«استاناەنەرگوسبىت» جشس كەلەسى جىلى ەلوردادا جىلۋ ءتاريفىن 30 پايىزعا ءوسىرۋدى ۇسىندى. سەرىكتەستىك باس ديرەكتورىنىڭ قارجى ماسەلەلەرى بويىنشا ورىنباسارى جاننا گيسلەردىڭ ايتۋىنشا, قازىرگى تاريف كومپانياعا شاش ەتەكتەن شىعىن اكەلىپ وتىر. سونىڭ سالدارىنان «استانا ەنەرگيا» جانە «استانا-تەپلوترانزيت» ۇيىمدارى الدىندا قارىزدارى كوبەيىپ بارادى.
كومپانيا وكىلىنىڭ ۋاجىنشە, بار ماسەلە سارالانعان تاريفكە تىرەلىپ وتىر. وسى ءتاريفتى قولدانعاننان مەكەمە شىعىنى 2016 جىلدىڭ قاڭتارىنان 2020 جىلدىڭ تامىزىنا دەيىن 806,1 ملن تەڭگەنى قۇراعان. ال بيىلعى قىركۇيەكتەن جەلتوقسانعا دەيىن شىعىن 196,8 ملن تەڭگە بولادى دەپ بولجانىپ وتىر. قورىتىندىسىندا ءتورت جىلدىڭ ىشىندە شىعىندار 1 ملرد تەڭگەدەن اسىپ كەتۋى مۇمكىن.
– سوڭعى جىلدارى ەلىمىزدە تاۋارلار, جۇمىستار مەن كورسەتىلەتىن قىزمەتتەر باعاسى ايتارلىقتاي ءوستى. مەملەكەتىمىزدە, سونىڭ ىشىندە نۇر-سۇلتان قالاسىندا دا ورتاشا جالاقى كولەمى ارتتى. سوندىقتان كومپانيا ءتاريفتى قايتا قاراۋدى شەشتى, – دەيدى ج.گيسلەر.
ونىڭ سوزىنشە, ءتاريفتى ءوسىرۋدىڭ تاعى ءبىر سەبەبى, 2016-2020 جىلدارعا ارنالىپ بەكىتىلگەن تاريفتەردىڭ مەرزىمى اياقتالادى. ەگەر ۇسىنىس ماقۇلدانسا, وندا 2022 جىلى ءتاريفتى تاعى 5 پايىزعا ءوسىرۋ جوسپارلانىپ وتىر. بۇل جاعداي كومپانيا قىزمەتكەرلەرىنىڭ جالاقىسىن وسىرۋگە دە مۇمكىندىك بەرەدى.
– جالاقى مولشەرى سوڭعى جىلدارى قارالمادى. ەگەر تاريف كوتەرىلسە, وندا كەلەسى جىلى ءبىر قىزمەتكەردىڭ جالاقىسىن 133 مىڭ تەڭگەگە دەيىن ءوسىرۋ جوسپارلانىپ وتىر. قازىر جالاقى 77 مىڭ تەڭگەنى قۇرايدى. ياعني ءتاريفتى كوتەرۋ ۇسىنىسى قولداۋ تاپسا, جالاقى 72 پايىزعا ارتادى, – دەيدى ج.گيسلەر. جىلۋ ءتاريفىن ءوسىرۋ ماسەلەسى ءالى ءبىر اي بويى قارالادى. قالا اكىمدىگى ءمونوپوليستىڭ ۇسىنىسىن ازىرگە ماقۇلداعان جوق.
