«نۇرلى ەرتىس» باعدارلاماسى اياسىندا ەلوردادان ەكىباستۇز قالاسىنا قونىس اۋدارۋشىلاردىڭ ونىنشى لەگى, بارلىعى 16 وتباسى قونىس اۋداردى.
ەكىباستۇز قالاسىنىڭ جۇمىسپەن قامتۋ ورتالىعىنىڭ مامانى ايگۇل شابەكوۆانىڭ ايتۋىنشا, بۇل جولى 80 ادام (51 بالا جانە 29 جۇمىسقا جارامدى ازاماتتار) كوشتى.
تالاپقا سايكەس وتباسى مۇشەلەرىنىڭ بىرەۋىنىڭ ارنايى ماماندىعى بولۋى كەرەك. نۇر-سۇلتان قالاسىندا كەم دەگەندە ءبىر جىل ۋاقىت تۇراقتى تىركەۋدە تۇرعان وتباسىلار باعدارلاماعا قاتىسا الادى.
ەكىباستۇز قالاسىنا كوشۋدى قالايتىن وتباسىلاردى ىرىكتەۋ جالعاسۋدا.
قازىرگى ۋاقىتتا 1 بولمەلى پاتەرلەردى العىسى كەلەتىن وتباسىلاردان ءوتىنىش كوبەيۋدە. «نۇرلى ەرتىس» باعدارلاماسى شەڭبەرىندە بۇعان دەيىن ەلوردادان كوشكەن 205 وتباسى قازىرگى تاڭدا ەكىباستۇز قالاسىندا ەكى جانە ءۇش بولمەلى پاتەرلەردە تۇرادى. «باعدارلاما اياسىندا قاتىسۋشىلارعا مەملەكەت تاراپىنان ماتەريالدىق قولداۋ تۇرلەرى كورسەتىلەدى. ءبىرىنشىسى – تىركەۋگە تۇرعاننان كەيىن قونىس اۋدارۋشىلاردى قابىلداۋدىڭ وڭىرلىك كۆوتاسىنا قۇجات تاپسىرىلىپ, وڭ شەشىم قابىلدانعان جاعدايدا 35 ايلىق ەسەپتىك كورسەتكىش كولەمىندە 88375 تەڭگە ادام باسىنا تولەنەتىن ءبىر رەتتىك تولەم. ەكىنشىدەن, قونىستانۋشىلاردىڭ ءۇي جالداۋ جانە تولەمدەردى وتەۋ جايىندا, ياعني بۇل وتباسىلار بەرىلگەن ۇيلەردە ءبىر جىل كولەمىندە تەگىن تۇرادى. تۇرعىن ۇيمەن قامتاماسىز ەتۋمەن قاتار, بىلىكتىلىگى بار ماماندار جۇمىسقا ورنالاسادى. كوپبالالى وتباسىلاردىڭ بالالارى بالاباقشالار مەن مەكتەپتەردە تەگىن ورىندارمەن, وقۋشىلار مەكتەپ فورماسى جانە قۇرال-جابدىقتارمەن, تەگىن تاماقپەن قامتاماسىز ەتىلەدى. بارلىق بالالارعا جانە اتا-انالارعا ارنالعان كولىك بيلەتتەرى بەرىلەدى. كوپبالالى وتباسىلار ەكىباستۇز قالاسىندا تۇراقتى تىركەۋدە بولادى» دەيدى ا.شابەكوۆا.
وسى جولى ەكىباستۇزعا كوشۋگە نيەت بىلدىرگەن ادامداردىڭ ءبىرى – بەس بالانىڭ اكەسى ابىلاي تۇرلىباەۆ. ەلوردادا 2017 جىلدان بەرى تۇراقتى تىركەۋدە تۇرعان.
«ءوزىم ەلەكتر مامانىمىن. جۇبايىم قازىرگى ۋاقىتتا بالا كۇتىمى بويىنشا ۇيدە وتىر. بالالارىمنىڭ ۇلكەنى – 12 جاستا, ال كىشىسى – 5 ايلىق. ەكىباستۇزدا ءوزىمدى جۇمىسقا تۇرعىزىپ, بالالارىمدى مەكتەپكە, بالاباقشاعا ورنالاستىرىپ, ەكى بولمەلى پاتەر بەرىپ جاتىر, سوعان قاتتى قۋانىشتىمىز» دەيدى ول.
جادىرا مۇراتبەكوۆا
