استانا قالاسىنىڭ اۋماعىندا العاش رەت بيولوگيالىق پرەپاراتپەن شىبىن-شىركەيلەرگە قارسى دەزينسەكتسيالىق جۇمىستار جۇرگىزىلدى.
قالا اۋماعىنداعى بىرقاتار سۋ ايدىنىنداعى دەرناسىلدەردى ۋلاۋدا جەرۇستى ادىسىمەن بۇركۋ ارقىلى «باكتيتسيد» بيولوگيالىق پرەپاراتى قولدانىلدى. اتالمىش جۇمىستىڭ باستى ماقساتى – سۋ ايدىندارىن وڭدەۋ بارىسىندا فلورا مەن فاۋناعا زيان كەلتىرمەي, شىبىن-شىركەي سانىن ازايتۋ.
دەزينسەكتسيالىق وڭدەۋ جۇمىسى نۇرا-ەسىل كانالى, ەسىل, قاراسۋ, اقبۇلاق, سارىبۇلاق وزەندەرى, بۇزىقتى, تالدىكول, كىشى تالدىكول كولدەرى, بوتانيكالىق باقتاعى توعاندار, «زەلەنىي كۆارتال» تۇرعىن ءۇي كەشەنى اۋماعىن قامتىدى. بۇرىن بۇل وبەكتىلەر بالىقتار مەن قۇستار سياقتى ءتىرى اعزالاردىڭ بولۋىنا بايلانىستى ماسالاردىڭ دەرناسىلدەرىنەن وڭدەلمەگەن.
«باكتيتسيد» – قاۋىپسىز بيولوگيالىق پرەپارات. وڭدەۋ جۇمىسى دەزينسەكتسيالىق جابدىق ورناتىلعان ارنايى سۋ تەحنيكاسىمەن جۇرگىزىلدى. سونداي-اق, كۆادروكوپتەر ارنايى اپپاراتى قولدانىلادى. دەزينسەكتسيالىق وڭدەۋدەن بۇرىن ەنتومولوگتار مەن سەس وكىلدەرىنىڭ عىلىمي توبى دەرناسىلدەردىڭ بارىن الدىن الا انىقتاپ, زەرتتەۋ جۇمىسىن جۇرگىزدى. الداعى ۋاقىتتا مۇنداي جۇمىستى جىل سوڭىنا دەيىن بەس رەت جۇرگىزۋ جوسپارلانىپ وتىر.
