16-22 ناۋرىز – بەس قوناق. بەس كۇن بۇلىڭ, كەيدە بوران بولادى.
27-28 ناۋرىز – قۇس قاناتى. قالىقتاپ قار جاۋادى. حالىق بۇل ىرىمدى «قاردىڭ باسىن قار الار, حاننىڭ باسىن قارا الار» دەسەدى. وسى قارمەن بىرگە جىل قۇسى ىلەسە كەلەدى. كەيدە جاڭبىرعا دا ۇلاسادى.
4-5 ءساۋىر – وت امالى. قىستىڭ ءبىر كۇندىك سوڭعى بورانى. مۇنان كەيىن قىس مالعا وتتى ءبىرجولا بەرەدى.
18-19 ءساۋىر – قىزىر قامشىسى. اسپاندا العاش رەت نايزاعاي ويناپ, جاڭبىر جاۋادى. كەيدە ءبىر كۇندىك سۋىق تا تۇسەدى. وتاۋ- وتاۋ بولىپ كوكتە جۇزگەن جازدىڭ بۇلتى شىعادى.
28-29 ءساۋىر – بۇرشىك جارعان. ءبىر كۇندىك سۋىق. توبىلعى, قاراعان بۇرشىگىن جارادى.
9 مامىر – قىزىل جۇمىرتقا. ءبىر كۇندىك سالقىن. وسى كۇنى ادال قۇستار قاز-ۇيرەك جۇمىرتقاسىن جارىپ, قىزىل-شاقا بالاپانىن شىعارادى.
17-24 – قۇرالاي. وسى كۇندەرى جەلى مەن جاڭبىرىمەن قوسا كيىك لاعىن ورگىزەدى.
29-31 مامىر – ۇركەردىڭ باتۋى. ۇركەر شالشىققا باتسا, ياعني, وسى كۇندەرى جاڭبىر بولسا, جاز جاڭبىرلى بولادى دەگەن بولجام بار. وسىدان ءبىر اپتادان كەيىن شىلدەنىڭ ىستىعى باستالادى. ول 40 كۇنگە سوزىلماق.
15-17 سارشا – ۇركەردىڭ تولعاعى. ارقانىڭ تابيعاتى بۇزىلماي تۇرعاندا بۇل شامادا اپتاعا سوزىلاتىن جاڭبىر بولعان. شىلدەنىڭ اپتابىنان كەيىنگى وسى جاۋىندى حالىق اسىعا كۇتكەن.
14-15 تامىز – تارازىنىڭ تۋى. حالىق اراسىندا «تارازى تۋا تاڭ سۋىر» دەگەن ماتەل بار. كۇز نىشانى العاشقى سۋىق بىلىنەدى. بۇلت قويۋلانا تۇسەدى.
21-22 قىركۇيەك – سۇمبىلە جۇلدىزىنىڭ تۋى. ەل اراسىندا «سۇمبىلە تۋا سۋ سۋىر» دەگەن ماتەل بار. قاباعىن تۇيگەن كۇز جاڭبىرلاتىپ كەتەدى.
4-5 قازان بوقىراۋ دەپ اتالادى. العاشقى سۋىق بوي كورسەتىپ, بوققا قىراۋ تۇرادى.
14-19 قازان اقىراپتىڭ التى كۇنى دەپ اتالادى. بۇل كۇندەرى قازاق جۇلدىزشىلارى تەزەكتىڭ وتە مايدا كۇلىن ساعات سايىن ۇشىرىپ وتىرىپ, جەلدىڭ باعىتىن, كۇشىن, بۇلتتىڭ جوعارى-تومەندىگىن, العاشقى ۇشقىن قاردىڭ جوباسىن بايقاپ, قىستىڭ التى ايىنداعى اۋا رايىن بولجاعان.
18-19 قاراشا – قاراشا قازدىڭ قايتۋى. جاڭبىر سوڭى كوكتايعاققا ۇلاسادى.
4-5 اقپان – (م.اۋەزوۆ جەلتوقساندى اقپان ايى دەيدى) – قىرباستىڭ قىزىلى. العاشقى اياز, كەي جىلدارى اياز كۇرت كوتەرىلىپ, 30-35 جەتەدى.
17-22 جەلتوقسان – تەكە بۇرقىل. ارقانىڭ اتاقتى بورانى. وسى شامادا ارقار مەن كيىك جۇپتاسادى.
1-2 قاڭتار – كۇن تالاسى. كۇن بويىن كوتەرەدى دەيدى ەل. جاپالاقتاپ, قار جاۋادى. (كەيدە جاڭبىر دا سىركىرەيدى)
17-27 قاڭتار – سارى اياز. قىس شىلدەسى دەپ تە اتالادى. ايازدىڭ شارىقتاۋ شەگى.
3-5 ناۋرىز ءۇت – ۇركەر اۋعان. تاس توبەگە شارىقتاپ شىققان ۇركەر جۇلدىزى توبەدەن ءسال باتىسقا قاراي سىرعيدى. وسىدان كەيىن ارقادا 30 گرادۋستان اسار اياز بولمايدى. بۇل كۇندەرى بىرەر كۇندىك بۇرقاسىن ءجۇرىپ وتەدى.
5-7 ناۋرىز – تولقىما. العاشقى جىلىمىق, ۇركەر جامباسقا تۇسەرى.
17-19 ناۋرىز – ماي بوران. بەس قوناقتىڭ ءبىر كۇنى. بوساعا جۇلدىزىنىڭ تۋىنا وراي بوساعا باسى دەپ تە اتالادى.
كامەل جۇنىستەگى,
جازۋشى
