استانا قالاسىنىڭ «سارىارقا» اۋدانى اكىمدىگى عيماراتىندا ادال سالىق تولەۋشىلەردى ماراپاتتاۋ سالتاناتى ءوتتى.
ءلاززات دۇيسەمباەۆا, ناتاليا نوۆاك, «قازاقستان ينجينيرينگ جانە جوبالاردى باسقارۋ» جشس, «الكون+» فيرماسى» جشس, «SST LIGHTING» جشس جانە «ازيا-لاين» جشس سالىقتىق مىندەتتەمەلەرىن تولىق كولەمدە ۋاقىتىلى ورىنداعان جانە قر مەملەكەتتىك بيۋدجەتىنە ەلەۋلى ۇلەس قوسقان اتقارۋشى كاسىپكەرلەر اتاندى.
– ەلىمىزدىڭ ەكونوميكاسى كۇردەلى جاعدايعا تاپ بولدى. دەگەنمەن, قالا بيۋدجەتىنىڭ كىرىس بولىگى بۇگىندە اسىرا ورىندالىپ وتىر. 2015 جىلدىڭ قورىتىندىسى بويىنشا بيۋدجەتكە تۇسكەن تۇسىمدەر 39 ملرد. تەڭگەگە ارتىق بولدى. بۇعان ەلەۋلى ۇلەس قوسقان – سىزدەر, سىزدەردىڭ بيزنەستەرىڭىز. سىزدەرگە تابىس تىلەيمىن, ىستەرىڭىزدى دامىتۋ ءۇشىن زاڭ شەڭبەرىندە قولداۋ كورسەتۋگە دايىنبىز, – دەدى استانا قالاسى بويىنشا مەملەكەتتىك كىرىستەر دەپارتامەنتى سارىارقا اۋدانى بويىنشا مەملەكەتتىك كىرىستەر باسقارماسىنىڭ باسشىسى ەرجان توقتارحانوۆ.
كونكۋرس العاش رەت وتكىزىلدى جانە بيزنەستى ادال, ايقىن جانە ساۋاتتى جۇرگىزۋگە تارتۋعا, قوعام نازارىن قازاقستاننىڭ ەكونوميكالىق وسىمىنە تىكەلەي اسەر ەتەتىن سالىق تولەۋشىلەردىڭ قىزمەتىنە اۋدارۋعا باعىتتالعان.
– ۇزدىك سالىق تولەۋشىلەردىڭ قاتارىندا بولعان جاقسى. ءبىز اليۋميني جانە مەتالپلاستيك كونسترۋكتسيالاردى دايىنداپ, قۇراستىرۋمەن اينالىسامىز. نارىققا 1998 جىلى ەندىك. ءبىزدىڭ باستى مىندەتىمىز – جۇمىسكەرلەرگە ەڭبەكاقى تولەۋدى جانە بيۋدجەتكە تولەنەتىن سالىقتاردى ۋاقىتىلى تولەۋدى قامتاماسىز ەتۋ. 18 جىلداعى قىزمەتىمىزدە ەڭبەكاقى مەن سالىق تولەۋدى كىدىرتۋ دەگەن بوماعانىن ماقتانىشپەن ايتا الامىن, – دەدى «الكون+» فيرماسى» جشس ديرەكتورى امان ايۋپوۆ.
ۇيىمداستىرۋشىلاردىڭ حابارلاۋىنشا, مۇنداي شارالار كاسىپكەرلەردى ىنتالاندىرىپ قانا قويماي, شوب-تىڭ باسقا وكىلدەرىنە جاقسى مىسال بولادى.
