استانا
ەلوردادا Astana Media Week فورۋمى باستالدى. ورتالىق ازياداعى ەڭ ءىرى مەديا اپتالىق ەلىمىزدە ەكىنشى رەت ۇيىمداستىرىلىپ وتىر. اۋقىمدى شارا 28 قىركۇيەككە دەيىن جالعاسادى. وعان 2000-نان استام قوناق, قازاقستاندىق جانە شەتەلدىك مەديا يندۋستريانىڭ 60 توپ-مەنەدجەرى, 50-دەن اسا پروداكشن-كومپانيا قاتىسۋدا.
جامبىل وبلىسى
تارازدا «جىگىت سۇلتانى-2018» بايقاۋى ءوتتى. ەكى كەزەڭدى جارىسقا 18-29 جاس ارالىعىندا وبلىس اۋداندارى مەن جوعارى وقۋ ورىندارى ستۋدەنتتەرى قاتىستى.
تۇركىستان وبلىسى
توعىز جولدىڭ تورابىندا ورنالاسقان ارىس قالاسىنا العاش رەت كوگىلدىر وتىن تارتىلا باستادى. سونىمەن بىرگە, اقدالا جانە قوجاتوعاي اۋىلدىق وكرۋگتەرىندەگى ەلدى مەكەندەرىنە تابيعي گاز قۇبىرلارى تارتىلدى. بۇل جۇمىستارعا وبلىستىق بيۋدجەتتەن 88,9 ملن تەڭگە قارجى جۇمسالدى.
اقتوبە وبلىسى
وبلىس ورتالىعىندا بالا تاربيەسىنە سالعىرت قاراعان 2500 اتا-انا اكىمشىلىك جاۋاپكەرشىلىككە تارتىلدى. جىل باسىنان بەرى 36 ادام اتا-انالىق قۇقىعىنان ايىرىلعان.
ماڭعىستاۋ وبلىسى
اقتاۋدا بيىكتىگى 5,2 مەتر, ەنى 6,2 مەتر, ال ۇزىندىعى 60 مەترلىك ءتۇرلى ءتۇستى شامدارمەن كومكەرىلگەن اركا پايدالانۋعا بەرىلەدى. قۇنى 23 ميلليون 477 مىڭ تەڭگە تۇراتىن قۇرىلىم قالانىڭ ساۋلەتىن ارتتىراتىن بولادى.
قوستاناي وبلىسى
وبلىس ورتالىعىندا زياتكەرلىك مەنشىك قۇقىن بۇزۋ دەرەگى بويىنشا قۇنى 300 مىڭ تەڭگەنىڭ كونترافاكتىلىك تاۋارلارى جويىلدى. الەمگە بەلگىلى برەندتەردىڭ تاڭباسىمەن ساتىلىمعا قويىلعان 170 دانا تاۋار شىنجىر تاباندى تراكتورمەن تاپتالدى.
قىزىلوردا وبلىسى
اقاي مەن تورەتام ەلدى مەكەندەرىنىڭ تۇرعىندارى بايقوڭىر قالاسىنىڭ ەمحاناسىنا تىركەلەدى. بۇعان دەيىن قارماقشى اۋدانىنا قاراستى اتالعان ەلدى مەكەندەردىڭ تۇرعىندارى مەديتسينالىق قىزمەتى پايدالانۋ ءۇشىن 90 شاقىرىم قاشىقتىقتاعى اۋدان ورتالىعى جوسالى كەنتىنە بارۋعا ءماجبۇر ەدى.
