الداعى اپتادان باستاپ قالالىق ءبىلىم باسقارماسىنىڭ قىزمەتكەرلەرى اتا-انالارمەن, «نۇر وتان» پارتياسىنىڭ مۇشەلەرىمەن, «استانا – ادالدىق الاڭى» جوباسىنىڭ وكىلدەرىمەن بىرلەسىپ ەلورداداعى مەكتەپكە دەيىنگى مەكەمەلەردىڭ تاماقتاندىرۋ ساپاسىن باقىلاۋ ماقساتىندا مونيتورينگ جۇرگىزەدى.
مونيتورينگكە قاتىسقىسى كەلەتىن اتا-انالار 20 قىركۇيەككە دەيىن bilim.astana.kz سايتىنداعى ارنايى بولىمدە ءوتىنىش قالدىرۋى قاجەت. ءبىلىم باسقارماسىنىڭ باسشىسى ءانۋار جانعوزيننىڭ ايتۋىنشا, مۇنداي تەكسەرىس بالاباقشالاردىڭ اسحاناسىنداعى كەمشىن تۇستاردى جويۋعا كومەكتەسەدى. وسى رەتتە ول جۋىردا استانالىق بالالاردى دامىتۋ ورتالىقتارىنىڭ بىرىندە بولعان ون شاقتى بالانىڭ تاماقتان ۋلانۋ فاكتىسىن تىلگە تيەك ەتىپ, بۇگىندە اتالعان فاكتى بويىنشا كوميسسيا قۇرىلعانىن, ءىستىڭ ءمان-جايى الداعى ۋاقىتتا انىقتالاتىنىن مالىمدەدى.
– ايتا كەتەيىك, وسىنداي مونيتورينگ وتكەن جىلى مەكتەپتەردە جۇرگىزىلگەن ەدى. سونىڭ ناتيجەسىندە مىناداي ناتيجەلەرگە قول جەتكىزدىك. بىرىنشىدەن, تاماق جەتكىزۋشىلەرگە ارنالعان بايقاۋدى ەندى مەكتەپتەر ەمەس, اكتيۆتەر مەن مەملەكەتتىك ساتىپ الۋ باسقارماسى ۇيىمداستىراتىن بولدى. بۇل وزگەرىس بايقاۋدىڭ بارىنشا اشىق ءوتۋىن قامتاماسىز ەتۋگە باعىتتالدى. ەكىنشىدەن, بارلىق مەكتەپتەردىڭ اسحانالارىنا بەينەباقىلاۋ كامەرالارى ورناتىلدى. ۇشىنشىدەن, بالالار اسحانالاردا قولما-قول تولەمسىز, ياعني كارتوچكامەن ەسەپ ايىرىسۋ جۇيەسىنە كوشتى. تورتىنشىدەن, مونيتورينگ بارىسىندا بارلىق 85 مەكتەپتىڭ 55-ىنەن كەمشىلىكتەر انىقتالىپ, ونداعى تاماق جەتكىزۋشى ۇيىمدار اۋىستىرىلدى, – دەدى ءبىلىم باسقارماسىنىڭ باسشىسى ءانۋار جانعوزين.
ۆەدومستۆو باسشىسىنىڭ ايتۋىنشا, وتكەن جىلعى تەكسەرىستەن كەيىن مەكتەپتەگى تاماقتانۋ ساپاسىنا قاتىستى جۇرتشىلىق تاراپىنان تۇسەتىن شاعىمدار 35 پايىزعا ازايعان.
بۇگىندە مەكتەپتەردە دە, بالاباقشالاردا دا تاماقتانۋ ساپاسىن قاداعالاۋ ءۇشىن قۇرىلعان براكەراجدىق كوميسسيا جۇمىس ىستەيدى. ونىڭ قۇرامىنا كىرگىسى كەلەتىن اتا-انالارعا قويىلار ەكى تالاپ بار: الگى اتا-انانىڭ بالاسى سول مەكتەپتە وقۋى نەمەسە سول بالاباقشادا تاربيەلەنۋى كەرەك, مۇنىمەن قوسا اتا-انادا سانيتارلىق كىتاپشا بولۋى شارت.
