«استانا جاستارى» جاستار رەسۋرستىق ورتالىعىنىڭ ۇيىتقى بولۋىمەن «ۇزدىك» جوباسى اياسىندا داياشىلار سىنعا ءتۇستى.
ەلورداداعى «Millionaire» مەيرامحاناسىندا وتكەن ءىس-شاراعا 8 داياشى قاتىسىپ, ءوزارا سىنعا ءتۇستى.
ۇزدىكتەردى انىقتايتىن سايىستى اشقان «استانا جاستارى» جاستار رەسۋرستىق ورتالىعىنىڭ جەتەكشىسى شىڭعىس تىلەۋلين:
– «ۇزدىك» جوباسى اياسىنداعى بايقاۋلار جاستار ساياساتى ماسەلەلەرى باسقارماسىنىڭ قولداۋىمەن ىسكە اسۋدا. جوبا اياسىندا جەكە جانە كاسىبي قاسيەتتەردى دامىتۋ بويىنشا وقىتۋ سەمينار-ترەنينگتەرى, شەبەرلىك سىنىپتارى وتكىزىلۋدە. كومپيۋتەرلىك ساۋاتتىلىق نەگىزى, باعدارلامالاۋ كۋرسى, SMM, كوپيرايتينگ, Social Media Marketing-مەنەدجەر, زاماناۋي قوعام كوشباسشىسى جانە ت.ب قىسقا مەرزىمدى وقىتۋ باعدارلاماسىن ۇيىمداستىرىپ كەلەمىز, – دەدى.
استانا قالاسىندا مەيرامحانا, اسحانا, كافە, بار جۇزدەپ سانالادى. ياعني قالا تۇرعىندارى مەن قوناقتارى اس-اۋقات ىشەتىن ورتالىقتارعا سۇرانىس ارتتى. ەندى سەرۆيستىك قىزمەتىنىڭ ساپاسىن ارتتىرۋ – ماڭىزدى مىندەت. بايقاۋدىڭ نەگىزگى ماقساتى وسىمەن ۇندەسەدى.
بۇل تۋرالى «Millionaire» مەيرامحاناسىنىڭ شەف-اسپازشىسى الەكساندر كيم:
– ءبىرىنشى قاتىسۋشىلاردىڭ ىدىستى ۇستەلگە قويۋى باعالانادى. ەكىنشىسى, تاعامدى ۇسىنۋ مادەنيەتى, سوڭعىسى سۋسىندى قيۋ نەمەسە ۇسىنۋىن قارايمىز, – دەپ ءتۇسىندىردى.
قاتىسۋشىلار اراسىندا 14-25 جاس ارالىعىنداعى جاستار بولدى. ەڭ جاس قاتىسۋشى 14 جاستاعى ديانا ازاتوۆا بولدى. ول №62 مەكتەپتە 9-سىنىپتا وقيتىنىن, اتا-اناسىنىڭ رۇقساتىمەن سەنبى, جەكسەنبى كۇنى «مەرۋەرت» بانكەتتىك زالىندا جۇمىس ىستەيتىنىن ايتتى.
ال تاجىريبەلى داياشى ماكسيم سوروكين:
– 25 جاستامىن. بۇل سالاداعى تاجىريبەم – 7 جىل. كەشكى ساعات 19.00-دەن تاڭعى 05.00-گە دەيىن جۇمىس ىستەۋ كەزىندە جۇمىستىڭ قيىندىعىمەن قاتار قىزىقتى ساتتەرى كوپ بولادى, – دەدى.
