كەشە ەلورداداعى ۇلتتىق اكادەميالىق كىتاپحانادا ءابدىراحمان جالەلۇلىنىڭ «ءومىر جولىمداعى سوڭعى كوش» اتتى ومىرباياندىق كىتابىنىڭ تۇساۋى كەسىلدى.
«وتانداستار قورى» كەاق, قر ۇلتتىق اكادەميالىق كىتاپحاناسى, «زۋقا باتىر ءسابيتۇلى» قوعامدىق قورى بىرلەسىپ وتكىزگەن بۇل شاراعا تاريحشى عالىمدار, قوعام قايراتكەرلەرى مەن بۇقارالىق اقپارات قۇرالدارىنىڭ وكىلدەرى قاتىستى.
شارانى باسقارىپ, جۇرگىزگەن «وتانداستار» قورىنىڭ پرەزيدەنتى ابزال ساپاربەكۇلى حح عاسىردىڭ باسىندا جانە ورتاسىندا قازاق حالقىنىڭ باسىنا تۇسكەن اۋىر ناۋبەت, زۇلمات جىلدار تۋرالى توقتالىپ, «جۇمىر جەردىڭ جوتاسى» اتانعان تيبەت قىراتى – گيمالاي تاۋىنان اسقان قازاق كوشىنىڭ ادامزات تاريحىنا وشپەيتىن ءىز قالدىرعانىن ايرىقشا اتاپ ءوتتى. «ءبىز بۇگىن شەتەلدەگى قازاقتاردىڭ اراسىنداعى تانىمال تاريحي تۇلعانىڭ ءبىرى, التايدان باستالىپ, باركول, تيبەت جوتاسى ارقىلى گيمالايدى اسقان, ءۇندىستان مەن پاكىستان ارقىلى تۇركياعا جەتكەن ايتۋلى كوشتىڭ كوزى ءتىرى كۋاگەرى, قوعام قايراتكەرى – ءابدىراحمان جالەلۇلىنىڭ «ءومىر جولىمداعى سوڭعى كوش» اتتى ومىرباياندىق كىتابىنىڭ تۇساۋكەسەرىنە جينالىپ وتىرمىز. بۇل كىتاپ قازاق تاريحىنىڭ ماڭىزدى قۇرامداس بولىگى سانالاتىن التايدان انادولىعا دەيىن اۋعان قازاق كوشىنىڭ باستان كەشكەن كەشىرمەلەرىمەن قۇندى دەپ ويلايمىن. 2022 جىلى قازاق كوشىنىڭ ءتۇبى ءبىر تۇرىك ەلىنە قونىس اۋدارعانىنا 70 جىل تولدى. وسى ءبىر تاريحي ساتكە وراي, «وتانداستار قورى» كەاق قازاقستان ۇلتتىق تەلەارناسىمەن بىرلەسىپ, التايدان انادولىعا دەيىن اۋعان كوش جايلى دەرەكتى فيلم ءتۇسىرىلدى. جاقىندا ەلىمىزدە جانە تۇركيادا وسى ءفيلمنىڭ تۇساۋكەسەرى وتەدى. ماقسات – كوشتىڭ كۋاگەرلەرىنەن ناقتى دەرەك الىپ, وسى كوشكە تاريحي تۇرعىدان باعا بەرۋ» دەدى ول.
ءابدىراحمان جالەلۇلى – قىتاي قازاقتارىنان شىققان ۇلت-ازاتتىق كوتەرىلىستەرىنىڭ كوش باسشىلارىنىڭ ءبىرى ايگىلى زۋقا باتىردىڭ نەمەرەسى. 1938 جىلى باركولدە دۇنيەگە كەلىپ, ون نەشە جاسىندا كوشپەن بىرگە گيمالاي اسىپ, تۇركياعا جەتكەن. قازىر گەرمانيانىڭ كيولن قالاسىندا تۇرادى. ەۋروپا قازاقتارى قاۋىمداستىعىنىڭ نەگىزىن قالاۋشى جانە قۇرمەتتى توراعاسى. دۇنيەجۇزى قازاقتارى قاۋىمداستىعىنىڭ ەكى مارتە تورالقا مۇشەسى بولعان كورنەكتى قوعام قايراتكەرى.
