استاناداعى وقۋشىلار سارايىندا ەلورداداعى مەكتەپتەردە وقيتىن از قامتىلعان وتباسىلاردان شىققان بەس دارىندى وقۋشىعا 5 مىڭ ەۋرو كولەمىندە گرانت تابىس ەتىلدى. يگىلىكتى شارا ەل تاۋەلسىزدىگىنىڭ 25 جىلدىعىنا ارنالعان «25 ىزگى ءىس» جوباسى اياسىندا جۇزەگە اسىپ وتىر.
– قازاقستانعا ءجيى كەلىپ تۇرامىن. ماعان وسى ەلدىڭ تاريحى مەن باي ءداستۇرى, قوناقجايلىلىق قاسيەتى ۇنايدى. ادامدارى دا باۋىرمال. جاس جەتكىنشەكتەردىڭ ءوزى دە شەتىنەن تالانتتى, ونەرلى كەلەدى. حالىقارالىق وليمپيدالاردا ولجا سالىپ جۇرگەن وقۋشىلار بار ەكەنىن دە بىلەمىن. بۇگىنگى گرانتقا يە بولىپ وتىرعان بالالاردىڭ دا كەلەشەگى زور. ولاردان كوپ ءۇمىت كۇتەمىن. سوندىقتان, بارلىقتارىڭىزعا باقىت تىلەيمىن, – دەدى قازاقستاننىڭ بادەن-ۆيۋرتەمبەرگ جەرىندەگى قۇرمەتتى كونسۋلى, گەرمانيا ىسكەر ايەلدەرى قاۋىمداستىعىنىڭ مۇشەسى دوروتەيا حاللەر-لايبلە.
ءوز كەزەگىندە گرانتقا يە بولعان وقۋشىلاردىڭ ۇستازدارى مەن اتا-انالارى دا قايىرىمدىلىق ءىس جاساپ وتىرعان دوروتەيا حاللەر-لايبلەگە العىستارىن ءبىلدىردى.
رەتى كەلگەندە ايتا كەتەيىك, وتكەن جىلى قازاقستاننىڭ گەرمانياداعى ەلشىسى بولات ءنۇسىپوۆ ەكى ەلدىڭ اراسىنداعى دوستىقتى دامىتۋعا قوسقان ۇلەسى ءۇشىن دوروتەيا حاللەر-لايبلەنى ءنازىر تورەقۇلوۆ اتىنداعى مەدالمەن ماراپاتتاعان.
ازامات ەسەنجول
