«اسىق ويناعان ازار, دوپ ويناعان توزار». بۇل دانالىقتىڭ ءمان-ماعىناسى وزگەرىپ, قازىر دوپ تەپكەن تابىستى, اسىق ويناعان تانىمال بولۋدا. راس, اسىق اتۋ بۇقارالىق سپورت رەتىندە دامىپ, ءتۇرلى دەڭگەيدەگى جارىستار ءجيى وتەدى. وسى تۋراسىندا استانا قالاسى اسىق اتۋ ويىندارى فەدەراتسياسىنىڭ پرەزيدەنتى ەسكەندىر راحمەتوۆتەن سۇرادىق.
– ەرتە زاماننان ۇلتتىق ويىن رەتىندە دامىپ, ويناۋ شارتى زامانعا ساي وزگەرىپ, بالانى مەرگەن, ەپتى, زەرەك, تاباندى, شىدامدى بولۋعا شىڭدادى. ءتىپتى ۇلتتىق ويىننىڭ كەيبىر تۇرىنە ەرەسەكتەر دە قاتىستى. كوشپەندىلەر اراسىندا اسىقتى تۇمار رەتىندە تاعىپ, ۇلتتىق قازىنا رەتىندە دارىپتەلدى. اقساقالدار وسكەلەڭ ۇرپاققا «اسىعىڭ الشىسىنان ءتۇسسىن!» دەپ باتا بەرۋىنىڭ ءمانىسى وسىندا, – دەپ ءسوزىن باستادى ول.
اسىق اتۋعا مەكتەپ وقۋشىلارىنىڭ قىزىعۋشىلىعى جوعارى. استانا قالاسىندا 500-گە جۋىق وقۋشى اسىق اتۋدىڭ قىر-سىرىن مەڭگەرىپ, ءتۇرلى دەڭگەيدەگى جارىسقا قاتىسىپ ءجۇر. قازىر ەلوردانىڭ كومانداسىندا 60-تان اسا سۇرمەرگەن جاتتىعادى. بىزگە اسىق اتۋدىڭ قاي تۇرىنەن جارىس وتەتىنى قىزىق بولدى.
– اسىق ويىنىنىڭ ءتۇرى كوپ. حانتالاپاي, ومپا, الشى, شىر, تايكە سىندى اسىق ويىنى حالىق اراسىندا كەڭ تاراعان. ءبىز اسىق ويىنىنىڭ ەكى ءتۇرىن رەسمي بەكىتتىك. بەستاباندى ۇلدار, بەستاستى قىزدار وينايدى, – دەدى اسىق اتۋدان باس قالانىڭ باس جاتتىقتىرۋشىسى ەسكەندىر راحمەتوۆ.
بۇگىندە سپورت جانە دەنە شىنىقتىرۋ ىستەرى كوميتەتى اسىق اتۋ فەدەراتسياسىنىڭ قولداۋىمەن رەسپۋبليكالىق, حالىقارالىق تۋرنيرلەر ءجيى وتەدى. ءتىپتى اۋداندىق, وبلىستىق دەڭگەيدەگى جارىستار جولعا قويىلدى. ەل بويىنشا 2 مىڭ جاتتىقتىرۋشى 6 مىڭنان اسا سپورتشىنى باپتايدى. ءدال وسى اسىق اتۋ سپورتىنان ەلوردالىقتار ۇستەمدىك قۇرىپ تۇر. وعان استانانىڭ ەرلەر قۇراما كومانداسى قازاقستان چەمپيوناتىندا بەس رەت ۇزدىك بولعانى دالەل. ايەلدەر اراسىنداعى چەمپيوناتتا ەلوردانىڭ سپورتشىلارى ءتورت رەت دارالاندى. ودان بولەك, جاستار اراسىندا ءۇش رەت, جاسوسپىرىمدەر اراسىندا ەكى رەت چەمپيون بولعان-دى. بۇل – ۇلكەن جەتىستىك.
– ءادىلحان جۇماعۇلوۆ, مىرزامۇرات قايىپبەكوۆ, نۇرعانات مولجىگىتوۆ ەل چەمپيوناتىندا بەس رەت, حالىقارالىق «ازيا اسىعى» مەن «كەيكى مەرگەن» تۋرنيرىندە ەكى رەت توپ جاردى. اسلان بۇلانباي, نۇربەك اسانقۇل, مىڭتورە نۇرباقىت جاستار اراسىنداعى ەل چەمپيوناتىندا تۇعىردان تايماي كەلەدى. ودان بولەك, ايبەك امانكەلدىۇلى, ۇلانباي اسىلان, جانبولات جامبىل, ايدىن جاسۇزاق, ەسەن جۇماعۇلوۆ, ورالبەك اقتىلەۋوۆ, بەكجان كەنجەبەك سىندى ساقا سپورتشىلار بار. ايجان سەرىكوۆا, پەريزات ەلەمەس, ساياگۇل جارىلقاسىن, كاميلا دانياروۆا, نازەركە اۋەلباەۆا, ارۋجان جاقىپبەك, كاۋسار سەرىك, سالتانات مۇحتار جانە تاعى باسقا سپورتشىلارمەن ماقتانامىز. 59 جاستاعى انارگۇل قوجانيازوۆا ازيا چەمپيوناتىن ۇتتى. ارداگەر ويىنشىلار اراسىندا سوۆەتحان شاكيەۆ اعامىزدى ەرەكشە اتاۋعا بولادى, – دەدى ۇلتتىق ويىننىڭ جاناشىرى.
بالا كەزىمىزدە الشى, تايكى, شىگە, بۇگە دەپ اسىقتى اتاپ, كۇن ۇزاق ويناپ, اسىققا رەڭ بەرۋ ءۇشىن ءتۇرلى تۇسكە بوياۋعا ءمان بەرەتىن ەدىك. شىركىن, ءبىزدى اسىق وينايتىن بالالار قايتا كوبەيە باستاعانى قۋانتتى!
