ەلوردادا كەزەكتى بوس ورىندار جارمەڭكەسى ءوتتى. وندا 70 كاسىپورىن مەكەمەسى 400 جۇمىس ۇسىندى.
جارمەڭكەگە كەلگەن ماحامبەت امرين وقۋدى وتكەن جىلى عانا بىتىرگەن. راديوتەحنيكا, ەلەكترونيكا جانە تەلەكوممۋنيكاتسيالار ماماندىعى بويىنشا جۇمىس ىستەگىسى كەلەدى. بىلتىر «استانا ەكسپو-2017» ۇلتتىق كومپانياسىندا بايلانىس ينجەنەرى بولىپ قىزمەت اتقارعان. كومپانياداعى قىسقارتۋدان كەيىن جۇمىسسىز قالعان جاس مامان بۇل جولى دا ماماندىعى بويىنشا جۇمىس تابا المادى. ماحامبەتتىڭ ايتۋىنشا, ۇسىنىلعان ورىنداردىڭ جالاقىسى دا تومەن.
استانا قالاسى اكىمدىگىنىڭ جۇمىسپەن قامتۋ ورتالىعىنىڭ باسشىسى ولجاس ومار دەرەكتەر بازاسىندا 4500-گە جۋىق جۇمىس ورنى بار ەكەندىگىن ايتادى. «كوبىنەسە قىزمەت كورسەتۋ سالاسىندا ماماندار جەتىسپەي جاتادى. تەحنيكالىق ماماندار مەن قۇرىلىسشى سياقتى جۇمىسشىلار دا سۇرانىستا» دەيدى ول.
اكىمدىكتىڭ جۇمىسپەن قامتۋ ورتالىعى ءبىزدىڭ رەداكتسيانىڭ جول بويىندا ورنالاسقان. ورتالىققا تاڭەرتەڭنەن اعىلىپ كەلە جاتقان اتا-اجەلەردى بايقايمىز. ورايى كەلگەندە, ورتالىق باسشىسىنان مۇنىڭ ءمانىسىن سۇرادىق. «نەگىزى, زەينەتكەرلەر بالالارى مەن نەمەرەلەرىنە جۇمىس ىزدەپ كەلەدى.
«نەمەرەم ۇيدە وتىر, سىزدەردە قانداي جۇمىس بار؟» دەپ سۇرايدى. ءبىز ولاردان «نەگە نەمەرەڭىز ەمەس, ءوزىڭىز كەلدىڭىز؟» دەپ سۇراساق, «ونىڭ قولى تيمەيدى», «ءوزى بارعىسى كەلمەيدى» دەگەن سىندى جاۋاپتار ەستيمىز» دەدى ورتالىق باسشىسى.
ەسكە سالا كەتەيىك, ورتالىقتا جۇمىسىنان ايىرىلعاندارعا بەرىلەتىن جاردەماقى قاراستىرىلعان. جۇمىس بەرۋشى مەملەكەتتىك الەۋمەتتىك ساقتاندىرۋ قورىنا ءار قىزمەتكەرى ءۇشىن اقشا اۋدارادى. ماسەلەن, ەگەر جۇمىسشى تولەنەتىن زەينەتاقى مەن سالىقتى الىپ تاستاعاندا, قولعا 100 مىڭ تەڭگە السا, ونىڭ سوڭعى 24 ايى ەسەپتەلىنەدى. وسىلايشا, 4 اي قاتارىنان 28 مىڭ تەڭگەدەي جاردەماقى تولەنەدى.
گۇلدانا تالعاتقىزى
