Бүгін Астана қаласының Байқоңыр ауданы әкімдігінің ұйымдастыруымен 8 наурыз – Халықаралық әйелдер күніне орай «Әлем әйелдермен әсем» атты мерекелік іс-шара өткізілді, деп хабарлайды astana-akshamy.kz.
Мерекелік салтанатты жиынның мақсаты – елорданың дамуы мен гүлденуі жолында әр салада табанды еңбек етіп келе жатқан әйелдер қауымын мерекемен құттықтау. Іс-шараға эстрада әншілері, қоғам қайреткерлері, елорданың дамуына атсалысып жүрген әр саладағы әйел қызметкерлер, ауданның көп балалы аналары және белсенділері қатысты.
Іс-шара барысында ауданның белсенді тұрғындары, құқық қорғау, денсаулық сақтау, білім беру, коммуналдық қызмет, тұрғын-үй, мәдениет салаларында табанды еңбек етіп келе жатқан 300-ге жуық аруларымыз Байқоңыр ауданы әкімінің Алғыс хатымен марапатталды. Сондай-ақ, ауданда тұратын алтын құрсақты, көпбалалы аналарға «Күміс алқа» мемлекеттік наградалары салтанатты түрде табысталды. Мерекелік жиынға ҚР еңбек сіңірген әртістері, қоғам қайраткерлері қатысып, эстрада жұлдыздары әсем әндерімен әйелдер қауымын құттықтады.
