17 ملرد تەڭگە ۇنەمدەلدى
ەڭبەكاقى تولەۋدىڭ جاڭا جۇيەسى ەنگىزىلگەلى بوس لاۋازىمدارعا ورنالاسۋعا ۇمىتكەرلەردىڭ سانى ارتقان. بۇل تۋرالى استانا قالاسى اكىمدىگىنىڭ ءباسپاسوز قىزمەتى حابارلادى.
ماسەلەن, جىل باسىنان بەرى 160 بوس جۇمىس ورنىنا 950 ءوتىنىش تۇسكەن نەمەسە ءبىر بوس جۇمىس ورنىنا 6 ۇمىتكەردەن كەلەدى. بۇل كورسەتكىش وتكەن 2017 جىلمەن سالىستىرعاندا جوعارى. بۇل رەتتە ۇمىتكەرلەردىڭ ساپالىق قۇرامى دا جاقسارعان. اكىمدىكتەگى مەملەكەتتىك قىزمەتكە شەتەلدىك جوعارى وقۋ ورنىن تامامداعان 15 تۇلەك, ال كۆازيمەملەكەتتىك سەكتور توپ-مەنەدجمەنتىنەن 10 قىزمەتكەر قابىلداندى.
سونىمەن قاتار مەملەكەتتىك قىزمەتكەرلەر 2018 جىلدىڭ سەگىز ايىندا شامامەن 17 ملرد تەڭگە ۇنەمدەگەن.
«اكىمشىلىك شىعىستارعا بايلانىستى قالا تۇرعىندارى جاقسى بىلەدى, ەلوردا اكىمدىگى قىركۇيەك ايىنان باستاپ تاكسوپارك قىزمەتىنە كوشتى. اۆتوكولىك ساتىپ الۋدان باس تارتىپ تاكسي قىزمەتىنە جۇگىنۋ 5 جىل ىشىندە شامامەن 1,5 ملرد تەڭگەنى ۇنەمدەۋگە مۇمكىندىك بەرەدى» دەيدى استانا اكىمى اپپارات باسشىسىنىڭ ورىنباسارى رۋسلان تايگەن.