ەجەلدەن قازاق ۇلتى قىران مەن جۇيرىكتى باپتاعان ادامدى ەرەكشە قۇرمەت تۇتتى. ويتكەنى بۇل ەكى ونەر ەلدىڭ ايبىنىن كورسەتىپ, ابىرويىن اسىردى. بۇگىندە حالىقارالىق بايراقتى باسەكەلەردە ەل مەرەيىن اسىرىپ جۇرگەن سپورتشىلار دەسەك, ولاردى باپتايتىن باپكەرلەرگە دە قۇرمەت جوعارى. سونداي بىلىكتى باپكەردىڭ ءبىرى – اسقار ەركەباەۆ.
سپورتشىنىڭ فيزيكالىق كۇش-قۋاتىن ارتتىرىپ, تاكتيكالىق جانە تەحنيكالىق قابىلەتىن شىڭداپ, پسيحولوگياسىن دامىتۋ وڭاي شارۋا ەمەس. فيزيكالىق جۇكتەمەدەن كەيىن سپورتشىنىڭ قايتا قالپىنا كەلۋىن ەسەپتەپ, جارىسقا دايىنداۋ ءتىپتى قيىن. سوندىقتان العاشقى سۇراقتى وسى باعىتتا قويدىق.
– اقش-تىڭ جەلاياقتارى, قىتايدىڭ اۋىر اتلەتتەرى جىل وتكەن سايىن جاڭا رەكوردتى باعىندىرىپ, تاڭعالدىرۋدا. مۇنداي جوعارى جەتىستىكتىڭ سىرى نەدە؟ ارينە, عىلىمدا. سپورت سالاسى عىلىمسىز, يننوۆاتسياسىز دامىمايدى. استانادا سپورتشىلارعا ارنالعان مەديتسينالىق ورتالىق اشىلدى. بۇل – قۇپتارلىق ءارى قۋانارلىق جاعداي. ەندى ءاربىر سپورتشىنىڭ فيزيكالىق جاعدايىن باقىلاۋ ماڭىزدى. قاشان, قالاي, قانداي جۇكتەمە بەرۋ كەرەك, بابىنا كەلگەننەن كەيىن نە ىستەۋ كەرەك؟ مۇنىڭ ءبارى عىلىمي تۇرعىدا سۇيەمەلدەنىپ, وقۋ-ادىستەمەلىك قۇرال رەتىندە جاس باپكەرلەرگە ۇسىنىلعانى دۇرىس. مىنە, وسىنىڭ ءبارى عىلىم مەن سپورتتىڭ ۇيلەسىمدى جۇمىسىنىڭ ارقاسىندا ىسكە اسادى. سوندا عانا اقش پەن قىتاي سىندى سپورتى دامىعان الپاۋىت ەلگە اينالامىز. جارىسقا بابىندا بارعان سپورتشىنىڭ كوزىندە وت ويناپ, جىگەرى تاسىپ, شارشى الاڭدا ءوزىنىڭ شەبەرلىگىن كورسەتە الادى, – دەدى باپكەر.
اسقاردىڭ كىندىگى جامبىل وبلىسى شۋ اۋدانىندا كەسىلدى. 13 جاسىنان قۇرمانعالي قارشىعابەكوۆتىڭ قولاستىندا جاتتىعىپ, بوكستىڭ قىر-سىرىن مەڭگەردى. كوپ ۇزاماي اۋداندىق, وبلىستىق دەڭگەيدەگى تۋرنيرلەردە توپ جارىپ, رەسپۋبليكالىق, حالىقارالىق دەڭگەيدەگى جارىستاردا جاسىنداي جارقىرادى. ءسويتىپ, سپورت شەبەرى اتاندى.
2006 جىلى شۋ اۋدانىندا باپكەرلىك جۇمىستى باستادى. 2009 جىلى ەلورداعا قونىس اۋدارىپ, سۇيىكتى جۇمىسىن جالعاستىردى. شاكىرتتەرىن تارتىپكە باۋلىپ, جاۋاپكەرشىلىكتى سەزىنۋگە ۇيرەتەتىن باپكەردىڭ ەڭبەگى ەش كەتپەدى. ەل نامىسىن قورعايتىن ايبەك پەن نۇربەك ورالباي سىندى مىقتى بوكسشىلاردى تاربيەلەدى.
– شاكىرتتەرىمنىڭ ىشىندە اعايىندى ورالبايدىڭ مەرەيى ۇستەم. ايبەك – ازيا چەمپيونى, نۇربەك – الەم چەمپيونى. ەكەۋىنىڭ ارمانى – وليمپيادا ويىندارىندا بىرگە توپ جارۋ. ولار وسى جولدا تەر تەگۋدە.
23 قىركۇيەكتەن 8 قازانعا دەيىن قىتايدا ءحىح ازيا ويىندارى وتەدى. سوعان قاتىسامىز. قازىر الماتىدا ۇلتتىق قۇرامانىڭ وقۋ-جاتتىعۋ جيىنىندا دايىندالۋدامىز, – دەپ شاكىرتتەرىنىڭ مۇراتىن جەتكىزدى ول.
شىنى كەرەك, بوكس توڭىرەگىندە سۇراق كوپ. سونىڭ ءبىرى – توكيودا وتكەن وليمپيادا ويىنىنداعى ساتسىزدىك. ەكىنشىسى – قازاق-وزبەك بوكسىنىڭ باسەكەسى.
– كەز كەلگەن سپورت باسەكە بولعان جەردە داميدى. ەلىشىلىك جارىستاردا ءار سالماق دارەجەسىندە بىرنەشە بوكسشى شەبەرلىگىمەن كوزگە تۇسەدى. ال الەم جانە ازيا دەڭگەيىندەگى باسەكەلى تۋرنيرلەردە قازاق-وزبەك باسەكەسى قىزادى. بۇل قازاق بوكسشىلارىن فيزيكالىق, تەحنيكالىق, پسيحولوگيالىق تۇرعىدا دايىنداۋىنا ەرەكشە سەرپىن بەرەدى. ال توكيودا وتكەن تورتجىلدىقتىڭ باستى باسەكەسى تۋرالى ەشنارسە ايتا المايمىن. ويتكەنى بۇل ءتۋرنيردىڭ باسى-قاسىندا بولعان جوقپىن. ءبىزدىڭ ماقسات – پاريج وليمپياداسىندا بيىكتەن كورىنۋ. وسى جولدا ىزدەنىپ, بوكسشىلاردىڭ شەبەرلىگىن شىڭداۋ ۇستىندەمىز, – دەيدى قازاقستانعا ەڭبەگىن سىڭىرگەن جاتتىقتىرۋشى.
