قالا تۇرعىندارى سانىنىڭ وسۋىنە بايلانىستى الەۋمەتتىك نىساندارعا تۇسەتىن سالماق ارتىپ كەلەدى. ءبىلىم وردالارى, اسىرەسە حالىق كوپ شوعىرلانعان ەلدى-مەكەندەردە سالىنىپ جاتىر. ەلوردا اكىمى التاي كولگىنوۆ قالاداعى مەكتەپتەر قۇرىلىسىنىڭ قالاي ءجۇرىپ جاتقانىن تەكسەردى.
«بۇگىن بىرقاتار وقۋ نىساندارىنىڭ قۇرىلىس بارىسىمەن تانىستىم. قازىرگى №60 مەكتەپ-ليتسەي اۋماعىندا (كۋبرين 21/1 كوشەسى) تاعى ءبىر مەكتەپ سالىپ جاتىرمىز. مەكتەپ اۋماعىن كەڭەيتەمىز. بۇل مەكتەپكە ارتىلعان شامادان تىس جۇكتەمەنى ازايتىپ, جاڭا وقۋ ورىندارىن قۇرۋعا مۇمكىندىك بەرەدى. بيىل وسى مەكتەپتى پايدالانۋعا بەرەمىز. اباتتاندىرۋ جۇمىستارىنا نازار اۋدارۋ قاجەت. وسى جىلى بىلتىرعى جىلمەن سالىستىرعاندا ەكى ەسە كوپ مەكتەپ سالامىز. بيىل سالىناتىن مەكتەپ سانى – 12» دەپ جازدى قالا باسشىسى ءوزىنىڭ instagram پاراقشاسىندا.
كەلەسى جىلدارعا دا دايىندىق ءجۇرىپ جاتىر. قالا اكىمى 2021 جىلى پايدالانۋعا بەرىلەتىن ۇلى دالا مەن №39 كوشە قيىلىسىندا ورنالاسقان ءبىلىم ورداسىن دا ارالادى. مەكتەپ 1200 وقۋشىعا ەسەپتەلگەن (ەكى اۋىسىمدا – 2400). قۇرىلىسقا جەكە ينۆەستوردىڭ قاراجاتى جۇمسالادى.
