استانادا قانداي ماماندىقتار سۇرانىسقا يە؟ باس قالادا قانداي تەگىن كۋرستار بار؟ جۇمىسقا تۇرۋ ءۇشىن قاي مەكەمەگە حابارلاسۋ قاجەت؟
كەشە جاستار سارايىندا وتكەن بوس جۇمىس ورىندارى جارمەڭكەسىندە قالا تۇرعىندارىنا ءبىر مىڭعا جۋىق قىزمەت ءتۇرى ۇسىنىلدى.
ءداستۇرلى شاراعا 60-تان اسا جۇمىس بەرۋشى قاتىسىپ, قالا تۇرعىندارى ءبىلىم, دەنساۋلىق, ءوندىرىس, قۇرىلىس جانە قىزمەت كورسەتۋ سالاسىنداعى بوس ورىندارمەن تانىستى.
– بۇل – جىل باسىنان بەرى وتكىزىلگەن جۇمىس جارمەڭكەسىنىڭ ونىنشىسى. قورىتىندى مونيتورينگ ولاردىڭ كومەگىمەن 300-دەن كوپ ادام تۇراقتى جۇمىسقا تۇرعانىن كورسەتىپ وتىر. قازان ايىندا تاعى ەكەۋىن ۇيىمداستىرۋ جوسپاردا بار, – دەيدى جۇمىسپەن قامتۋ ورتالىعىنىڭ ءباسپاسوز حاتشىسى ديدار سادىقوۆ.بوس ورىننىڭ كوبى قۇرىلىسشىلارعا, مەكتەپكە دەيىنگى مەكەمە تاربيەشىلەرىنە, دارىگەرلەرگە تيەسىلى.
بوس ورىننىڭ كوبى قۇرىلىسشىلارعا, مەكتەپكە دەيىنگى مەكەمە تاربيەشىلەرىنە, دارىگەرلەرگە تيەسىلى. مىسالى, جاڭادان اشىلعان ءوندىرىس ورنى تەحنيكالىق ماماندارعا سۇرانىس ءبىلدىرىپ وتىر. «ءبىر ساعات ىشىندە شامامەن 30 ادام كەلدى. 15 شاقتى تۇيىندەمە قىزىقتىرىپ ۇلگەردى. باستى تالابىمىز – جوعارى ءبىلىم. ال تەحنولوگ, ينجەنەر-قۇرىلىسشىلاردىڭ ءوندىرىس ورنىنداعى ەڭبەك وتىلىنە مىندەتتى تۇردە قارايمىز» دەيدى كادر ءبولىمىنىڭ قىزمەتكەرى راۋشان سەيتقاليەۆا.
ەلوردالىق بالاباقشالار دا بۇل شاراعا تۇراقتى كەلەتىندەردىڭ ءبىرى. سەبەبى قالامىزدا وسى سالاداعى مامانداردىڭ جەتىسپەۋشىلىگى بايقالادى. وسىعان وراي, جارمەڭكە اۋماعىندا «مەكتەپكە دەيىنگى مەكەمە تاربيەشىسى» ماماندىعى بويىنشا كاسىبي كۋرستارعا جازىلۋ جۇرگىزىلدى. بۇل باعدارلاما تەگىن وقىتىلادى ءارى قاتىسۋشىلارعا 16759 تەڭگە كولەمىندە شاكىرتاقى تولەنەدى. وسى سۇراققا قىزىعۋشىلىق تانىتقاندار استانا قالالىق جۇمىسپەن قامتۋ ورتالىعىنا جۇگىنە الادى.
ايتا كەتەيىك, 1 قىركۇيەكتەگى جاعداي بويىنشا جۇمىسپەن قامتۋ ورتالىعىنا بيىل 9 125 ادام كەلدى. ولاردىڭ 81 پايىزعا جۋىعى الەۋمەتتىك قولداۋ شارالارىنا ىلىكتى. 5 180 ادام جۇمىسقا ورنالاستىرىلىپ, 486 جاس ازامات «جۇمىسپەن قامتۋ-2020 جول كارتاسى» باعدارلاماسى شەڭبەرىندە جاستار پراكتيكاسىنا جىبەرىلدى. ال الەۋمەتتىك جۇمىس ورىندارىنا 107 ادام ورنالاستىرىلسا, قايتا دايارلاۋ جانە بىلىكتىلىكتى ارتتىرۋ كۋرستارىنان 623 استانالىق ءوتتى.
ءمادينا قايراتقىزى