استانا قالاسىنىڭ «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگىنىڭ قوستاناي وبلىسىندا ورتتەن زارداپ شەككەندەرگە كومەك بەرۋ جونىندەگى ىزگى باستاماسىنا قازاقستاندىق جاۋىنگەر-ينتەرناتسيوناليستەر قولداۋ ءبىلدىردى.
قازاقستاننىڭ ءار ايماعىندا تۇراتىن اۋعانستان سوعىسىن باستان كەشكەن جاۋىنگەر-ينتەرناتسيوناليستەر اۋليەكول اۋدانىنداعى بىرنەشە اۋىلدىڭ ورمان جانىنداعى ۇيلەردىڭ ورتكە ورانىپ, سونىڭ سالدارىنان باسپاناسىز قالعان وتباسىلارعا قارجىلاي جاردەم كورسەتۋدى ۇيعاردى. جەدەل تۇردە جينالعان قاراجات «قولدان قولعا» بەرىلدى.
امانقاراعاي ورتا مەكتەبىنىڭ ديرەكتورى عالىمجان ەرەشەۆ اۋىل تۇرعىندارى اتىنان كومەك كورسەتۋگە كەلگەن جاۋىنگەر-ينتەرناتسيوناليستەرگە ريزاشىلىعىن ءبىلدىرىپ, سوعىس كورگەن ازاماتتاردىڭ ەل باسىنا قيىندىق تۋعان جاعدايدا قاراپ قالمايتىنىن, قاشاندا قايىرىمدىلىق جاساۋعا دايىن جۇرەتىنىن اتاپ ءوتتى.
قايىرىمدىلىق كورسەتۋشىلەردىڭ قاتارىندا بولعان «اۋعانستان سوعىسى مۇگەدەكتەرى مەن ارداگەرلەرى وداعى» زتب رەسپۋبليكالىق ۇيىمى ورتالىق كەڭەسىنىڭ توراعاسى مارات قويلىباەۆ ءوزىنىڭ وزەكجاردى ءسوزىن ايتتى.
«اۋعانستان الاپاتىن باستان كەشكەن ازاماتتار قايعى مەن قاسىرەتتىڭ نە ەكەنىن جاقسى تۇسىنەدى. سوندىقتان دا قوستاناي وبلىسىندا ورىن العان ءورت وقيعاسىنان زارداپ شەككەندەرگە كومەك كورسەتۋگە شەشىم قابىلدادىق. بۇل باستاماعا ەلىمىزدىڭ بارلىق ايماقتارىنان جاۋىنگەر-ينتەرناتسيوناليستەر قىزۋ قولداۋ ءبىلدىردى. جينالعان قاراجاتتى قولما-قول ۇلەستىرىپ بەردىك. ەڭ باستىسى, ءۇيسىز قالعان وتباسىلارىنا جاردەم بەرىپ, جۇرەكتەرىنە سەنىم مەن جىلۋلىق سىيلادىق دەپ ويلايمىن. ءبىز مۇنداي قايىرىمدىلىق كومەك كورسەتۋدى جالعاستىرا بەرەمىز» دەدى اقتوبە قالاسىنان ارنايى كەلگەن جاۋىنگەر-ينتەرناتسيوناليست م.قويلىباەۆ.
ءوز كەزەگىندە امانقاراعاي اۋىلىنىڭ تۇرعىندارى دا ريزاشىلىقتارىن ءبىلدىردى. كومەك العان ءاربىر تۇرعىن جۇرەكجاردى سوزدەرىن جەتكىزدى.
«اۋعان سوعىسىن كورگەن ازاماتتارعا العىسىمىز شەكسىز. مەن بۇل جىگىتتەردى بۇرىن دا قاتتى سىيلاۋشى ەدىم. قايعى كوپ بولىپ كوتەرسە جەڭىلدەيدى عوي, سوندىقتان كومەك كورسەتكەن جاۋىنگەرلەرگە بالا-شاعامنىڭ, اۋىلداستارىمنىڭ اتىنان راحمەتىمدى ايتامىن, بۇل ەرلىكتىڭ, ەلدىكتىڭ كورىنىسى دەپ بىلەمىن» دەدى امانقاراعاي اۋىلىنىڭ تۇرعىنى گۇلجان وماروۆا اعىنان جارىلىپ.
