سپورت كۇنى قارساڭىندا وتكەن سالتاناتتى كەزدەسۋگە استانا قالاسى اكىمىنىڭ ورىنباسارى ەسەت بايكەن, قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, وليمپيادا ويىندارىنىڭ چەمپيونى سەرىك ساپيەۆ پەن ازيا پاراويىندارىنىڭ چەمپيونى سيازبەك داليەۆ ارنايى قاتىستى.
– استانا قالاسى تۇرعىندارىنىڭ 37 پايىزى بۇقارالىق سپورتپەن اينالىسسا, كاسىبي تۇردە 18 مىڭنان استام سپورتشى (2 مىڭ ەرەسەك, 16 مىڭ ءجاسوسپىرىم) شۇعىلدانادى.
سوڭعى جىلدارى پاراسپورت تۇرلەرى دە جاقسى دامۋدا. توكيودا وتكەن وليمپيادا ويىندارىندا قازاقستاندىق سپورتشىلار 8 قولا جەڭىپ السا, پاراسپورتشىلار بىرنەشە رەت دارالانىپ, پاراليمپيادادا كوك تۋدى جەلبىرەتىپ, ابىرويىمىزدى اسىردى.
ەلوردادا سپورتپەن تۇراقتى شۇعىلدانۋعا ارنالعان 1000-نان اسا سپورت نىسانى بار. 35 سپورت سارايىندا بىرنەشە سپورت تۇرىمەن اينالىسۋعا بولادى.
الداعى ۋاقىتتا بتسپ دياگنوزى بار بالالار ءۇشىن «قازاقستان» سپورت كەشەنىندە ارنايى باسسەين ىسكە قوسىلادى.«قازانات» يپپودرومىندا مۇگەدەك ادامدار ءۇشىن يپپوتەراپيا الۋعا مۇمكىندىك بەرىلەدى, – دەدى ەسەت بايكەن.
ءىس-شارا بارىسىندا بالالار-جاسوسپىرىمدەر سپورت مەكتەبى, مۇگەدەكتىگى بار ادامدارعا ارنالعان سپورت مەكتەبىنىڭ باسشىسى ازامات تاعاەۆ اتقارىلعان جۇمىستار تۋرالى باياندادى.
جاتتىقتىرۋشىلار گەننادي گەراسيمەنكو (پارا ۇستەل تەننيسى), اليا تۋسۋپبەكوۆا (اربامەن بيلەۋ), ەربول سيمامباەۆ (پارا تاەكۆوندو), مەيرامگۇل دۋكەۆا (پارا كاراتە), باقىتجان جۇماباەۆ (پارا ءجۇزۋ), دەنيس رىبكا (پارا پاۋەرليفتينگ), مەدەۋ ابەنوۆ (پارا ۆولەيبول) جانە بەك مولداحمەتوۆ (ەركىن كۇرەس) ماراپات مىنبەرىنە شىعىپ, ارنايى ماقتاۋ قاعاسىنا يە بولدى. بۇل قاتاردا ساندۋعاش بولىسباي (توعىزقۇمالاق), ۇلان انۋار (پاۋەرليفتينگ), ءتاجىباي تايمامبەتوۆ (سۋردو فۋتبول), يرينا ششەتينينا (جەڭىل اتلەتيكا), تويجان الشينوۆا (پارا كاراتە), قالىسبەك چالىسپاەۆ (سۋردو ۇستەل تەننيسى), رۋسلان احمەتوۆ (سۋردو فۋتبول), لاززات جۋسۋپوۆا (پارا كاراتە), ميحايل بۋرچالين (وقپەن اتۋ), رامازان تاۋبا (سۋردو دزيۋدو), احمەت اينابەكوۆ (گرەك-ريم كۇرەسى), زاير احمەدوۆ (قول كۇرەس), ەرنار مۋرزاگاليەۆ (سۋردو ءجۇزۋ) بولدى.
VI پاراليمپيادالىق ويىندارىنىڭ 28 جۇلدەگەرى دە سىي-قۇرمەتتەن قۇر قالمادى. ەل نامىسىن حالىقارالىق دەڭگەيدەگى دودالاردا قورعايتىن سپورتشىلاردى رۋحاني قولداۋ – ماڭىزدى مىندەت. ويتكەنى سپورتشىلاردىڭ دەڭگەيىنە قاراپ ەلدىڭ الەۋمەتتىك-ەكونوميكالىق قۋاتىن سارالاپ جاتادى.
«پارا ۇستەل تەننيسىمەن 8 جىلدان بەرى كاسىبي تۇردە اينالىسامىن. وزىمە ۇنايدى ءارى وزگە سپورتتان قاراعاندا جاراقات الۋ قاۋپى تومەن. وسى جىلدار ىشىندە ەل چەمپيوناتىندا بىرنەشە رەت ۇزدىك بولدىم. كۇزدە قىتايدا وتەتىن ليتسەنزيالىق پاراازيا ويىندارىنا قاتىسىپ, الەم ۇزدىكتەرى سانالاتىن قىتاي, وڭتۇستىك كورەيا جانە جاپونيانىڭ مىقتى سپورتشىلارىمەن كۇش سىناسامىن. جەڭۋگە بارىنشا كۇش سالامىن» دەپ جوسپارىمەن ءبولىستى الەكساندرا ستەپانوۆا.
