اق حالاتتى ابزال جانداردىڭ ءتول مەرەكەسىنە وراي استانادا سالتاناتتى شارا ءوتىپ, 100 مەديتسينا قىزمەتكەرى ەلورداداعى دەنساۋلىق ساقتاۋ سالاسىنىڭ دامۋىنا قوسقان ەلەۋلى ۇلەسى ءۇشىن ماراپاتتالدى.
مەرەكەلىك شارا بارىسىندا استانا قالاسى اكىمىنىڭ ورىنباسارى ەرمەك امانشاەۆ باس شاھارداعى دەنساۋلىق ساقتاۋ سالاسىنىڭ قارقىندى دامىپ وتىرعانىن ايتىپ, دارىگەرلەردىڭ ەلەۋلى ەڭبەگىنە العىسىن ءبىلدىردى.
مەديتسينا قىزمەتكەرلەرىنە «دەنساۋلىق ساقتاۋ ىسىنە قوسقان ۇلەسى ءۇشىن», «دەنساۋلىق ساقتاۋ ءىسىنىڭ ۇزدىگى» توسبەلگىسى, سونداي-اق, استانا قالاسىنىڭ اكىمى ادىلبەك جاقسىبەكوۆ پەن دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆتىڭ اتىنان قۇرمەت گراموتالارى مەن العىس حاتتار تابىستالدى.
دارىگەرلەر بيىل العاش رەت بەس نوميناتسيا بويىنشا ماراپاتتالدى. جينالعان كوپشىلىك ساحناعا كوتەرىلگەن ءاربىر دارىگەردىڭ قىزمەتى جايلى بەينەروليكتەردى تاماشالادى.
«ماماندىعىنا ادالدىعى ءۇشىن» اتالىمى بويىنشا – ولگا زامولوتوۆا, «بىرەگەي وپەراتسيا وتكىزىپ, ادام ءومىرىن قۇتقارعانى ءۇشىن» №2 قالالىق اۋرۋحانا دارىگەرلەرىنىڭ كومانداسى: مارات جاقسىلىقوۆ, بايماحانبەت سادۋوۆ, بولاتحان لەپەسباەۆ, «جاڭا ءومىر سىيلاعانى ءۇشىن» №1 پەريناتالدى ورتالىعى جاڭا تۋعان سابيلەردى كۇتۋ جانە پاتولوگيالار ءبولىمىنىڭ مەڭگەرۋشىسى يرينا تسۋبەنكو ماراپاتتالدى. سونىمەن بىرگە, «دياگنوستيكالاۋ مەن ەمدەۋدىڭ جاڭا ءادىسىن ويلاپ تاپقانى ءۇشىن», «ماماندىعىنا ادالدىعى ءۇشىن – وتباسىلىق اۋلەتتەر» نوميناتسيالارى دا تاپسىرىلدى.
