ەلورداداعى «Beeline Arena» سپورت كەشەنىندە سپورتتىق جانە جاۋىنگەرلىك سامبودان ەرەسەكتەر, جاستار, جاسوسپىرىمدەر جانە پاراسپورتشىلار اراسىنداعى ازيا جانە وكەانيا چەمپيوناتى جالاۋىن كوتەردى.
چەمپيوناتقا ەلىمىزدەن 24 پاراسپورتشى, 126 شەبەر, ۇلتتىق قۇرامادان 72 سامبوشى قاتىسۋدا.
ازيا سامبو وداعىنىڭ باسشىسى, بۇكىلالەمدىك سامبو فەدەراتسياسىنىڭ (FIAS) ۆيتسە-پرەزيدەنتى الامجون مۋللاەۆ, استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, قازاقستان سپورتتىق جانە جاۋىنگەرلىك سامبو فەدەراتسياسىنىڭ پرەزيدەنتى ايدوس اقجانوۆ قاتىسىپ, جارىسقا قاتىسۋشىلارعا ساتتىلىك تىلەدى.
– استانا قالاسى اكىمدىگىنىڭ اتىنان جارىستى ۇيىمداستىرۋعا اتسالىسقان مادەنيەت جانە سپورت مينيسترلىگىنە, قر سامبو فەدەراتسياسىنا العىسىمدى بىلدىرەمىن. وسىنداي اۋقىمدى جارىستىڭ قازاقستان تاريحىندا العاش رەت ءوتۋى – ءبىز ءۇشىن ۇلكەن مارتەبە. بۇل جارىسقا 27 ەلدەن 700-دەي سامبوشى قاتىسۋدا. بايراقتى باسەكەدە بارىڭىزگە ساتتىلىك, تورەشىلەرگە ادىلدىك تىلەيمىن. شىن ۇزدىكتەر جەڭىسكە جەتسىن! – دەدى استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ جارىستىڭ اشىلۋ سالتاناتىندا.
بۇل سايىستىڭ جەڭىمپازدارى ساۋد ارابياسى ءار-رياد قالاسىندا وتەتىن دۇنيەجۇزىلىك جەكپە-جەك ويىندارىنا قاتىسۋعا جولداما الادى.
كەشەدەن بەرى جاسوسپىرىمدەر مەن جاستار جۇلدە جولىندا كۇش سىناستى. چەمپيونات 11 ماۋسىمدا ەرەسەكتەر جارىسىمەن اياقتالادى.
تاعى ءبىر ايتارىمىز, كورەرمەندەر بۇل جارىستى Qazsport ارناسىنان جانە FIAS YouTube كانالىنان تىكەلەي ەفيردەن تاماشالاي الادى.
