قالا ماڭىنداعى «زولوتوي فازان» دەمالىس ورنىندا ەلوردانىڭ ءار سالاداعى بەلسەندى قىز-جىگىتتەرىنە ارنالعان «Jastar jalyny-2019» لاگەرى ءوتتى.
ءۇش كۇنگە سوزىلعان بۇل ءىس-شاراعا قاتىسۋشىلاردىڭ كوبى – الەۋمەتتىك جوبامەن ەرىكتى تۇردە اينالىسىپ جۇرگەن جاس ۆولونتەرلەر.
– بۇگىندە «استانا جاستارى» ۇيىمىندا مىڭنان اسا ۆولونتەر تىركەلگەن. اتالعان كورسەتكىش ءوسۋ ۇستىندە. جالپى, ۆولونتەرلىك دەگەنىمىز – ۇلكەن مەكتەپ. سونىڭ ارقاسىندا بىرەۋى – مەملەكەتتىك قىزمەتتە, بىرەۋى كاسىپكەرلىكتە ءوز جولدارىن تاۋىپ جاتادى. الداعى «ۆولونتەر جىلىنىڭ» اياسىندا ءبىز وسى سالاداعى ازاماتتاردى ودان ءارى ىنتالاندىرىپ, ولاردىڭ سانىن ارتتىرعىمىز كەلەدى, – دەدى نۇر-سۇلتان قالاسى قوعامدىق دامۋ ىستەرى باسقارماسىنىڭ باسشىسى تالعات راحمانبەردى.
«استانا جاستارى» مەكەمەسىنىڭ جەتەكشىسى شىڭعىس تىلەۋليننىڭ ايتۋىنشا, لاگەر وسىمەن ءۇشىنشى جىل قاتارىنان ۇيىمداستىرىلىپ كەلەدى. وعان ىرىكتەۋ ءۇردىسى ونلاين تارتىپپەن جۇرگىزىلگەن. شارت بويىنشا ۇمىتكەرلەر جاسىنا ەش شەكتەۋ قويىلماعان, ياعني قاتىسۋشىلاردىڭ ءبىرى – وقۋشى, ءبىرى – ستۋدەنت, ەندى ءبىرى – قىزمەتكەر. ءوتىنىش بەرگەن ءجۇز شاقتى ادام وزدەرىنىڭ الەۋمەتتىك جوبالارىن ۇسىنعان.
