جۇرەك اۋرۋىنىڭ سەبەپتەرى قانداي؟ ونىڭ العاشقى بەلگىلەرى قالاي بىلىنەدى؟

ەلىمىزدە جۇرەك-قان تامىرلارى اۋرۋلارىنان ءولىم كورسەتكىشى ءبىرىنشى ورىندا. تەك استانا قالاسىندا وسى سىرقاتتىڭ اۋىر ءتۇرى بويىنشا ەسەپكە الىنعانداردىڭ قاتارى 47 606 ادامدى قۇرايدى.

جۇرەك-قان تامىرلارى اۋرۋلارىنىڭ جيىلەپ كەتۋىنە بايلانىستى دۇنيەجۇزىلىك دەنساۋلىق ساقتاۋ ۇيىمى 29 قىركۇيەكتى – جۇرەك كۇنى دەپ بەلگىلەگەن ەدى. ونداعى ماقسات – جۇرتشىلىقتى كەۋدەسىندەگى جالعىز جۇرەگىن ايالاۋعا, قانداي دا ءبىر وزگەرىستەر بولسا, دەر كەزىندە دارىگەرگە قارالۋعا شاقىرۋ.

وسى كۇنگە وراي استانا قالاسى دا «جۇرەكتى ساقتا» اتتى اكتسيا وتكىزدى. قالالىق اكىمدىكتىڭ قولداۋىمەن دەنساۋلىق ساقتاۋ باسقارماسى جانە «سالاۋاتتى ءومىر سالتىن ساقتاۋ ورتالىعى» جشس ۇيىمداستىرعان شارادا ەلوردالىقتار بىلىكتى كارديولوگتار مەن ەندوكرينولوگ ماماننىڭ تەگىن كەڭەسىنە جۇگىنىپ, قان قۇرامىنداعى حولەستەرين مەن قانت دەڭگەيىن انىقتاتىپ, قان قىسىمىن ولشەتۋگە مۇمكىندىك الدى.

«مەچتا» ساۋدا ورتالىعىندا وتكەن اكتسياعا ادام كوپ جينالدى. اسىرەسە, كارديولوگتاردىڭ الدىندا كەزەك كوپ. دارىگەرمەن تىلدەسۋگە ارەڭ مۇمكىندىك الدىق. ءوزىن №1 قالالىق اۋرۋحانانىڭ دارىگەرىمىن دەپ تانىستىرعان كارديولوگ كۇلاش قۇلمۇحانوۆا بۇگىندە ادامدار جۇرەك اۋرۋىنا ءجيى شالدىعاتىنىن ايتتى. «جۇرەك اۋرۋىنا كىنالى – ەڭ اۋەلى ادامداردىڭ وزدەرى. كۇيگەلەكتىك, دۇرىس تاماقتانباۋ, اراق پەن تەمەكىگە ۇيىرسەكتىك, قوزعالىستىڭ ازدىعى جۇرەكتىڭ وزگەرىسكە ۇشىراۋىنا اكەلەدى. بۇل اۋرۋدىڭ العاشقى بەلگىلەرى – جۇرەك تۇسىنىڭ شانشىپ, تامىر سوعىسىنىڭ ءجيى سوعۋى. الايدا ادامداردىڭ كوبى وعان ۋاقىتشا جاعداي دەپ قارايدى دا, ءمان بەرە بەرمەيدى. ەگەر ەنتىگىپ, اياعىڭىزدا ىسىك پايدا بولسا, بىردەن دارىگەرگە كورىنۋ قاجەت» دەيدى كارديولوگ.

دارىگەردىڭ الدىندا وتىرعان جاس جىگىتتى سوزگە تارتتىق. وردا بۇزار جاستاعى ازامات ءۇشىنشى قاباتقا ەنتىگىپ ارەڭ كوتەرىلەتىنىن ايتىپ جاتىر. دارىگەر تامىر سوعىسىن تىڭداپ, قان قىسىمىن ولشەپ ەدى, جۇرەگى ءجيى سوعاتىن بولىپ شىقتى. بۇل دا بەلگىلى ءبىر اۋرۋلاردىڭ العاشقى بەلگىسى.

ودان كەيىن قارالعان ەگدە تارتقان ەر كىسى كوپتەن قان قىسىمى كوتەرىلەتىنىن جەتكىزدى. «وتە ۋايىمشىلمىن. ۋايىمداعان سايىن «داۆلەنيەم» كوتەرىلىپ, جۇرەگىم قاتتى سوعادى» دەيدى. كارديولوگ ول پاتسيەنتكە مايلى, قۋىرىلعان تاماقتى شەكتەۋ كەرەكتىگىن, اشۋشاڭدىق, كۇيگەلەكتىك پەن كۇيزەلىستىڭ ءبارى جۇرەككە سالماق ءتۇسىرىپ, اۋرۋدى اسقىندىراتىنىن ايتىپ, سابىرلى بولۋعا شاقىردى.

استانا قالاسى سالاۋاتتى ءومىر سالتى ورتالىعىنىڭ ۇيلەستىرۋشىسى قانات ءحامزيننىڭ ايتۋىنشا, «جۇرەكتى ساقتاڭىز» اكتسياسىنىڭ ماقساتى جۇرەك-قان تامىرلارى اۋرۋىنا جۇرتشىلىقتىڭ كوڭىلىن اۋدارتىپ, سىرقاتتى ەرتە باستان انىقتاپ, ەمدەۋ ەكەندىگىن جەتكىزدى. الداعى ۋاقىتتا دا وسىنداي اكتسيالار جالعاسىن تاپپاق.

قىمبات توقتامۇرات