Әскери-патриоттық әндер шырқалды
Елордадағы Қазақстан Республикасы Қарулы Күштерінің Ұлттық әскери-патриоттық орталығында «Жас сарбаз – патриоттар ордасы» жобасы аясында әскери-патриоттық әндер байқауы қорытындыланды. Байқау армия генералы Сағадат Нұрмағамбетовтің 100 жылдығына орай өтті.
Салтанатты іс-шараны елорданың Жастар саясаты мәселелері басқармасы, Білім басқармасы және «Жас сарбаз» жасөспірімдер әскери-патриоттық қозғалысы республикалық қоғамдық бірлестігі Астана қалалық филиалы бірлесе ұйымдастырды.
Елордалық Жастар саясаты мәселелері басқармасының басшысы Самат Ибраевтың айтуынша, астаналық мектептер мен колледждерде 80-ге жуық «Жас сарбаз» сыныптары мен клубтары жұмыс істейді. Ал қозғалыс тәрбиеленушілерінің саны 8 мыңнан астам адамды құрайды.
«Әскери-патриоттық әндер байқауына қатысушылар 19 сәуірден бастап іріктелді. Барлығы 58 баладан өтінім келіп түсті, нәтижесінде тек 7-еуі ақтық кезеңге жолдама алды. Бұл байқаудың жеңімпаздары биыл қараша айында өтетін республикалық байқауға қатысады» деп бөлісті «Жас сарбаз» жасөспірімдер әскери-патриоттық қозғалысы республикалық қоғамдық бірлестігі Астана қалалық филиалы төрағасының орынбасары Айдархан Махамбет.
Сайыс қорытындысы бойынша байқаудың бас жүлдесі №51 мектеп-гимназия оқушысы Арай Ерахметке берілді. І орынды педагогика колледжінен Диас Мэлс жеңіп алды. ІІ орынды №57 орта мектебінен Темірбек Қалменбай, Наушабек Баязи мен №52 мектеп-гимназиясынан Дінислам Копиров бөлісті. Ал ІІІ орынға сервис және туризм колледжінің студенті Наргиз Маликова, №63 мектеп-гимназияның «Армандастар» домбырашылар ансамблі және №61 мектеп-лицейінің оқушысы Мансұр Мұхамеджанов лайық деп танылды.