استانا اكىمدىگى تۇرعىن ۇيلەر مەن كوممەرتسيالىق ماقساتتاعى جىلجىمايتىن مۇلىك نىساندارى تۋرالى ءبىرنەشە پارامەتر بويىنشا اشىق ماعلۇمات بەرەتىن پورتال اشۋدى جوسپارلاپ وتىر.
ول تۋرالى كەشە تاۋەلسىزدىك سارايىندا باستالعان CRE Central Asia-2017 جىلجىمايتىن مۇلىك دەۆەلوپەرلەرىنىڭ فورۋمىندا استانا قالاسى اكىمىنىڭ ورىنباسارى ماليكا بەكتۇروۆا مالىمدەدى.
– وزدەرىڭىزگە ءمالىم, بىزدە بىلتىردان بەرى «109» قىزمەتى جۇمىس ىستەيدى («051» قىزمەتى» مم بازاسىنداعى ينتەللەكتۋالدى كونتاكت ورتالىعى بىلتىر 1 قاڭتاردان باستاپ ىسكە قوسىلعان بولاتىن – رەد). سول جەرگە سوڭعى توعىز ايدىڭ ىشىندە تۇرعىنداردان كوممۋنالدىق-تۇرمىستىق ماسەلەلەرگە قاتىستى 400 مىڭداي ءوتىنىش كەلىپ ءتۇستى. ول جەردە تۇرعىن ۇيلەرگە, كەڭسەلەرگە, اباتتاندىرۋعا قاتىستى كوپتەگەن ارىز-شاعىم جينالادى. بىرەۋىندە ليفت ىستەمەي قالادى, بىرەۋىندە جارىق دۇرىس بەرىلمەگەن دەگەندەي. وسى سەكىلدى سوڭعى ون جىلدىڭ مالىمەتتەرى بىزدە ساندىق فورمات كۇيىندە ساقتاۋلى. ەگەر ءبىز ونى بارشاعا قولجەتىمدى ەتسەك, تۇرعىن ءۇي, كەڭسەلەردىڭ ارتىق-كەمشىلىگى تۋرالى انىق اقپارات بىلۋگە بولار ەدى. باسقاشا ايتقاندا, ونداي مالىمەتتەر جالپىعا جاريا بولسا, وزدەرىن پرەميۋم, بيزنەس كلاسقا جاتقىزاتىن نىسانداردىڭ نارىقتاعى شىنايى باعاسى قالىپتاسۋىنا سەپتىگى تيەدى دەپ ويلايمىز, – دەدى ماليكا ەرلانقىزى.
جالپىلاي العاندا, جىلجىمايتىن مۇلىك قۇرىلىسى استانا ەكونوميكاسىنىڭ نەگىزگى قوزعاۋشى كۇشى سانالادى. قالادا جىل سايىن كوممەرتسيالىق نىسانداردى قوسپاعاندا, 2 ملن شارشى مەتر تۇرعىن ءۇي سالىنادى.
ال استانا اكىمدىگىنە قاراستى «استانا» الەۋمەتتىك-كاسىپكەرلىك كورپوراتسياسىنىڭ باسقارۋىندا مەملەكەت مەنشىگىندەگى جىلجىمايتىن مۇلىكتىڭ ءىرى كولەمى شوعىرلانعان.
«بولاشاقتا ءبىز ول نىسانداردىڭ بارلىعىن جەكەشەلەندىرەمىز نەمەسە كوممەرتسيالىق مۇلىك مەنەدجمەنتىنە ماماندانعان اناعۇرلىم كاسىبي كوماندالارعا باسقارۋعا بەرمەك ويىمىز بار» دەپ اتاپ ءوتتى ماليكا ەرلانقىزى. سونداي-اق, قالا اكىمدىگى جىلجىمايتىن مۇلىك يەلەرىن شاعىن كاسىپكەرلىككە كەڭسە, ورىن جالعا بەرۋ جاعىن ويلاستىرۋعا شاقىرادى.
ادىلبەك جاپاق
