Газет туралы

Тәуелсіздік қарсаңында Ақмолада кіндігі кесілген, Елордада басылып,
барша республикаға таралатын басылым – «Астана ақшамы» газетінің жарық
көре бастағанына отыз жылдан асты. Осы жылдар ішінде ол өсу-өркендеу
кезеңдерінен өтіп, қаланың тыныс-тіршілігін, алған асулары мен жеткен
жетістіктерін қалың бұқараға жүйелі жеткізуші ғана емес, ел
руханиятындағы, халық тағдырындағы өзекті мәселелерге үн қосатын
мазмұны байыған, ойы кемелденген басылымға айналды.

Бүгінде саяси, тарихи, танымдық мақалалар қатары көбейіп, мәдени-
рухани дүниелерімен оқырмандарын сүйсіндіріп келе жатқан газеттің
қалыптасу жылдарына көз жүгіртсек, 1990 жылдың 13 қазанынан бастап
алғашында «Ақмола ақиқаты» деген атпен аптасына бір рет жарық көрген
басылым 1998 жылдың қаңтарында – «Ақмола ақшамы» сәл кейін «Астана
ақшамы» атанып, республикалық қоғамдық-саяси газет мәртебесіне ие
болды.

Патша көңілді оқырманның ұдайы үдесінен шығуға ұмтылатын
басылымның қол жеткізген жетістіктері де бір төбе. Соның бір дәлелі – 2002
жылы «Астана ақшамы» газеті Қазақстан журналистика академиясының
«Алтын жұлдыз» сыйлығының лауреаты атанды. Басылым 2018 жылы ҚР
Президентінің Алғыс хаты мен «Нұр-Сұңқар» сыйлығын алды. Бірнеше
журналисі халықаралық және республикалық конкурстардың лауреаты
болды.

Осы жылдар ішінде аптасына 3 рет жарық көретін газеттің танымалдығы
артып, таралымы көбейді. Оған ұжымда әр жылдарда еңбек еткен қаламы
жүйрік журналистердің өзіндік қолтаңбасы қалды. Олардың арасында белгілі
қайраткер, қаламгер Бауыржан Омаров, журналистер – Талғат Батырханұлы,
Раушан Төленқызы, Қайрат Бекен, Өріс Яшүкірқызы, Амангелді Жұмабек
және т.б. бар. Сонымен қатар, тұрақты авторлар – елімізге белгілі тұлғалар –
қайраткерлер, ғалымдар, қаламгерлер Өмірбек Байгелді, Жәнібек
Кәрібжанов, Алдан Смайыл, Серік Тұрғынбекұлы, Жамбыл Артықбаев,

Диқан Қамзабекұлы, Зиябек Қабылдинов, Қойшығара Салғараұлы, Сайлау
Батыршаұлы, Қуаныш Айтаханов, Қуаныш Жиенбай және басқалардың
ықпалы аз болған жоқ.

Сондай-ақ, газетті әр жылдары басқарған Кенже Жұмағұлов, Жұмагүл
Саухат, Мағжан Садыханов, Нұртөре Жүсіп, Амантай Шәріп, Ерболат
Қаменов сияқты бас редакторлардың да еңбегі бір төбе.
Қазір газет редакциясын тәжірибелі журналист, Қазақстан Перзиденті
сыйлығының иегері, Қазақстанның еңбек сіңірген қайраткері Еркін Қыдыр
басқарады.

Еліміздің ақпарат кеңестігінде өзіндік салмағы, орны бар бас қаланың бас
басылымы кейінгі кезде жаңа құрылымдық өзгерістермен қатар,
шығармашылық ізденістерімен де болашаққа жаңа міндеттер белгіліп отыр.

Back to top button