Әуезов мектебіндегі әсерлі демалыс
![](https://astana-akshamy.kz/wp-content/uploads/2024/06/dsc7271-780x470.jpg)
Астанадағы М.Әуезов атындағы №86 мектеп-гимназия жанында балалардың жазғы демалысын тиімді ұйымдастыру мақсатында жазғы «Сарыжайлау» этнолагері жұмыс істеп жатыр. Лагерь жұмысы 1 маусымда басталды.
Этнолагерді ұйымдастырудағы мақсат – ұлттық сана-сезімі қалыптасқан, ұлттық және жалпыадамзаттық құндылықтарды өзара ұштастыра алатын ұлтжанды тұлға тәрбиелеу. Қазіргі екінші кезеңде оқушылар демалумен қатар ұлттық дәстүрлерімізді танып, біліп, меңгеруде.
– Тілімізді, дінімізді, өнерімізді оқушылар бала күнінен бастап бойына сіңіру керек. Сонда біз нағыз қазақты, ұлтжанды азаматты, ұлтты көркейтетін қыз бен ұлды тәрбиелейміз деп ойлаймын. Шебер мұғалімдеріміз, әжелер қауымы өскелең ұрпаққа киіз басуды, жүн түтуді, қамшы өруді, басқа да қолөнерді, терімен жұмыс істеуді, ұлттық тағамдарды дайындауды үйретеді, – деді М.Әуезов атындағы №86 мектеп-гимназия директоры Гүлмира Оралқызы.
«Сарыжайлау» этнолагерінде бірінші маусымда 300-ге жуық оқушы демалды. Ал қазір жүріп жатқан екінші маусымда 200-ге тарта оқушы қамтылды. Этнолагерге 1-8-сыныптың оқушылары барып жүр. Мектеп ауласына 2 киіз үй тігілген.
Күн тәртібі таңғы бимен басталып, лагерде демалушылар «Қара жорға» биін билейді. Одан кейін «Салт-дәстүрлерді үйрену», «Қолөнер», «Ұлттық тағамдар», «Қыш өнері» сияқты шеберлік сабақтары өтеді. Бұған қоса, «Ұлттық дәстүрін ұлықтаған ұрпақ» тақырыбында «Әжелер мектебінің» сабақтары, тоғызқұмалақ, бес асық секілді ұлттық ойындар, робототехника және STEM сабақтары, домбыра мен ән сабақтары ұйымдастырылады.