپ قۇتىلا الماعاندار يۋ-قيۋى كەلمەيتىن سوزدەردى جارىسا ايقايلاپ, تۇنگى قالانى باسىنا كوتەردى:
– كىم تەكسەردى؟ بىزدە نەلەرىڭ بار؟
– مەن ءىشىپ العانمىن, بۇلاردى تانىمايمىن! ەكەۋى دە «تاكسيست».
– ەرتەڭ موتور الام دەگەن ءوزىمنىڭ 120 مىڭ اقشام بار…
سويتسە, بۇل ۇستالعانداردىڭ ءجيى قوياتىن «سپەكتاكلى» ەكەن. وزدەرىن اقتاپ, پوليتسيانى شاتاستىرىپ, ءوز دەگەندەرىنە سەندىرۋدى قالايدى.
قالتالارىن قاراپ شىقتى. ەشتەڭە تابىلمادى. قولدارىنا كىسەن سالىنعان كۇدىكتىلەر پاترۋل ەكيپاجىنا وتىرعىزىلدى. بىزگە نە ۇرلانعانى بەلگىسىز. وسى ساتتە ءبىر قىزىق بولماسى بار ما؟ فوتوكوررەسپوندەنتىمىز سۇلتان سەيىتوۆ كۇدىكتىلەردىڭ كولىگىنىڭ استىندا جىلتىراعان ءبىر زاتتى بايقايدى. جاقىنداسا, iPhone ەكەن.
– ماسساعان, بىرەۋدىڭ تەلەفونى ءتۇسىپ قالىپتى عوي, – دەپ ۇستاي بەرگەندە پوليتسيا قىزمەتكەرى «تيىسپەڭىز, ساۋساعىڭىزدىڭ ءىزى قالىپ قويادى» دەپ قولىن كەرى يتەرىپ ۇلگەردى. تونالعان زات – iPhone بولىپ شىقتى. ۇرىلار پوليتسيانى كورگەندە ەسىكتەن شىعا بەرە بىلدىرتپەي تەلەفوندى دوڭگەلەكتىڭ استىنا سىرعىتا سالىپتى. گازەتىمىزدىڭ قىلمىستىڭ اشىلۋىنا كومەگى ءتيدى دەپ ءماز بوپ قالدىق.
بەينەكامەرانىڭ كومەگى كوپ
ەڭ قىزىعىن جابىرلەنۋشىدەن ەستىدىك:
– «شىمكەنت» ءدامحاناسىندا سىرا ءىشىپ وتىرعانمىن. شىلىم تارتۋعا سىرتقا شىققانىمدا, وسى ەكى جىگىتپەن سويلەسىپ كەتتىك. ۇيگە قايتار جولدا «بالانسىمىز جوق, قوڭىراۋ شالايىقشى» دەپ تەلەفونىمدى سۇرادى. بەردىم. مەنىڭ كوزىمشە حابارلاستى. ەشكىم كوتەرمەدى. «ەندى تەلەفونىمدى قايتار» دەگەنىم سول ەدى. «باۋىرىم, بىزگە سەنىڭ سوتكاڭ ءبىر تيىنعا دا كەرەك ەمەس» دەپ بوقاۋىز سوزدەردى جاۋدىرا باستادى دا, جەلكەمنەن شاپ بەرىپ, ەكىنشىسى قالتامداعى «ايفوندى» الىپ, ەكەۋى تۇرا قاشتى.
– سوسىن؟ پوليتسياعا حابارلاستىڭىز با؟
– جوق. ءوزىمنىڭ بىرەر جارتى الىپ قويعانىم بار. پوليتسياعا ماستىعىم تارقاعان سوڭ حابارلاسام دەپ ەدىم. سالىم سۋعا كەتىپ ۇيگە بارا جاتقانىمدا جول-پاترۋلدىك پوليتسياسى ءدال جانىما كەلىپ توقتادى. شوشىپ كەتتىم. «تونالعان ادام ءسىز عوي؟» دەدى. «ءيا!» دەدىم تۇككە تۇسىنبەي. ءسويتتى دە ءبىر جىگىتتىڭ باسىن كوتەرە ماعان كورسەتتى. ءدال ءوزى! توناپ كەتكەن وسى عوي! تاڭعالدىم. مەن پوليتسيانى شاقىرعان دا جوقپىن. قايدان ءبىلىپ قويدى؟ – دەپ الگى جابىرلەنۋشى ءالى دە سەبەبىن تابا الماي دال بولىپ وتىر.
مىنە, بۇل ءبىزدىڭ قاۋىپسىز قالا! بۇزاقىلار ءبارىن جاسىرىن جاسايمىز دەسە دە, استانانىڭ تۇكپىر-تۇكپىرىندەگى سۇڭعىلا بەينەكامەرالار ەشتەڭەنى قالت جىبەرمەيدى. ولاردىڭ سانى بۇگىندە 800-گە جۋىقتايدى.
تاڭعا دەيىن 23 اكىمشىلىك قۇقىزبۇزۋشىلىق انىقتالدى, 3 قىلمىستىڭ بەتى اشىلدى. ماشينانى ايداپ اكەتكەن ازامات قولعا ءتۇستى, ءبىر ناشاقور ەسىرتكىمەن ۇستالدى, بىرەۋدەن زاڭسىز قارۋ-جاراق تابىلدى…
P.S: قوعامدىق تىنىشتىقتى كۇزەتەتىن پوليتسەيلەردىڭ ارقاسىندا استانالىقتار الاڭسىز ءومىر سۇرەدى. كۇندىز كۇلكى, تۇندە ۇيقى كورمەيتىن باتىر جىگىتتەردىڭ بارىندا باس شاھار ەشتەڭەدەن قورىقپاس…
ءمادينا جاقىپ
