استانادا يگەرىلمەگەن قانشا جەر تەلىمى بار؟ يەلىگىندەگى جەردى يگەرە الماي جاتقان ادامدارعا قانداي اكىمشىلىك شارالار قولدانادى؟
مەملەكەت باسشىسىنىڭ تاپسىرماسىمەن استانا قالاسىنىڭ اكىمى اسەت يسەكەشەۆ يگەرىلمەگەن جەر ۋچاسكەلەرىن مەملەكەت مەنشىگىنە قايتارۋ, رۇقسات ەتىلمەگەن قوقىس ورىندارىن بولدىرماۋ جانە قۇرىلىس الاڭدارىنداعى قوقىستى ۋاقىتىلى شىعارۋ ماسەلەلەرى جونىندەگى ءىس-قيمىلدار جوسپارىن بەكىتتى.
بەكىتىلگەن ءىس-شارالار اياسىندا ەلوردا اكىمدىگىندە استانا قالاسى اكىمىنىڭ ءبىرىنشى ورىنباسارى سەرگەي حوروشۋننىڭ توراعالىعىمەن وتىرىس ءوتتى. وعان يگەرىلمەيتىن جەر ۋچاسكەسىنىڭ 400 جۋىق يەسى قاتىستى.
ەلوردا باسشىسىنىڭ ءبىرىنشى ورىنباسارى سەرگەي حوروشۋننىڭ ايتۋىنشا, ەسكەرتۋ جاسالعاننان كەيىن ءبىر جىلدىڭ ىشىندە يگەرىلمەگەن جەر ۋچاسكەلەرى بويىنشا سوتقا ءماجبۇرلى تۇردە الۋ بويىنشا تالاپ-ارىز ۇسىنىلادى.
2012-2016 جىلدارى ارالىعىندا ەلوردا اكىمدىگى پروكۋراتۋرا ورگاندارىمەن بىرگە, قالا اۋماعىنداعى يگەرىلمەيتىن جالپى اۋدانى 16 مىڭ گا 1084 جەر ۋچاسكەسى انىقتالدى. سونىڭ ىشىندە قابىلدانعان شارالاردىڭ ءناتيجەسىندە جالپى اۋدانى 6 مىڭ گا 265 يگەرىلمەيتىن جەر ۋچاسكەسى (سونىڭ ىشىندە: جالپى اۋدانى 5,2 مىڭ گا 88 اۋىل شارۋاشىلىق ماقساتتاعى جەر ۋچاسكەسى, اۋدانى 0,8 مىڭ گا 177 كوممەرتسيالىق نىسان) مەملەكەتكە قايتارىلدى.
بۇعان دەيىن پايدالانىلماي كەلگەن اۋدانى 4,4 گا جەر ۋچاسكەسى (سونىڭ ىشىندە: اۋدانى 4 مىڭ گا اۋىل شارۋاشىلىق ماقساتتاعى 54 جەر ۋچاسكەسى, اۋدانى 0,4 مىڭ گا 286 كوممەرتسيالىق نىسان) يگەرىلە باستادى.
سونداي-اق, اۋدانى 5,6 مىڭ گا 479 جەر ۋچاسكەسى بويىنشا پايدالانىلمايتىن جەر ۋچاسكەلەرىن قايتارۋدى قامتاماسىز ەتۋ بويىنشا جول كارتاسى ازىرلەندى. قۇجات اياسىندا بارلىق پايدالانىلمايتىن جەرلەردىڭ يەلەرىنە ءبىر جىلدىڭ ىشىندە جەردى ماقساتتى پايدالانۋ قاجەتتىلىگى تۋرالى ۇيعارىم بەرىلدى.