قازاقستاننىڭ وڭتۇستىگىنەن سولتۇستىككە كوشىپ بارعان وتباسىلاردىڭ سانى 1,5 مىڭعا جۋىقتادى. كوشكە ىلەسكەندەردىڭ باسىم بولىگى سولتۇستىك قازاقستان, قوستاناي, پاۆلودار, شىعىس قازاقستان وبلىستارىنا قونىس اۋدارىپتى.
«جۇمىس كۇشى جەتىسپەيتىن وڭتۇستىك وڭىرلەردەن سولتۇستىك وبلىستارعا 1 488 وتباسى نەمەسە 4 925 ادام كوشىرىلدى. سونىڭ ىشىندە ەڭبەككە جارامدى جاستاعىلار – 2 523 ادام, ولاردىڭ 1 424-ءى نەمەسە 56 پايىزى جۇمىسقا ورنالاستى. 87 ادام كاسىپكەرلىكپەن اينالىسادى» دەپ مالىمدەدى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا.
ستاتيستيكا بويىنشا, شىعىس قازاقستان وبلىسىنا – 413 وتباسى, سولتۇستىك قازاقستان وبلىسىنا – 400, پاۆلودار وبلىسىنا – 361, قوستاناي وبلىسىنا – 224, اقمولا وبلىسىنا 90 وتباسى كوشىپ بارعان. ارينە, كوشكە ىلەسكەن قازاقتىڭ باسىن اۋىرتىپ, بالتىرىن سىزداتقان ماسەلەنىڭ ءبىرى – باسپانا. ءبىز بۇل تۋرالى ناقتىلاپ جازعان ەدىك (قاراڭىز: «استانا اقشامى», «قوزعال حالقىم, سولتۇستىككە!», 4 قىركۇيەك, 2018 جىل). كوشىپ-قونۋعا بەرىلەتىن 84,2 مىڭ تەڭگە باسپانا ماسەلەسىن شەشپەيدى. مەملەكەت كوشكەن جۇرتتى قولداۋ ءۇشىن باسپانامەن قامتاماسىز ەتەتىن بولدى. ءمادينا ابىلقاسىموۆا ۇكىمەت وتىرىسىندا سولتۇستىك قازاقستان وبلىسىنا الداعى ءۇش جىلدا كوشىپ باراتىن 3 مىڭعا جۋىق قازاقستاندىقتارعا ءۇي بەرىلەتىنىن حابارلادى. بىرىنشىدەن, ولار جۇمىس بەرۋشىنىڭ شاقىرۋىمەن بارۋى ءتيىس. ەكىنشىدەن, قونىس اۋدارعان جەرىندە بەس جىلعا دەيىن تۇرۋعا مىندەتتى. بۇل ماقساتقا ەل بيۋدجەتىنەن 2019-2021 جىلدارعا 15 ملرد تەڭگە ءبولۋ قاراستىرىلىپ قويىپتى.
بيىل 9 شىلدەدە وتكەن ۇكىمەت ماجىلىسىندە مينيستر سولتۇستىك وڭىرلەرگە 9,1 مىڭ ادام كوشۋدى جوسپارلاعانىن ايتىپ ەدى. بۇل جولعى باسقوسۋدا ول ساننىڭ 8 مىڭعا دەيىن ازايعانىن جەتكىزدى.
