استانا قالاسىندا اۋلا كوماندالارى اراسىندا فۋتبولدان «اۋلا ليگاسى» ءتۋرنيرى وتۋدە. تامىز ايىنىڭ باسىندا ەلوردادا اۋلا فۋتبولىنا ىرىكتەۋ كەزەڭى ءوتىپ, ءتۋرنيردىڭ كەلەسى كەزەڭىنە 53 كوماندا جولداما الدى.
تۋرنير قالانىڭ بەس سپورت الاڭىندا وتۋدە. ەلوردانىڭ فۋتبول سۇيەر جانكۇيەرلەرى سارىارقا اۋدانىنداعى «كوكتال» پاركى (بەيبارىس سۇلتان كوشەسى), الماتى اۋدانىنداعى قازاقستان فۋتبول فەدەراتسياسىنىڭ (قفف) اشىق فۋتبول الاڭىنداعى (ب.مومىشۇلى داڭعىلى, 5ا) تارتىستى ويىنداردى كورە الادى. بايقوڭىر اۋدانىنىڭ اۋلا كلۋبتارى دا قفف اشىق فۋتبول الاڭىندا باق سىنايدى. ال نۇرا اۋدانىنداعى اۋلا كوماندالارى №81 Astana English school گيمنازياسىنىڭ الاڭىندا جانە ەسىل اۋدانىنداعى كوماندالار قابانباي باتىر كوشەسىندەگى №31 تۇرعىن ءۇي كەشەنى ماڭىنداعى الاڭدا ءوزارا مىقتىنى انىقتايدى.
30-31 تامىزدا بەس اۋداننان ۇزدىك شىققان كوماندالار «جاس باتىر» سپورت كەشەنىندە كەزدەسەدى.
اۋلا كوماندالارى اراسىنداعى فۋتبول ءتۋرنيرى جازعى دەمالىس كەزىندە بالالار مەن جاستاردىڭ بوس ۋاقىتىن ۇيىمداستىرۋ, قالادا بۇقارالىق فۋتبولدى دامىتۋ, جاسوسپىرىمدەردى دەنە شىنىقتىرۋ جانە سپورتپەن تۇراقتى اينالىسۋعا تارتۋ ماقساتىندا وتكىزىلۋدە. برازيليا, گەرمانيا, بريتانيا سىندى فۋتبول دامىعان ەلدەردە اۋلا فۋتبولىنا ەرەكشە ءمان بەرىلەدى. اسىرەسە برازيليادا جاعاجاي جانە اۋلا فۋتبولى دامىپ, قانشاما تالانتتى فۋتبولشىنىڭ باعىن اشتى. فۋتبول پاتشاسى اتانعان پەلە دە اۋلادا دوپ تەۋىپ شەبەرلىگىن شىڭداعانى بەلگىلى. سوندىقتان اۋلا ليگاسىن دامىتۋ – ماڭىزدى مىندەتتىڭ ءبىرى.
