65 كوشەگە جوندەۋ جۇرگىزىلەدى
استانادا جىل سايىنعى جول جوندەۋ جۇمىستارى باستالدى. مۇنى استانا قالاسى اكىمدىگى وكىلى مەن كولىك جانە جول-كولىك ينفراقۇرىلىمىن دامىتۋ باسقارماسى ماماندارى رەسمي مالىمدەدى.
قازمەديا ورتالىعىنان باستالعان ءباسپاسوز تۋرى اياسىندا جۋرناليستەرگە جوندەۋ جۇرگىزىلۋى ءتيىس كوشەلەر كورسەتىلدى. تىلشىلەر بەلاسار كوپىرىنە بارىپ, جۇمىس بارىسىمەن تانىستى. اسفالت جولدارداعى شۇڭقىرلار بەكىتىلىپ, ويدىم جەرلەر تۇزەتىلمەك. اۆتوموبيل جولدارىن ورتاشا جوندەۋ جۇمىستارى قالاداعى 65 كوشەنى قامتيدى دەپ جوسپارلانۋدا.
«جوندەۋ جۇمىسى 15 ءىرى كوشەنى, بىرنەشە كوپىر مەن ۋچاسكەدە بولادى. اتاپ ايتقاندا, ماڭگىلىك ەل جول بولىگىندە «مارال» كوپىرىنەن كەرەي-جانىبەك حاندار كوشەسى تۇزەلەدى. تۇران داڭعىلى ۋچاسكەسىندە قورعالجىن تاسجولىنان قابانباي باتىر بويى جوندەلەدى. مومىشۇلى داڭعىلىنان مۇڭايتپاسوۆ كوشەسى ارالىعى, ا.پۋشكين كوشەسىنەن ع.مۇستافينگە دەيىن مارشرۋتتىق ادىسپەن جوندەۋ جۇرەدى. جۇمىستاردىڭ باسىم بولىگى 1 شىلدەگە دەيىن اياقتالۋى ءتيىس. اۋا رايىنىڭ قولايسىزدىعىنا وراي, جۇمىس كەش باستالدى» دەيدى جولداردى سالۋ جانە جوندەۋ ءبولىمىنىڭ باسشىسى اسقار يساقوۆ.
قالاداعى №18, 12, 28 باعىتتاعى اۆتوبۋس جۇرگىزۋشىلەرى جولدىڭ جوندەلىپ جاتقانىنا قۋانىشتى. «اۆتوبۋس پاركى ءبىزدى ءار باعىتقا اۋىستىرىپ وتىراتىندىقتان, كوشەلەردىڭ شۇڭقىر-شۇڭقىرىن بىلەمىن. جوندەۋ جۇمىستارىنا وراي, كەيبىر داڭعىلداردى اينالىپ وتۋگە تۋرا كەلىپ ءجۇر. جولاۋشىلار وسىندايدا نارازىلىق تانىتادى. ەندى وسى جوندەۋ جۇمىستارىنىڭ يگىلىگىن كورەمىز» دەيدى باعدار جۇرگىزۋشىسى.
مۇنان كەيىن قالادا سالىناتىن ۆەلوجولداردىڭ جوباسىمەن تانىستىق. قالالىق اكىمدىكتىڭ ءباسپاسوز وكىلى سەرىك ادىلباەۆ ۆەلوجولداردىڭ قالا تۇرعىندارى ءۇشىن ماڭىزدى ەكەنىن ايتادى. «قازىر قالا سىرتىنداعى جاسىل باقتا ۆەلوسيپەد تەبەتىندەر استانانىڭ ىشىندە جۇرسە, قانداي جاقسى. بۇل تۇرعىدا قىرۋار قارجى ءبولىنۋ جوسپارلانعانىن ايتا كەتكەن ءجون» دەيدى ول.
ال استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى تابيعاتتى قورعاۋ جوبالارىن باسقارۋدى پەرسپەكتيۆالىق جوسپارلاۋ ءبولىمىنىڭ باسشىسى ازامات جاناتاەۆتىڭ ايتۋىنشا, 2017 جىلدىڭ 15 جەلتوقسانىندا ۆەلوسيپەدتى كولىكتىك ينفراقۇرىلىم جوبالىق-سمەتالىق قۇجاتتارى جاسالىنىپتى. سونىڭ نەگىزىندە, سول جاعالاۋداعى ورتالىق ساياباقتان ەسىل وزەنىنىڭ جاعالاۋىنا, قوناەۆ كوشەسىنەن دوستىق, ماڭگىلىك ەل داڭعىلىنا, رىسقۇلوۆ پەن قابانباي باتىر داڭعىلىنداعى اينالما جولدارى بويىنا ۆەلوجول تۇسەدى.
سونداي-اق, ماماننىڭ سوزىنشە, وڭتۇستىك قازاقستان, پاۆلودار, جامبىل, اقمولا وبلىسى ايماقتارىندا ۆەلوجولدار سالىنباق.
قارلىعا يبراگيموۆا