ەلىمىزدە 10 جىلدان بەرى قىركۇيەكتىڭ ەكىنشى جەكسەنبىسى وتباسى كۇنى رەتىندە اتالىپ كەلە جاتىر. «مەرەيلى وتباسى» ۇلتتىق بايقاۋىنىڭ بيىلعى مەرەيتوي سالتاناتى مەملەكەت باسشىسى قاسىم-جومارت توقاەۆتىڭ بايقاۋ جەڭىمپازدارىنا ارناعان قۇتتىقتاۋىمەن اشىلدى. بيىلعى بايقاۋدا 3344 وتباسى باق سىناسا, ونىڭ ىشىندە ەلوردادان 210 وتباسى قاتىستى.
بيىل «مەرەيلى وتباسى» ۇلتتىق بايقاۋىنىڭ استانا قالالىق كەزەڭىندە كوپبالالى سادۋاقاسوۆتار اۋلەتى جەڭىمپاز اتاندى. 2013 جىلدان بەرى وتكىزىلەتىن اتالعان بايقاۋعا بيىل قاتىسقان 210 وتباسىنىڭ ىشىنەن ۇزدىك شىققان ولار نەسىمەن ەرەكشەلەندى؟
اۋلەتتىڭ ابزال اناسى, 12 بالانى دۇنيەگە اكەلگەن تيشجان سادۋاقاسوۆانىڭ ايتۋىنشا, ولار بالا سانىنىڭ عانا ەمەس, جەتىستىكتەرىنىڭ كوپتىگىمەن دە جەڭىسكە جەتكەن. 2011 جىلى ەلورداعا قارقارالى قالاسىنان كوشىپ كەلگەن جەڭىمپاز وتباسى ەلىمىزدەگى كەز كەلگەن مەرەكەدە جان-جاقتان اۋلەت بولىپ ەلوردادا باس قوسىپ, بارلىق مەرەكەنى بىرگە اتاپ وتەدى ەكەن. جولداسى توكەن سادۋاقاسوۆ دۇنيەدەن وتكەنگە دەيىن 60 جىل بىرگە تۇرىپ, بالالارىن جەتىلدىرىپ, جەتكىزىپ, مىقتى تاربيە بەرگەن 80 جاستاعى 2 دۇركىن «التىن القا» القا يەگەرى – 6 ۇل جانە 6 قىزدىڭ اناسى, ولاردان تاراعان 37 جيەن, نەمەرە مەن 19 شوبەرەنىڭ اسىل اجەسى. ولاردىڭ كوبى ءبىلىم بەرۋ, قۇقىق قورعاۋ سالالارىندا جۇمىس ىستەپ, جەتىستىكتەرگە جەتكەن. سول سياقتى سپورتتاعى, قوعامدىق جانە شىعارماشىلىق جۇمىستارداعى, بايقاۋلارداعى بەلسەندىلىگى ءۇشىن ماراپاتتارعا يە بولعان. تيشجان اجە وسىنداي ۇلكەن اۋلەت قالىپتاستىرىپ, ولاردىڭ اۋىزبىرلىگىن ساقتاۋداعى قۇپياسىمەن ءبولىستى.
– 17 جاسىمدا وتباسىن قۇرىپ, 25 جاستا تۇڭعىشىمدى دۇنيەگە اكەپ, انا اتاندىم. سوسىن اراسىنا 2 جىل سالىپ قالعان بالالارىمدى دۇنيەگە اكەلدىم. جولداسىم سالماقتى, سابىرى مول جان ەدى. ون اعايىندى اۋلەتتىڭ ۇلكەنى. ەنەممەن 30 جىل بىرگە تۇرىپ, بالالارىمدى ءبىر جاسقا جەتپەي ەنەمە قالدىرىپ, جۇمىسقا شىعىپ كەتەتىنمىن. ءسويتىپ بالا دا تۋىپ, 30 جىل مەملەكەتكە دە قىزمەت ەتىپ ۇلگەردىك. قىزداردى ۇزاتىپ, ۇلداردى ۇيلەندىردىك. قانداي قيىن كەزەڭدەردى وتكەرسەك تە, ەرلى-زايىپتى رەتىندە ءبىر-ءبىرىمىزدى تىڭداپ, ءاي-ءشاي دەسپەي عۇمىر كەشتىك. اناسىن سىيلاپ تۇرعان سوڭ جولداسىڭ دا سەنى تىڭداپ, توبەسىنە كوتەرەدى. قازىر مىنە التى كەلىنىم مەن كۇيەۋ بالالارىم دا سولاي مەنى قۇرمەتتەيدى. كەلىندەرىمە جەكىپ, بوتەنسىنىپ كورگەن ەمەسپىن. اۋلەتتىڭ شارۋاسىن قارتايعالى سولارعا بەرگەنمىن, ەشتەڭەگە ارالاسپايمىن. وزدەرى شەشىپ, وزدەرى قويادى. مەن تەك وسى بالالارىمنىڭ ورتاسىندا قىدىرىپ, ساناتوريلەردە دەمالىپ جۇرگەن جايىم بار. ەندى قازىرگى زامانعا كەلسەك, بارلىق جاعدايى جاسالىپ تۇرسا دا, 1-2 بالاسى بولسا دا, ءبىر-ءبىرىن تۇسىنىسپەي, اجىراسىپ كەتىپ جاتقان جاستار كوپ. وتباسىن ساقتاۋدىڭ باستى سىرى – ءبىرىڭدى ءبىرىڭ تىڭداي بىلۋدە جانە كەلىن بولعاننان كەيىنگى ءرولىڭدى جاستايىڭنان بويىڭا سىڭىرە الۋىڭدا. بىرەۋگە بىردەڭە دەپ اقىل ايتۋ قيىن, دەگەنمەن بىزدە مۇنداي جاقسى جاعداي بولماسا دا وسىنشا ۇرپاق ءوسىرىپ, ولاردى تولىق وتباسىندا جەتىلدىردىك. ءبارى دە ادامنىڭ نيەتى مەن تىلەگىنە جانە ارينە تاربيەسىنە, اناسىنان, ءوزىنىڭ وتباسىنان العان ونەگەسىنە بايلانىستى عوي, – دەيدى التىن قۇرساقتى انا.
بۇگىندە ونەگەلى وتباسى رەسپۋبليكالىق بايقاۋعا دايىندىق ۇستىندە. وسىنداي وتباسىلىق قۇندىلىقتاردى دۇرىس قالىپتاستىرۋ, بالالاردى پاتريوتيزم مەن جالپىادامزاتتىق قۇندىلىقتار رۋحىندا تاربيەلەۋ – ءاربىر اۋلەتتىڭ باستى مىندەتى. ول ادامگەرشىلىك قاسيەتتەردى جانداندىرۋعا جانە وتباسى مارتەبەسىن كوتەرۋگە سەپتىك ەتەدى. بۇل ءوز كەزەگىندە مەملەكەت ىرگەسىنىڭ مىقتى بولۋىنا, قوعامدا گۋمانيزم قاعيداتتارىنىڭ جاپپاي بەلەڭ الۋىنا اكەلەدى.
