ۇزدىكتەر انىقتالدى

«سامۇرىق-قازىنا» اق-تىڭ 15 جىلدىعىنا وراي وتكىزىلگەن VIII سپارتاكيادا ءوز مارەسىنە جەتتى.

«ءبىر كوماندا – ءبىر ماقسات!» ۇرانى اياسىندا وتكەن سپورت سايىسىندا مۇناي-گاز ونەركاسىبى, مەتاللۋرگيا, كولىك جانە باسقا دا سالا ماماندارى باق سىنادى. قور قۇرامىنداعى 15 كومپانيا جانە ءبىر قۇراما 11 سپورت تۇرىنەن كۇش سىنادى. جالپى سپارتاكياداعا 845 قىزمەتكەر قاتىستى.

ۇستەل تەننيسى, شاحمات, توعىزقۇمالاق, ارمرەستلينگ, ءجۇزۋ جانە فۋتزال, ۆولەيبول, باسكەتبول, ارقان تارتۋ, اسىق اتۋ جانە كيبەرسپورت بويىنشا شەبەرلىگىن سىنادى.

«بيىل سپارتاكيادانىڭ بايراعى سەگىزىنشى رەت كوتەرىلىپ, تارتىستى دا قىزىقتى ويىنعا كۋا بولدىق. سالاۋاتتى ادام ەڭبەك ءونىمىن ارتتىرىپ, ساپالى جۇمىس ىستەيدى. وسى سەبەپتى قور بۇقارالىق سپورتتى دامىتۋعا دەم بەرىپ قانا قويماي, قىزمەتكەرلەردىڭ دە سالاۋاتتى ءومىر سالتىن ۇستانۋعا جان-جاقتى جاعداي قالىپتاستىرادى» دەدى قوردىڭ ەڭبەك-الەۋمەتتىك قاتىناستار جانە ەڭبەكتى قورعاۋ بويىنشا باسقارۋشى ديرەكتورى عيبرات اۋعانوۆ.

تارتىستى سايىستىڭ قورىتىندىسى بويىنشا كۋبوكتى «قازمۇنايگاز» ۇك» اق كومانداسى يەلەندى. ال «سامۇرىق-ەنەرگو» اق كومانداسى ەكىنشى, «قازاتوم­ونەركاسىپ» ۇاك» اق ءۇشىنشى ورىندى ەنشىلەدى.