استانا قالاسىندا تالانتتى, تالاپتى سپورتشى كوپ. سولاردىڭ اراسىندا ەدىگە ەمبەردىنىڭ ورنى ەرەكشە. ول اۋىر اتلەتيكادان الەم رەكوردىن جاڭارتىپ, ءوزىنىڭ چەمپيونعا ءتان بولمىسىمەن كوپشىلىككە تانىلدى.
اتا-اناسى ونى ءۇش جاسىندا كاراتەگە بەرەدى. سوسىن سۋعا ءجۇزۋدى مەڭگەرىپ, كۇرەس زالىنىڭ ەسىگىن اشادى. ون جاسقا كەلگەندە اعاسى لەسبەك جانىبەكپەن بىرگە اۋىر اتلەتيكاعا كەلەدى.
– لەسبەك اعام بوكس زالىنا بارۋىما سەبەپشى بولدى. وندا ايبەك اعاي اۋىر اتلەتيكانىڭ ارتىقشىلىعىن بار ىنتا-ىقىلاسىمەن ءتۇسىندىرىپ, قىر-سىرىن ۇيرەتۋى وسى سپورتقا قىزىعۋشىلىعىمدى ارتتىردى. اۋىر اتلەتيكادا تەك ءوز-وزىنە سەنىمدى ادامدار عانا ناتيجە كورسەتە الادى, – دەپ ءسوزىن باستادى چەمپيون.
ءسوزسىز, مىقتى سپورتشىنىڭ ارتىندا بىلىكتى باپكەرىنىڭ ەڭبەگى تۇرادى. جاتتىقتىرۋشى شاكىرتىنىڭ بابىن تاۋىپ, سەنىمىن ارتتىرسا عانا جەڭىستىڭ جولى جاقىنداي تۇسەدى. ءبىز سپورتشىنىڭ جەكە باپكەرى ايبەك امانيازوۆتى سوزگە تارتتىق.
استانا قالاسى تۇرعىندارىنىڭ 37 پايىزى بۇقارالىق سپورتپەن اينالىسسا, كاسىبي تۇردە 18 مىڭنان استام سپورتشى (2 مىڭ ەرەسەك, 16 مىڭ ءجاسوسپىرىم) شۇعىلدانادى
– ەدىگە – جىگەرلى جىگىت, رۋحتى سپورتشى. ول تالاي رەت جەڭىلىستىڭ اششى ءدامىن تاتتى. الايدا بەرىلگەن جوق, ءوز-وزىنە سەندى. شەبەرلىگىن شىڭداپ, تەر توكتى. ءسويتىپ, 17 جاسقا تولعاندا كۇشى تولىسىپ, جەڭىسكە جەتۋدىڭ جولىن تاپتى. كەيبىر سپورتشىلار زالدا اۋىر سالماقتى باعىندىرىپ, ءوزىن چەمپيون سەزىنەدى. بىراق جارىس الاڭىنا شىققاندا جانىپ كەتىپ, ناتيجەلى ونەر كورسەتە المايدى. كەيبىر اتلەتتەر زالدا كوتەرە المايتىن شتانگانى جارىستا كوتەرىپ جاتادى. ەدىگەنى ەكىنشىسىنە جاتقىزۋعا بولادى. ونىڭ سىرى – ىشكى رۋحىندا. كەشەگى باتىر بابالارىمىزدىڭ ءبىر ەرەكشەلىگى ىشكى رۋحىنىڭ بيىكتىگىندە ەدى عوي! سول سەكىلدى ەدىگە شتانگانى كورگەندە ارقالانىپ, ونى باعىندىرماي تىنبايدى, – دەپ قىسقا قايىردى بىلىكتى باپكەر.
راس, ىشكى رۋحى مىقتى ادامدار بيىك بەلەستى باعىندىرادى. وسى رەتتە ەدىگەدەن العاشقى جەڭىسى تۋرالى سۇرادىق.
– 2015 جىلى «جاس باتىر» سپورت كەشەنىندە وتكەن قالالىق تۋرنيرگە قاتىستىم. سول جارىستا ءۇشىنشى ورىن الىپ, ابدەن جىلاعانىم ەسىمدە. قازىر ويلانىپ قاراسام, سپورت جولىنداعى ۇلگەن جەتىستىگىم ەكەن. ءويتكەنى ءوز-ءوزىمدى قامشىلاپ, تەحنيكالاردى تەرەڭ مەڭگەرۋىمە وسى جارىس تۇرتكى بولدى, – دەدى ول.
سپورتشىنىڭ بولمىس-بىتىمى مەن قابىلەت-قاسيەتىن ءبىر جاقسى بىلسە, ول – باپكەرى. اتلەتتىڭ كوڭىل كۇيىن باعىپ, ىشەتىن تاعامىن باقىلايدى. مۇنىڭ ءبارى وڭاي شارۋا ەمەس. ايبەك امانيازوۆتى سونداي ەڭبەكقور جاتتىقتىرۋشى دەۋگە بولادى. ودان شاكىرتىنىڭ ەڭ جوعارى جەتىستىگىن سۇرادىق.
– 2022 جىلى ەدىگە ەمبەردى تاشكەنتتە جاسوسپىرىمدەر اراسىندا وتكەن ازيا چەمپيوناتىندا, مەكسيكادا بايراعى كوتەرىلگەن الەم چەمپيوناتىندا دارالاندى. يندونەزيا اتلەتى ريزكي دجۋنيانسياعا تيەسىلى الەم رەكوردىن جاڭارتتى. وتكەن جىلدىڭ قورىتىندىسىمەن ەلدىڭ ۇزدىك سپورتشىسى اتاندى. بۇل جەڭىستى جولدىڭ باسى عانا. مەكسيكادا جاستار اراسىندا وتەتىن الەم چەمپيوناتىنا تىڭعىلىقتى دايىندالۋدامىز. شاكىرتىم بايراقتى باسەكەدە سەنىم ۇدەسىنەن شىعاتىنىنا سەنەمىن, – دەدى اۋىر اتلەتيكادان استانا قالاسىنىڭ اعا باپكەرى ا.امانيازوۆ.
يليا يلين سىندى ەدىگە دە سەرپە كوتەرۋگە ەپتى. مىسالى, مەكسيكاداعى الەم چەمپيوناتىندا ول سەرپە كوتەرۋدە 172 كەلىنى باعىندىرسا, ەكىنشى ورىندى العان وزبەكستاندىق د.ەرماتوۆ 157 كەلى كوتەردى. كىم بىلەدى, داڭقتى سپورتشى يليا سىندى ەدىگە دە ەلىمىزدىڭ كوك بايراعىن بيىكتەتەدى. ءبىز سوعان سەنەمىز!
